உலகச் செய்திகள்!

First topic message reminder :

 தென் ஆப்பிரிக்காவில் பஸ் விபத்தில் 29 பேர் பலி



ஜோகன்ஸ்பர்க், தென் ஆப்பிரிக்கா நாட்டின் கிழக்கே அமைந்துள்ள மபுமாலாங்கா மாகாணத்தில் நேற்று  நள்ளிரவு பஸ்சும், லாரியும் பயங்கரமாக மோதின. அதில் 29 பேர் பரிதாபமாக செத்தனர். மேலும் பலத்த காயம் அடைந்த 18 பேர் மீட்கப்பட்டு மருத்துவமனைகளில் சேர்க்கப்பட்டனர்.இந்த விபத்துக்கான காரணம் தெரியவில்லை. பொதுவாக தென் ஆப்பிரிக்காவில் சாலை விபத்துகளில் ஆண்டுக்கு 14 ஆயிரம் பேர் இறப்பதாகவும், அதற்கு சாலை சரிவர பராமரிக்காமல் இருப்பதே காரணம் என்று கூறப்படுகிறது.

பாகிஸ்தான் உளவாளிக்கு உதவிய இந்திய ராணுவ வீரர் கைது

உத்தரப்பிரதேசம் மாநிலம், மீரட்டில் உள்ள டெல்லி கேட் பகுதி அருகே பாகிஸ்தான் உளவுத்துறைக்கு சில ரகசிய தகவல்களை அனுப்பும் ஏஜெண்டாக செயல்பட்டு வந்த ஆசிப் அலி என்பவனை கடந்த 16-ம் தேதி சிறப்புப் படை போலீசார் கைது செய்தனர்.

அவனிடம் நடத்தப்பட்ட விசாரணையில் இந்திய ராணுவ வீரர் ஒருவர் மூலமாக ராணுவ ரகசியங்களை உளவறிந்து பாகிஸ்தான் உளவு அமைப்பான ‘ஐ.எஸ்.ஐ.’க்கு அனுப்பி வந்தது தெரிய வந்தது.

இதனையடுத்து, இமாச்சலப் பிரதேசம் மாநிலம், கங்ரா மாவட்டத்தில் சுனிட் குமார் என்ற ராணுவ வீரரை நேற்று கைது செய்த சிறப்புப் படை போலீசார் அவரை மீரட் நகருக்கு அழைத்து வந்து விசாரனை நடத்தினர்.

2012-ம் ஆண்டு ராணுவத்தில் சேருவதற்கு 3 மாதங்கள் முன்னதாக ஒரு வெளிநாட்டு பெண்ணின் தொடர்பு தனக்கு ஏற்பட்டதாகவும், ராணுவப் பணியில் சேர்ந்த பின்னர் அந்தப் பெண்ணிடம் தான் பணியாற்றும் பிரிவு தொடர்பாக சில ரகசியங்களை கூறியதாகவும், அவற்றை அந்தப் பெண் ஆசிப் அலிக்கு தெரிவித்து, அவன் மூலம் அவை பாகிஸ்தான் உளவுத்துறைக்கு சென்று சேர்ந்துள்ளதாகவும் விசாரணையில் தெரியவந்துள்ளது.

நேற்று கைது செய்யப்பட்ட சுனிட் குமாரிடம் இருந்து ஒரு லேப் டாப், ஒரு ஹார்ட் டிஸ்க், 2 கைபேசிகள் மற்றும் ஒரு பென் டிரைவ் ஆகியவற்றை பறிமுதல் செய்த சிறப்புப் படை போலீசார் அவற்றை ஆய்வு செய்து வருகின்றனர்.

திரிபோலி விமான நிலையத்தை கைப்பற்றியுள்ளதாக மிஸ்ரதா போராளிகள் அறிவிப்பு

லிபியா நாட்டின் தலைநகரான திரிபோலியில் உள்ள சர்வதேச விமான நிலையத்தை கைப்பற்றியுள்ளதாக மிஸ்ரதா பகுதி போராளிகள் அறிவித்துள்ளனர்.

