தன் காயம் காக்க வெங்காயம் சேர்க்க வேண்டும் - பழமொழி விளக்கம்

**சிவா** · **சிவா** Wed Apr 17, 2013 2:41 am

உடல் நலத்தைச் சீராக வைத்துக் கொள்ள வேண்டும் என்பதை வலியுறுத்துவதாக இந்தப் பழமொழி அமைகிறது. சிலர் பேசும் பொழுது, அவன் கிடக்கிறான் வெங்காயம் என்று சொல்வார்கள். அதாவது உரிக்க, உரிக்க உள்ளே ஒன்றும் இருக்காது. இதே போல எந்த விபரமும் தெரியாவிட்டால், ஒருவனுக்கு எந்த விஷயமும் தெரியாவிட்டால், ஒருவனிடம் எந்த சரக்கும் இல்லாவிட்டால் அவனை வெங்காயம் என்று வர்ணிப்பது வழக்கம்.

ஆனால் வெங்காயம் மிகுந்த மருத்துவ குணம் வாய்ந்தது. நமது ஆரோக்கியத்தைச் சீராக வைத்துக் கொள்ளும் உணவுப் பொருட்களில் வெங்காயமும் உண்டு. எந்தக் காய்கறிகளுக்கும் இல்லாத தனித்தன்மை வெங்காயத்திற்கு உண்டு. மற்ற காய்கறிகளை தொட்டு நறுக்கினாலோ, உரித்தாலோ, நமது கண்களில் கண்ணீர் வருவதில்லை. ஆனால் வெங்காயத்தை மட்டும் ஒருவரிடம் அள்ளிக் கொடுத்து இதை உரித்து வையுங்கள் என்று சொன்னால், அவர் உரிக்கும்போது, கண்களில் இருந்து கண்ணீர் தானாகவே வடியும். நாம் எந்தவிதமான உணர்ச்சிகளுக்கும் ஆட்படாத போதும் அது நம்மை அழ வைத்துவிடும்.

புதிதாக மணம்செய்து கொண்ட பெண் புகுந்த வீட்டிற்குச் செல்லும்போது, மாமனார், மாப்பிள்ளையைப் பார்த்துச் சொல்வார், மாப்பி¢ள்ளை! எனது மகளைக் கண் கலங்காமல் பார்த்துக் கொள்வது உங்கள் பொறுப்பு! என்பார். அதற்கு மாப்பிள்ளை,சரி மாமா! நான் உங்கள் பெண்ணை வெங்காயம் கூட உரிக்கச் சொல்ல மாட்டேன்! என்று கூறுவார். இது போன்ற வசனங்கள் நகைச்சுவை நாடகங்களில் இடம் பெறுவதைப் பார்த்திருப்பீர்கள்.

வெங்காயம் உரிக்கும் பொழுது, கண்ணீர் வடிக்கக் காரணம் அதிலுள்ள வேதிப் பொருள் காற்றோடு கலப்பது தான். இது ஒரு வித எரிச்சலைத் தூண்டிக் கண்ணீரை வரவழைக்கிறது. ஆனால் வெங்காயத்தில் இரும்புச் சத்து, புரதச்சத்து, சுண்ணாம்புச்சத்து, விட்டமின் ஏ, பி, சி ஆகியவைகள் உள்ளன என்று சொல்கிறார்கள். இத்தனை விதமான சத்துக்கள் இருப்பதால் வெங்காயத்தை உணவில் சேர்த்துச் சாப்பிடுவதன் மூலம், உடலுக்குள் குளிர்ச்சி உண்டாகிறது. விரைவில் உணவு ஜீரணம் ஆகிறது. வயிற்றுக் கோளாறுகள் நீங்குகிறது. மூளைக்கு ஆற்றலை வழங்குகிறது. உறக்கமின்மையைப் போக்குகிறது. இத்தனை விதமான செயல்களைச் செய்து நமது உடலை ஆரோக்கியமாக வைத்துக் கொள்ள வழிகாட்டும் வெங்காயத்தை நாம் உணவில் சேர்த்துக் கொண்டால் தான் நம் உடம்பு வளமாக இருக்கும்.

சிவல்புரியார்