மோடியை கொல்ல ஐ.எஸ்.ஐ. திட்டம்; தாவூத் இப்ராகிமிடம் பொறுப்பு ஒப்படைப்பு!

புதுடெல்லி: பா.ஜனதா பிரதமர் வேட்பாளர் நரேந்திர மோடியை கொல்ல பாகிஸ்தானின் உளவுத் துறை நிறுவனமான ஐ.எஸ்.ஐ. திட்டமிட்டுள்ளதாகவும், இதற்கான பொறுப்பு பிரபல நிழலுக தாதா தாவூத் இப்ராகிமிடம் ஒப்படைக்கப்பட்டுள்ளதாகவும் மத்திய உளவுத் துறைக்கு தகவல் கிடைத்துள்ளதாக செய்தி வெளியாகி உள்ளது.

அண்மையில் பீகார் தலைநகர் பாட்னாவில்  மோடி கலந்துகொண்ட பொதுக்கூட்டத்தில் தொடர் குண்டுவெடிப்பு நிகழ்ந்தது. மோடி அங்கு வருவதற்கு முன்னரே குண்டுவெடிப்பு நிகழ்ந்ததால் அவர் உயிர் தப்பினார். இந்த சம்பவத்திற்கு இந்திய முஜாகிதீன் இயக்கமே காரணம் என விசாரணையில் தெரியவந்துள்ளதாக தேசிய புலனாய்வு ஏஜென்சி தெரிவித்திருந்தது.

இதனிடையே பாட்னா குண்டுவெடிப்பை தொடர்ந்து மத்திய உளவுத் துறை உஷார்படுத்தப்பட்டது. இந்நிலையில் மோடி தேர்தலில் வெற்றிபெற்று இந்தியாவின் அடுத்த பிரதமராக ஆவதை பாகிஸ்தானின் உளவு நிறுவனமான ஐ.எஸ்.ஐ. விரும்பவில்லை என்றும், இதனால் அவரைக் கொல்ல ஐ.எஸ். ஐ.  திட்டமிட்டுள்ளதாகவும், இதற்கான பொறுப்பை மும்பை தொடர் குண்டுவெடிப்பு குற்றவாளியும், இந்தியாவால் தேடப்பட்டு வரும் பிரபல நிழலுக தாதாவுமான தாவூத் இப்ராகிமிடம் ஒப்படைத்துள்ளதாகவும் உளவுத் துறைக்கு தகவல் கிடைத்துள்ளதாக டெல்லி வட்டார தகவல்கள் தெரிவிக்கின்றன.

இதனிடையே ஐ.எஸ்.ஐ. தவிர, சவுதி அரேபியாவில் இயங்கி வரும் சில தீவிரவாத குழுக்களும் மோடியை கொல்ல சதித்திட்டம் தீட்டியுள்ளதாகவும், அக்கும்பல் மனித வெடிகுண்டு அல்லது மோடியின் வாகனம் மீது வெடிபொருட்கள் நிரப்பப்பட்ட வாகனத்தை மோதச் செய்வது உள்ளிட்ட பல்வேறு வாய்ப்புகள் குறித்து ஆய்வு செய்து வருவதாகவும் அத்தகவல்கள் மேலும் தெரிவிக்கின்றன.

மோடிக்கு பிரதமருக்கு நிகரான எஸ்.பி.ஜி. பாதுகாப்பு கோரப்பட்ட நிலையில், அதனை மத்திய அரசு நிராகரித்துவிட்டது. அதே சமயம் அவருக்கு இசட் பிளஸ் பாதுகாப்பு வழங்கப்பட்டுள்ளது. மோடி எங்கு சென்றாலும் அவரை சுற்றி 12 கறுப்பு பூனைப்படை கமாண்டோக்கள் பாதுகாப்புக்கு உடன் செல்கின்றனர் என்பது குறிப்பிடத்தக்கது.

விகடன்