லிபியாவின் முன்னாள் அதிபர் முவம்மர் கடாபி கொல்லப்பட்ட பிறகு தலைநகர் திரிபோலியில் உள்ள சர்வதேச விமான நிலையத்தை கைப்பற்றுவது தொடர்பாக தேசிய படைகளுக்கும், இஸ்லாமிய போராளி குழுக்களுக்கும் இடையில் கடுமையான சண்டை நடந்து வருகிறது.

இதனையடுத்து, கடந்த ஜூலை 13-ம் தேதி திரிபோலி சர்வதேச விமான நிலையம் இழுத்து மூடப்பட்டது. மட்டிகா விமான நிலையத்தின் மூலம் விமானப் போக்குவரத்து தொடர்ந்து வந்தது.

இந்நிலையில், திரிபோலி சர்வதேச விமான நிலையத்தில் காவலுக்கு இருந்த எதிரி குழுவின் படைகளை எதிர்த்து போரிட்டு, அவர்களை ஓடச்செய்து, திரிபோலி சர்வதேச விமான நிலையத்தை கைப்பற்றி, தங்கள் வசமாக்கிக் கொண்டதாக லிபியாவில் உள்ள பல்வேறு போராளிக் குழுக்களில் ஒன்றான மிஸ்ரதா நகரை சேர்ந்த போராளிக் குழுவினர் நேற்று அறிவித்துள்ளனர்.

விமான நிலைய கட்டிடம் மற்றும் விமானங்களின் மீது இந்தக் குழுவினர் தங்களது கொடியுடன் ஏறி நிற்கும் காட்சிகளை உள்ளூர் ஊடகங்கள் வெளியிட்டுள்ளன.

விமான நிலையத்தையடுத்து, 30 கிலோ மீட்டர் தூரத்தில் உள்ள தலைநகர் திரிபோலியையும் அவர்கள் கைப்பற்றி விடக்கூடும் என்ற கருத்து அங்கு நிலவி வருகின்றது.

இங்கிலாந்தின் தலைசிறந்த பள்ளி மாணவராக இந்திய வம்சாவளி அசானிஷ் கல்யாணசுந்தரம் தேர்ச்சி

இங்கிலாந்து நாட்டில் ‘‘ஏ லெவல்’’ என்னும் பள்ளி இறுதித் தேர்வில் அதிக மதிப்பெண்கள் எடுப்பது சாதனைக்குரியதாக கருதப்படுகிறது.

இந்த தேர்வுகளில் கணிதம், இயற்பியல், வேதியியல், உயிரியல் மற்றும் நெருக்கடியான சிந்தனை என்னும் 5 பாடங்கள் உண்டு. அண்மையில் நடந்து முடிந்த தேர்வுகளில் இந்த 5 பிரிவுகளிலும் இந்திய வம்சாவளியைச் சேர்ந்த 18 வயது அசானிஷ் கல்யாணசுந்தரம் என்ற மாணவர் நட்சத்திர அந்தஸ்துடன் கூடிய ‘‘ஏ கிரேடு’’ (100–க்கு 100) மதிப்பெண்கள் எடுத்து சாதனை படைத்து இருக்கிறார்.

இதேபோல் விரிவாக்க திட்ட தகுதி என்னும் பாடப் பிரிவிலும் அவர் இதே அந்தஸ்துடன் ‘‘ஏ கிரேடு’’ பெற்றுள்ளார். இந்த தேர்வுகளில் ஒரு மாணவர் எடுக்கக் கூடிய அதிகபட்ச தகுதி இதுதான் என்பது குறிப்பிடத்தக்கது.

இங்கிலாந்தில் இத்தகைய சாதனையை ஒரு மாணவர் நிகழ்த்துவது சாதாரண விஷயம் அல்ல. இதன் மூலம் இங்கிலாந்தின் தலைசிறந்த மாணவர்களில் ஒருவர் என்ற பெயரும் அசானிஷ் கல்யாண சுந்தரத்துக்கு கிடைத்து இருக்கிறது.

