முல்லைப் பெரியாறு பிரச்னை தக்காளி விலை அதிரடியாக சரிவு

கோவை:போக்குவரத்து பிரச்னை, வரத்து அதிகரிப்பு காரணமாக கோவை மற்றும் வேலந்தாவளம் மார்க்கெட்டில் தக்காளி விலை நேற்று 60 ரூபாயாக சரிந்தது.கோவை மாவட்டத்தில் சாய்பாபா காலனி, நாச்சிபாளையம், சுந்தராபுரம், கிணத்துக்கடவு மற்றும் உடுமலையில் தக்காளி மார்க்கெட்கள் உள்ளன. இவற்றில் நாச்சிபாளையம், சாய்பாபா காலனி மார்க்கெட்களுக்கு தக்காளி உள்ளிட்ட காய்கறிகள் வரத்து அதிகமாக இருக்கும். இவ்விரு மார்க்கெட்களில் தான் தினசரி விலை நிர்ணயிக்கப்படுகிறது.

இதற்கு அடுத்தபடியாக, தமிழக எல்லையில் உள்ள வேலந்தாவளம் மார்க்கெட்டுக்கு தினசரி தக்காளி வரத்தும், வியாழன் மற்றும் ஞாயிறுகளில் வாழைத்தார் வரத்தும் இருக்கும்.கேரள மாநிலம் மலப்புறம், பெருந்தலமன்னா பகுதி மக்கள் புளிப்புள்ள நாட்டுத் தக்காளியை அதிகம் விரும்புவதால், அங்கிருந்து காய்கறி வியாபாரிகள் அதிகம் வருகின்றனர். இவர்களின் வருகையால் விவசாயிகளுக்கு கூடுதல் விலை கிடைக்கிறது.

வேலந்தாவளம் மார்க்கெட்டில் இருந்து மதுரை, திண்டுக்கல், தஞ்சாவூர் மற்றும் கேரளாவுக்கு தினமும் 20 லோடு தக்காளி அனுப்பப்படுகிறது.மார்க்கெட்டில் கடந்த வாரம் 14 கிலோ எடை கொண்ட ஒரு பெட்டி தக்காளி 80 ரூபாய்க்கு விற்றது. நேற்று முன்தினம் திடீரென 130 ரூபாய் என உயர்ந்தது. இதனால், தக்காளி சாகுபடியாளர்கள் நிம்மதி அடைந்தனர். வரத்தும் அதிகரித்தது. இந்நிலையில் திடீரென நேற்று தக்காளி விலை, 60 ரூபாயாக சரிந்தது.

முல்லைப் பெரியாறு பிரச்னையால் போக்குவரத்துக்கு ஆங்காங்கே தடைவிதிப்பும், எப்போதும் இல்லாத அளவுக்கு வரத்து அதிகரிப்பும், தக்காளி விலை சரிவுக்கு காரணம் என, மார்க்கெட் வியாபாரிகள் தெரிவித்தனர். நேற்று வாழைத்தார் வரத்து அதிகம் காணப்பட்டது. ஒரு கிலோ நேந்திரன் வாழைக்காய் 18 ரூபாய்க்கு விற்பனையானது. இதே விலை நிலவரம் கோவை காய்கறி மொத்த மார்க்கெட்டிலும் நீடித்தது.

நடக்கட்டும் நடக்கட்டும்