நத்தையின் அழுகை - த.ரெ.தமிழ்மணி

காடழித்த வீட்டு கண்ணாடியைக்
கொத்தும் குருவிகள் -
வாழ்விட மீட்புப் போராட்டம்.,

இரவிலும் தாகமா
இளநீர் அருந்த?
மரநாய்.,

தேன்சிட்டா? வண்ணத்தியா?
வலிக்காம தேனெடுப்பது யார்?
பூக்களின் பட்டி மன்றம்.,

காட்டிக் கொடுத்ததில்லை
தன் இனத்தை
ஆட்காட்டிப் பறவை.,

தூண்டிலில் ஆமை
கலுக்கென்று சிரித்தது
மீன்கொத்தி

மேலே இரட்டைவால் குருவி
கீழே ஓணான்
கம்பீரமாய் பறக்கும் ஈசல்

தட்டான் பிடிச்சா
கண்வலி வரும்
சிற்றுயிர் காக்கும் தாய்மணம்

தேர் எதற்கு?
சிரித்தது முல்லை
கிளுவையில் சாய்ந்தபடி...

விவசாயக்கடன்
கைரேகை
ஆங்கிலப் படிவம்

அரபு நாட்டுக்கும் திருப்பூருக்கும்
பட்டினியோடு அனுப்பி வைத்தது
சோறுடைத்த சோழநாடு...?

இப்போது வந்த நாரை
குளத்தில் மீன் தேடவில்லை
குளத்தையே தேடுகிறது

இந்த பதிவைத் துவங்கியவர் நன்றி கூறியுள்ளார் சிவா

“குஞ்சுகளை ஒப்படைத்த
குருவிக்கு என்ன சொல்லுது
கண்ணீரோடு வெட்டப்பட்ட மரம்''

“இப்போது வந்த நாரை
குளத்தில் மீன் தேடவில்லை
குளத்தையே தேடுகிறது''

“காடழித்த வீட்டு
கண்ணாடியைக் கொத்தும் குருவிகள்
வாழ்வு மீட்புப் போராட்டம்''

“நத்தாங்கூட்டில் மழையோசை
பிசுக்கு டப்பாவில் சாரல்
ஏமாறும் நண்டுகள் சட்டியில்''

“எந்திரத் தேள் கொட்ட
வலியில் துடிக்கும் ஆறு
மணல் திருட்டு''

“பட்டமரம்
உயிர் காத்தது
பொந்துக்குள் கிளிகள்''

இந்த பதிவைத் துவங்கியவர் நன்றி கூறியுள்ளார் சிவா

“வளமனைகளில்
எல்லைக் கற்கள்
உழவின் நடுகற்கள்''

“கள்இறக்காப் பனை
மரத்தடியில்
மதுப்புட்டிகள்''

“அழிவு அறிவியலை
மூட்டைக்கட்டு
காம்புகளில் கதிர்வீச்சு கசியுமுன்''

இந்த பதிவைத் துவங்கியவர் நன்றி கூறியுள்ளார் சிவா

யாருக்குக் கேட்கிறது?
மணல் அள்ளும் ஓசையில்
நத்தையின் அழுகை

மரம் ஏறாச் சிறுவர்கள்
நுணாப்பழம் பறித்துப் போடும்
நார்த்தங்குருவிகள்

பதுங்குவதே
போராடத்தான்
குழிப்பன்றி

இந்த பதிவைத் துவங்கியவர் நன்றி கூறியுள்ளார் சிவா