"ஐந்தாவது தூண்' அமைப்பின் செயல்பாடு : மலேசிய ஊழல் தடுப்பு குழு ஆய்வு

**சிவா** · **சிவா** Tue Nov 19, 2013 11:56 am

சென்னை: மலேசிய அரசின் ஊழல் தடுப்பு கமிஷன் அதிகாரிகள் குழு, சென்னையில், "ஐந்தாவது தூண்' அமைப்பின் செயல்பாடு குறித்து, ஆய்வு செய்தது. தமிழகத்தில், "ஐந்தாவது தூண்' என்ற, ஊழல் மற்றும் லஞ்சத்திற்கு எதிரான, தன்னார்வ அமைப்பு செயல்பட்டு வருகிறது.

இந்த அமைப்பின் சார்பில், லஞ்சத்திற்கு எதிரான விழிப்புணர்ச்சி ஏற்படுத்தும் வகையில், "பூஜ்ஜியம்' பொறிக்கப்பட்ட, மாதிரி ரூபாய் நோட்டுக்கள் அச்சடிக்கப்பட்டு, மக்களிடையே, வினியோகிக்கப்பட்டுள்ளது.

இந்நிலையில், மலேசிய அரசின் ஊழல் தடுப்பு கமிஷன் அதிகாரிகள் குழு, சென்னையில் உள்ள, "ஐந்தாவது தூண்' செயல்பாடு குறித்து ஆய்வு செய்துள்ளது. ஹாங்காங்கில், ஊழல் மற்றும் லஞ்சத்திற்கு எதிராக, அரசு சார்பில் ஒரு பிரிவு ஏற்படுத்தப்பட்டுள்ளது.

இந்திய தேர்தல் கமிஷன் போல், தனி அதிகாரம் கொண்ட அமைப்பாக இது, செயல்பட்டு வருகிறது. இதே போல், மலேசியாவில், லஞ்சம் மற்றும் ஊழலை ஒழிக்கும் விதமாக, அரசு சார்பில், கமிஷன் ஒன்று உருவாக்கப்பட்டுள்ளது. இந்த கமிஷனை சேர்ந்தவர்கள், மற்ற நாடுகளில், லஞ்சம், ஊழல் ஒழிப்பு தொடர்பான நடவடிக்கைகள் குறித்து, ஆய்வு செய்து வருகின்றனர்.

இந்த வகையில், இந்தியாவிற்கு, மூன்று அதிகாரிகள் கொண்ட குழுவினர், வந்துள்ளனர். பல்வேறு பகுதிகளை பார்வையிட்ட இவர்கள், நேற்று தமிழகம் வந்தனர். சென்னையில், "ஐந்தாவது தூண்' அமைப்பின் செயல்பாடுகள் குறித்து, அவர்கள் ஆய்வு செய்தனர்.

ஊழலுக்கு எதிராக, "ஐந்தாவது தூண்' எடுத்து வரும் நடவடிக்கைகள் தொடர் பாக, கேட்டறிந்தனர். இதுகுறித்து, "ஐந்தாவது தூண்' அமைப்பின், இணை நிறுவனர், விஜய் ஆனந்த் கூறியதாவது: இந்தியாவில் உள்ள, சி.பி.ஐ.,யின் ஊழல் தடுப்பு துறை போன்ற, ஊழல் தடுப்பு அமைப்புகள், தேர்தல் கமிஷன் போன்று தனி அமைப்பாக இல்லை. இவை சுதந்திரமாக செயல்பட, முழு அதிகாரத்தை அரசு வழங்க வேண்டும்.

ஐந்தாவது தூண் சார்பில், "பூஜ்ஜியம்' பொறிக்கப்பட்ட, 25 லட்சம் மாதிரி ரூபாய் நோட்டுக்கள், இதுவரை, பொதுமக்களுக்கு வழங்கப்பட்டுள்ளது. இவை மூலம், லஞ்ச, ஊழல் தொடர்பான விழிப்புணர்ச்சி ஏற்படுத்தப்பட்டு வருகிறது.

"பூஜ்ஜியம்' ரூபாய் நோட்டு தேவைப்படுவோர், 044 - 65273056 அல்லது 9445164555 என்ற எண்களுக்கு தொடர்பு கொள்ளலாம். இவ்வாறு, அவர் கூறினார்.