இப்படி 5 பாடங்களில் சிறப்புத் தகுதியுடன் சதம் அடித்து இருப்பதன் மூலம் அவருக்கு உலகின் புகழ்பெற்ற பல்கலைக்கழகங்களில் ஒன்றான கேம்பிரிட்ஜ் பல்கலைக்கழகத்தில் வருகிற அக்டோபர் மாதம் சேர்ந்து மருத்துவம் படிக்கும் வாய்ப்பும் கிடைத்து இருக்கிறது.

அசானிஷ் தனது தாயார் சுஜாதாவுடன் லங்கான்ஷையர் மாகாணத்தில் உள்ள புர்ன்லே நகரில் வசித்து வருகிறார். அங்குள்ள செயின்ட் ஜோசப் பார்க் ஹில் பள்ளி மாணவர் படித்து வந்தார்.

‘‘எனக்கு அறுவை சிகிச்சை நிபுணராக வரும் ஆசை உள்ளது. ஆனால், எந்த துறையில் அப்படி ஆகவேண்டும் என்பது குறித்து இன்னும் முடிவு செய்யவில்லை’’ என்கிறார், அசானிஷ்.

இவரது சாதனையை பற்றி செயின்ட் ஜோசப் பார்க் ஹில் பள்ளி தலைமை ஆசிரியர் ஆலன் போர்டெயஸ் கூறுகையில், ‘‘சந்தேகத்துக்கு இடமின்றி அசானிஷ் தனிச் சிறப்பு மிக்க, தலைசிறந்த மாணவர்தான். தனது ஏ லெவல் பாடப்பிரிவுகளில் அவர் அசாத்திய திறமையை வெளிப்படுத்தி உள்ளார்’’ என்றார்.

அசானிஷ், அண்மையில் தனது அறிவியல் சிந்தனைகளுக்காக எடின்பர்க் பிரபுவின் கோல்டன் விருதையும் வென்றவர் என்பது குறிப்பிடத்தக்கது.

துபாயில் பறக்கும் இந்தியக் கொடி

லண்டன் ரியல் எஸ்டேட் முதலீட்டில் இந்தியர்கள் முன்னணியில் இருப்பதைப் பற்றிச் சென்ற வாரம் செய்தி வெளியிட்டிருந்தோம். அதைத் தொடர்ந்து துபாய் ரியல் எஸ்டேட் தொழிலிலும் இந்திய முதலீட்டாளர்களே ஆதிக்கம் செலுத்திவருவதாகச் சமீபத்தில் வெளியான துபாய் நிலத் துறையின் அறிக்கை (Dubai Land Department Report) கூறுகிறது.

பொதுவாக துபாய் உள்ளிட்ட பல வளைகுடா நகரங்கள் இந்தியர்களின் வியர்வையில் எழுந்ததாகச் சொல்லப் படுவதுண்டு. அங்கு பலதரப்பட்ட பணிகளைச் செய்வது நம்மவர்கள்தான். துபாய் அசுர வளர்ச்சியில் இந்திய உழைப்பாளிகளின் பங்கு கணிசமான அளவுக்கு இருக்கிறது. இப்போது வெளியாகி இருக்கும் துபாய் நிலத் துறையின் இந்த அறிக்கை துபாய் நகரில் முதலீடு செய்வதிலும் இந்தியர்களின் பங்கு ஓங்கியிருப்பதைக் காட்டுகிறது.

இந்திய முதலீட்டாளர்கள் 2014 முதல் அரையாண்டில் சுமார் 17 ஆயிரம் கோடி இந்திய பணத்தை ரியல் எஸ்டேட் துறையில் முதலீடு செய்துள்ளனர் என அந்த அறிக்கை குறிப்பிடுகிறது. இதன் மூலம் மொத்தம் 4, 417 நிலப் பரிமாற்றத்தை இந்தியர்கள் நடத்தியுள்ளனர் எனவும் அந்த அறிக்கை சொல்கிறது.

