இந்தியன் முஜாகிதீன் நிறுவனர் கைது ; பல குண்டு வெடிப்பை நிகழ்த்தியவன்

புதுடில்லி: பல்வேறு குண்டுவெடிப்புகளில் தொடர்புடைய இந்தியன் முஜாகிதீன் பயங்கரவாத அமைப்பை உருவாக்கிய நிறுவனர் யாசின்பத்கல் நேபாள எல்லையில் கைது செய்யப்பட்டான். கடந்த சில வாரங்களுக்கு முன்னர் வெடிகுண்டு தயாரிப்பில் கைதேர்ந்த அப்துல் கரீம் துண்டா என்ற பயங்கரவாதி கைது செய்யப்பட்டான். இவனுடன் நடப்பு மாதத்தில் 2 முக்கிய பயங்கரவாதிகள் கைது செய்யப்பட்டிருப்பதன் மூலம் பல்வேறு முக்கிய வழக்குகளில் முன்னேற்றம் காண முடியும் என இந்திய பாதுகாப்பு துறையினர் நம்புகின்றனர்.

100 க்கும் மேற்பட்டோர் பலி:

இந்தியாவில் பல்வேறு பயங்கரவாத செயல்களை நடத்தி வந்தது இந்தியன் முஜாகிதீன் அமைப்பு. குறிப்பாக தென் மாநிலங்கள் மற்றும் வட மாநிலங்களில் ( டில்லி, மும்பை, ஐதராபாத், பெங்களூரூ, ஆமதாபாத், புனே ஜெர்மன் பேக்கரி ) இந்த அமைப்பு மூலம் வெடிகுண்டு நிகழ்வுகள் நடந்ததாக விசாரணையில் தெரிய வந்துள்ளது. சில குண்டு வெடிப்புகளுக்கு இந்த அமைப்பினரே வெளிப்படையாக பொறுப்பேற்றுள்ளனர். இந்த அமைப்பு மூலம் நடந்த குண்டு வெடிப்பில் 100 க்கும் மேற்பட்டோர் கொல்லப்பட்டுள்ளனர். இதனையடுத்து இந்த அமைப்பின் தலைவர் யாசின் பத்கல் பல ஆண்டுகளாக தேடப்பட்டு வந்தான். இந்நிலையில் நேபாள எல்லையில் பத்கல் கைது செய்யப்பட்டுள்ளான். இவனுக்கு லஷ்கர்-இ- தொய்பா அமைப்புடனும் தொடர்பு இருந்துள்ளது.

இவனை தேசிய புலனாய்வு படையினர் (என்.ஐ.ஏ. ) கைது செய்துள்ளதாக கூறப்பட்டாலும் , மத்திய உள்துறை அமைச்சகம் இன்னும் சில நிமிடங்களில் அதிகாரப்பூர்வமாக அறிவிக்கும் என எதிர்பார்க்கப்படுகிறது.

தினமலர்

தீவிரவாதத்தை வேரோடு அழிக்க வேண்டும்