விலையில்லா இலவசங்கள்...

“அட என்னங்க நீங்க! எனக்கு விஷயமே தெரியாதே! நாங்கள்ளாம் இப்படிக் குத்துக்கல்லாட்டம்(!) இருக்கிறப்போ எங்களை ஏன் பயன்படுத்திக்கவே இல்லை! நாங்க என்னவோ, நீங்க அருமையா சமாளிச்சு நடத்திக்கிட்டிருக்கீங்கன்னு நெனைச்சுப் போக, நீங்க என்னடான்னா எல்லாம் முடிஞ்சபிறகு இப்படி வந்து சொல்றீங்க! இப்படியா தயங்குகிறது எங்ககிட்டே? உங்களுக்கு செய்ய சந்தர்ப்பம் வராதான்னு காத்துக்கிட்டிருக்கோமே நாங்க! சொல்லப்போனா கடமையல்லவா பட்டிருக்கோம்” என்கிற பாணியில், ஒன்றைச் சாதிக்க முடியாமல் போன விஷயத்தில் எல்லாமே கோட்டை விடப்பட்டபிறகு ஒருவர் சொன்னால் நமக்கு எப்படி இருக்கும்!

தட்டுங்கள் திறக்கப்படும் என்கிற வாசகம் சாதாரணமானது அல்ல. இது மிக ஆழ்ந்த பொருளில் சொல்லப்பட்டபோதும், எல்லோரது நடைமுறை வாழ்விற்கும் பொருந்துவதாக உள்ளது.

உடன்பயின்ற தோழி ஒருத்தியை பல்லாண்டுகள் கழித்துச் சந்தித்தார் ஒருவர். அப்போது அந்தத் தோழி, பேச்சுவாக்கில் “நம்முடன் படித்தவர்களிலேயே உங்களைத்தான் எனக்கு மிகப் பிடிக்கும். ஒரு கட்டத்தில் I love you என்று நீங்கள் சொல்வீர்கள் என்றுகூட எதிர்பார்த்தேன். சொல்லியிருந்தால் அதற்குத் தலையசைக்கும் மனநிலையில்கூட இருந்தேன். இப்போது நாம் வெவ்வேறு வாழ்க்கைத்துணைகளைத் தேடிக் கொண்டோம். இனி அதைப் பத்திப் பேசி என்ன பயன்?”

அன்று இரவு இவர் தூங்கவே இல்லை. காரணம் இப்பெண்ணைத் தீவிரமாகக் காதலித்தவர் இவர். விஷயத்தைப் போட்டுடைக்காமல் இனம்புரியாத மெளனத்தைக் காத்துவிட்டார்.

“பிரச்னை என்றதுமே என் ஞாபகம் ஏன் உங்களுக்கு வரவில்லை?” என்று நம்மிடம் கேட்டவர்களும் உண்டா இல்லையா?

எப்போதோ யாரோ உங்களுக்குத் தந்த வார்த்தைகளை நினைவேட்டின் தூசிகளைத் தட்டியெடுத்துத் தேடுங்கள். உங்களிடம் நன்றியுணர்ச்சி மிஞ்சியிருப்பவர்களும் இருப்பார்கள். நினைவுபடுத்திப் பாருங்கள்.

அழுகிற குழந்தைக்குத்தான் பால் என்பதை அறியாதவரா நீங்கள்?

——————————————————

நன்றி;

லேனாவின் ஒரு பக்கக் கட்டுரைகள்