இந்தியாவுக்கு அடுத்தபடியாக இங்கிலாந்து, பாகிஸ்தான் ஆகிய நாடுகளைச் சேர்ந்தவர்கள் அடுத்த இரு இடங்களைப் பெறுகின்றனர். ரூ.34 ஆயிரம் கோடி அளவுக்கு இங்கிலாந்து, பாகிஸ்தான் ஆகிய நாடுகளைச் சேர்ந்தவர் துபாய் ரியல் எஸ்டேட்டில் முதலீடு

செய்துள்ளனர். துபாய் நிலத் துறையின் அறிக்கையின் படி இவர்கள் 9,739 நிலப் பரிமாற்றத்தை நடத்தியுள்ளனர். அதாவது இங்கிலாந்தைச் சேர்ந்தவர்கள் 2,258 நிலப் பரிமாற்றங்கள் மூலம் ரூ.10ஆயிரம் கோடி முதலீடு செய்துள்ளார்கள். பாகிஸ்தானியர்கள் 3,064 நிலப் பரிமாற்றங்கள் மூலம் ரூ.7500 கோடி முதலீடுசெய்துள்ளார்கள்.

ஈரானியர்களும் கனடியர்களும் இதற்கு அடுத்த நான்காம், ஐந்தாம் இடங்களைப் பெறுகின்றனர். ஈரானி யர்கள் ரூ.4500 கோடி ரூபாயும் கனடியர்கள் ரூ.3200 கோடி ரூபாயும் முதலீடு செய்துள்ளார்கள். ரஷ்யர்களும் அமெரிக்கர்களும் சீனர்களும் அடுத்த ஆறு, ஏழு, எட்டாம் இடங்களைப் பெறுகிறார்கள்.

வெளிநாட்டு முதலீட்டாளர்கள் குறித்து மேற்கொள்ளப்பட்ட இந்த ஆய்வில் இந்தியா, பாகிஸ்தான், இங்கிலாந்து, கனடா, சீனா, அமெரிக்கா, பிரான்ஸ், ஆப்கானிஸ்தான் ஆகிய நாட்டைச் சேர்ந்தவர்கள் ரூ.50,420 கோடி அளவுக்கு 2014 முதல் அரையாண்டில் துபாய் ரியல் எஸ்டேட்டில் முதலீடுசெய்துள்ளனர். இவர்கள் மொத்தம் 14 ஆயிரத்திற்கும் மேற்பட்ட நிலப் பரிமாற்றத்தை நடத்தியுள்ளனர். இந்த முதலீட்டாளர் களின் இந்தியர்கள் முதலிடம் பெற்றுள்ளதாக அந்த அறிக்கையின் முடிவு தெரிவிக்கிறது.

இந்த அறிக்கையின் மூலம் துபாயின் ரியல் எஸ்டேட் சிறப்பான வளர்ச்சி கண்டுவருவது நிரூபணமாகியுள்ளது என துபாய் நிலத் துறையின் இயக்குநர் சுல்தான் பட்டி பின் மெஜ்ரென் தெரிவித்துள்ளார்.

சௌதி அரேபியாவில் மரண தண்டனைகள் அதிகரிப்பு

சௌதி அரேபியாவில் இந்த மாதம் மரண தண்டனை நிறைவேற்றப்படும் சம்பவங்கள் அதிகரித்திருக்கின்றன.

ஒருவர் பில்லி சூன்யம் போன்ற நடவடிக்கைகளில் ஈடுபட்டார் என்ற குற்றச்சாட்டில் சிரச்சேதம் செய்யப்பட்டதாகக் கூறப்படுகிறது.

ஆகஸ்டு 4ம் தேதியிலிருந்து 19 பேருக்கு மரண தண்டனை நிறைவேற்றப்பட்டிருப்பதாக ஹ்யூமன் ரைட்ஸ் வாட்ச் என்ற சர்வதேச மனித உரிமை அமைப்பு கூறுகிறது.

போதைப் பொருட்கள் கடத்தியது போன்ற வன்செயல் அல்லாத குற்றங்களுக்காக எட்டு பேர் குற்றவாளிகளாகத் தீர்ப்பளிக்கப்பட்டனர் என்று இந்த அமைப்பு கூறுகிறது.

