சென்னையில் 2 லட்சம் மரங்கள்!

சென்னையில் 2 லட்சம் மரங்கள் பட்டுப் போனவை 1,069 இடையூறாக இருப்பது 3,012

சென்னை: சென்னையில் மக்கள் தொகை அதிகரிப்பால் விரிவாக்க பணி அவசியமாகி விட்டது. போக்குவரத்து நெரிசலை குறைக்க மேம்பாலங்கள், சாலை விரிவாக்கம் உள்ளிட்ட பணிகள் மேற்கொள்ளப்படுகின்றன. இதன் காரணமாக சென்னையில் மரங்களின் எண்ணிக்கை ஆண்டுதோறும் குறைந்து வருகின்றன. புயல், மழை உள்ளிட்ட இயற்கை சீற்றங்களாலும் மரங்களின் எண்ணிக்கை குறைகின்றன. ட்ரீ பேங்க் அறக்கட்டளை சென்னை மாநகராட்சியின் 15 மண்டலங்களில் உள்ள 200 வார்டுகளில் கடந்த ஆக.20ம் தேதி முதல் செப்.12ம் தேதி வரை மர கணக்கெடுப்பு நடத்தியது. கிண்டி செல்லம்மாள் கல்லூரி, போரூர் ஆல்பா கல்லூரி, எழும்பூர் சமுதாய கல்லூரி ஆகிய கல்லூரிகளை சேர்ந்த 70 மாணவ, மாணவிகள் மற்றும் அறக்கட்டளையின் உறுப்பினர்கள் 30 பேர் என மொத்தம் 100 பேர் இதில் ஈடுபட்டனர்.

சென்னையில் 2 லட்சத்து 4 ஆயிரத்து 510 மரங்கள் இருப்பதாக தெரியவந்துள்ளது. 2010ம் ஆண்டு சுமார் 3 லட்சம் மரங்கள் இருந்ததாக கணக்கெடுப்பில் தெரியவந்துள்ளது. 2011ல் இந்த எண்ணிக்கை குறைந்துள்ளது. 2012ல் சுமார் 2 லட்சத்து 30 ஆயிரம் மரங்கள் இருந்துள்ளன.

இந்த கணக்கெடுப்பில், 1,069 மரங்கள் காய்ந்த நிலையில் உள்ளன. இதில் அடையாறு மற்றும் சைதாப்பேட்டை பகுதியில் பழமையான மரங்கள் காய்ந்த நிலையில் உள்ளன. இவை எந்த நேரத்திலும் கீழே விழுவதற்கு வாய்ப்புள்ளது. இதுகுறித்து மாநகராட்சியிடம் தெரிவித்தும் அவர்கள் நடவடிக்கை எடுக்கவில்லை என்று மக்கள் குற்றம் சாட்டுகின்றனர்.

போக்குவரத்துக்கு இடையூறாக 3,012 மரங்கள் உள்ளன. 2,025 மரங்களின் வேர்கள் பாதிக்கப்பட்ட நிலையில் உள்ளன. எனவே இந்த மரங்களை அகற்ற வேண்டும் என்று கணக்கெடுப்பாளர்கள் தெரிவித்துள்ளனர். இந்த கணக்கெடுப்பு அறிக்கையை முதல்வரின் தனிப்பிரிவுக்கு அனுப்பவும் முடிவு செய்யப்பட்டுள்ளது. ட்ரீ பேங்க் அறக்கட்டளை நிறுவனர் முல்லைவனம் கூறுகையில், ‘மரங்களின் எண்ணிக்கை குறைவதால் பல்வேறு பாதிப்புகள் ஏற்படும். எனவே, மரம் வளர்க்க மக்களும், அரசும் முன்வர வேண்டும்Õ என்றார்.

செஞ்சுரி அடித்த மரங்கள்
பரங்கிமலை ராணுவ அதிகாரிகள் மருத்துவமனை சாலையில் 120 ஆண்டுகள் கடந்த வாகை மரமும், சைதாப்பேட்டை அரசு கால்நடை பராமரிப்பு மற்றும் பன்முக மருத்துவமனை வளாகத்தில் 120 ஆண்டுகள் கடந்த வாகை மரமும், சேப்பாக்கம் விருந்தினர் மாளிகை வளாகத்தில் 100 ஆண்டுகள் கடந்த வாகை மரமும், கிண்டி மவுன்ட் சாலையில் 100 ஆண்டுகள் கடந்த தைல மரமும், அடையாறு சர்தார் பட்டேல் சாலையில் 100 ஆண்டுகள் கடந்த தூகுவாகை மரமும் இருப்பதாக கணக்கெடுப்பில் தெரியவந்துள்ளது. மேலும், நுங்கம்பாக்கம் ஆண்கள் மேல்நிலைப்பள்ளியில் 80 ஆண்டுகள் கடந்த இயல் வாகை மரமும், பாண்டிபஜார் சாலையில் 70 ஆண்டுகள் கடந்த தூகு வாகை மரமும், அம்பத்தூர் ரானே பிரேக் வளாகத்தில் 70 ஆண்டுகள் கடந்த ஆல மரமும் உள்ளன.
நன்றி-தினகரன்

லட்ச கணக்குல மரம் இருந்த இடம் அது