மரண தண்டனை நிறைவேற்றப்பட்டவர்களில் நால்வர் சௌதி அரேபியாவுக்குள் ஹஷிஷ் என்ற போதைப் பொருளை கடத்தி வர முயன்றதாகக் குற்றம் காணப்பட்டவர்கள் என்று தெரிகிறது.

நைஜீரியாவிலும் பரவுகிறது எபோலா

மேற்கு ஆப்பிரிக்காவில் ஆட்கொல்லி நோயாக பரவிவரும் எபோலா வைரஸ் தொற்று லைபீரியாவை அடுத்து தற்போது நைஜீரியாவிலும் வேகமாக பரவி வருகிறது. இதனால் அங்கு புதிய சிகிச்சை மையங்கள் பல நிறுவப்பட்டுள்ளது.

ஐ.நா.வின் உலக சுகாதார மையத்தின் கணக்குப்படி இதுவரை இந்த தொற்றுக்கு 2,615 பேர் பாதிக்கப்பட்டுள்ளனர். அதில் 1427 பேர் பலியாகிவிட்டனர். அதிகபட்சமாக லைபீரியாவில் 1000-க்கும் மேற்பட்டோர் பாதிக்கப்பட்டுள்ளனர்.

நைஜீரியாவின் எனுகு மாநிலத்தின் கிழக்கே 500 கிலோ மீட்டர்கள் வரை எபோலா பரவியுள்ளது. அங்கு 213 பேர் தொற்றுக்கு ஆளாகியிருப்பதாக கருதப்பட்டு அவர்கள் தீவிர கண்காணிப்பில் உள்ளனர். 16 பேருக்கு வைரஸ் தாக்கியிருப்பது உறுதிப்படுத்தப்பட்டிருந்தது. அதில் 5 பேர் உயிரிழந்துவிட்டனர்.

பிரதமரின் காரிலேயே திருட்டு

ஏழை, பணக்காரர் என எந்தவித பாகுபாடும் பாராமல், அனைவரிடமும் திருடர்கள் தங்கள் கைவரிசையை காட்டி வருகின்றனர். எனினும் அரசியல்வாதிகள், மந்திரிகள் போன்ற முக்கிய புள்ளிகளிடம் அவர்கள் எச்சரிக்கையாகவே இருப்பர். ஆனால் பெல்ஜியத்தில், அந்த நாட்டு பிரதமரிடமே திருடர்கள் கைவரிசை காட்டியிருப்பது அங்குள்ள மக்களை அதிர்ச்சிக்குள்ளாக்கி இருக்கிறது.

பெல்ஜியம் தலைநகர் பிரஸ்சல்ஸில் உள்ள உடற்பயிற்சிக் கூடம் (ஜிம்) ஒன்றுக்கு பிரதமர் எலியோ டி ரூபோ சென்றிருந்தார். அப்போது அவரது விலை உயர்ந்த கார், ஜிம்முக்கு வெளியே நின்று கொண்டிருந்தது. பிரதமரின் கார் டிரைவர், அருகில் உள்ள புத்தகக்கடை ஒன்றுக்கு சென்றிருந்தார்.

அப்போது அங்கு வந்த யாரோ மர்ம நபர்கள் காரின் கண்ணாடியை உடைத்து, உள்ளே இருந்த லேப்டாப், சிறிய பெட்டி, செல்போன் சார்ஜர், துணிகள் மற்றும் முக்கிய ஆவணங்கள் சிலவற்றை எடுத்துச்சென்று விட்டனர்.

இது தொடர்பாக பிரசல்ஸ் போலீசார் விசாரணை நடத்தி வந்தாலும், பிரதமரிடமே கைவரிசை காட்டிய பலே ஆசாமிகளைப்பற்றித்தான் அந்த நாட்டு ஊடகங்கள் அனைத்தும் செய்தி வெளியிட்டு வருகின்றன.

 

   

எங்களது கடல்பகுதியில் இந்திய மீனவர்களை மீன்பிடிக்க அனுமதிக்க மாட்டோம்: இலங்கை

இந்திய-இலங்கை கடற்பகுதியில் மீனவர்கள் மீன்பிடிப்பது தொடர்பான பிரச்சினைக்கு சுமூக தீர்வு காண்பதற்காக வருகிற 29-ந்தேதி டெல்லியில் இரு தரப்பினருக்கும் இடையே பேச்சுவார்த்தை நடக்க இருக்கிறது.

இந்த நிலையில், கடந்த வாரம் கொழும்பு நகரில் இலங்கை ராணுவ அமைச்சகம் ஏற்பாடு செய்திருந்த ஒரு கூட்டத்தில் பா.ஜனதா தலைவர்களில் ஒருவரான சுப்பிரமணியசாமி கலந்து கொண்டார். அப்போது பேசிய அவர் “மன்னார் வளைகுடாவில் இந்திய கடல் எல்லை பகுதியில் தரமான மீன்களும், இறால்களும் இல்லாமல் போய்விட்டது. ஏற்றுமதி செய்யக் கூடிய அளவிற்காக மதிப்பு மிக்க மீன்களும், இறால்களும் இலங்கை கடற்பகுதி பக்கத்தில்தான் காணப்படுகின்றன.

இந்திய கடல் பகுதியில் மீன்வளம் பெருகுவதற்கு எப்படியும் 3 ஆண்டுகள் ஆகும். எனவே, அதுவரை இந்திய மீனவர்களை தற்காலிகமாக இலங்கையின் கடல் எல்லை பகுதியில் மீன்பிடிக்க அனுமதிக்கவேண்டும்” என்று கோரிக்கை விடுத்து இருந்தார்.

இது குறித்து இலங்கை அரசின் மீன்வளத்துறை மந்திரி ரஜிதா சேனரத்னே கொழும்பில் நிருபர்களிடம் கூறுகையில், “இதுபோன்றதொரு கோரிக்கையை ஏற்றுக் கொள்வதற்கான வாய்ப்பு அறவே இல்லை. மேலும் இந்த விஷயத்தில் எங்களை யாராலும் கட்டாயப்படுத்த முடியாது” என்றார்.

சுப்பிரமணிய சாமியின் கோரிக்கைக்கு மன்னார் மீன்பிடிப்போர் சம்மேளனமும் எதிர்ப்பு தெரிவித்து இருக்கிறது.

இந்திய மீனவர்கள் சட்டவிரோதமாக இலங்கை கடற்பகுதியில் மீன் பிடிப்பதால், எங்களின் வாழ்வாதாரமே அடியோடு அழிந்துபோய்விட்டது என்று இந்த சம்மேளனத்தின் தலைவர் ஜஸ்டின் சோய்சா குற்றம்சாட்டினார்.

இந்திய-இலங்கை மீனவர்கள் பிரச்சினைக்கு பேச்சுவார்த்தை மூலம் தீர்வு காணவேண்டும் என்று இந்தியா வலியுறுத்தி வரும் நிலையில், இலங்கை கடற்படையினர் இலங்கை கடல் பகுதியில் மீன்பிடிக்கும் இந்திய மீனவர்களை தொடர்ந்து கைது செய்வதையும், அவர்களின் மீன்பிடி படகுகளை பறிமுதல் செய்வதையும் வாடிக்கையாக கொண்டு உள்ளது.

எனினும் அண்மையில், இந்திய கடற்பகுதியில் மீன்பிடித்த 16 இலங்கை மீனவர்களை இந்தியா விடுதலை செய்ததை அடுத்து தாங்கள் கைது செய்த 94 இந்திய மீனவர்களை இலங்கை விடுதலை செய்தது.

இந்தியாவின் சுதந்திர தினத்தையொட்டி நல்லெண்ண நடவடிக்கையாக இந்திய மீனவர்களை இலங்கை அரசு விடுதலை செய்தது குறிப்பிடத்தக்கது.