சாம்பியன்ஸ் டிராபி கிரிக்கெட் இன்று துவக்கம் *இலங்கையை வீழ்த்துமா தென் ஆப்ரிக்கா

கிரிக்கெட் ரசிகர்கள் ஆவலுடன் எதிர்பார்த்த சாம்பியன்ஸ் டிராபி கிரிக்கெட் தொடர் இன்று துவங்குகிறது. முதல் போட்டியில் தென் ஆப்ரிக்க அணி, இலங்கையை எதிர்கொள்கிறது.
ஆறாவது சாம்பியன்ஸ் டிராபி ஒரு நாள் கிரிக்கெட் தொடர் தென் ஆப்ரிக்காவில் இன்று துவங்குகிறது. மொத்தம் எட்டு அணிகள் பங்கேற்கும் இத்தொடரின் இன்றைய முதல் போட்டியில் தென் ஆப்ரிக்கா, இலங்கை அணிகள் மோதுகின்றன.
தென் ஆப்ரிக்கா உறுதி:
சர்வதேச கிரிக்கெட் கவுன்சிலின் (ஐ.சி.சி.,) ஒரு நாள் ரேங்கிங் பட்டியலில் நீண்ட நாட்களாக முதலிடத்தில்
ஆதிக்கம் செலுத்தி வந்த ஆஸ்திரேலிய அணியை பின்னுக்குத் தள்ளியது தென் ஆப்ரிக்கா. தற்போது ஒரு நாள் போட்டிகளில் சூப்பர் பார்மில் இருக்கும் தென் ஆப்ரிக்கா அணி, இந்த முறை சாம்பியன்ஸ் கோப்பை வெல்வதில்
உறுதியாக உள்ளது.
கிப்ஸ் இல்லை:
தென் ஆப்ரிக்காவின் பேட்டிங் வரிசை எதிரணியை மிரட்டுகிறது. கேப்டன் ஸ்மித், காலிஸ், டுமினி, ஆம்லா,
பவுச்சர் ரன் குவிக்க காத்திருக்கின்றனர். பயிற்சி போட்டியின் போது விலா எலும்பில் காயமடைந்த கிப்ஸ் இன்றைய போட்டியில் பங்கேற்காதது சற்று பின்னடைவு தான். பவுலிங்கில் ஸ்டைன், நிடினி, பார்னெல் அசத்த உள்ளனர். பேட்டிங், பவுலிங்கில் வலுவான நிலையில் உள்ள தென் ஆப்ரிக்க அணி, சாம்பியன்ஸ் டிராபி தொடரை வெற்றியுடன் துவக்க காத்திருக்கிறது.
11 ஆண்டுகளுக்குப் பின்:
கடந்த 1998 ம் ஆண்டு நடந்த முதல் சாம்பியன்ஸ் டிராபி தொடரில் தென் ஆப்ரிக்கா கோப்பை வென்று அசத்தியது.
அதற்குப் பின் இத்தொடரில் சாதிக்க வில்லை. தற்போது 11 ஆண்டுகளுக்குப் பின் கோப்பை வெல்லும் முனைப்பில் உள்ளது. சொந்த மண், தென் ஆப்ரிக்காவுக்கு இதுவரை சாதகமாக அமைந்தது இல்லை என்பது துரதிருஷ்டம் தான். இதற்கு முன் சொந்த மண்ணில் 2003 ல் நடந்த உலககோப்பை (50 ஓவர்), 2007 ல் நடந்த டுவென்டி-20'
உலககோப்பை தொடர்கள் தென் ஆப்ரிக்காவுக்கு ஏமாற்றமே அளித்துள்ளன. இந்த முறை சொந்த மண், தென் ஆப்ரிக்காவுக்கு கைகொடுக்குமா என்பதை பொறுத்திருந்து தான் பார்க்க வேண்டும்.
இலங்கை சவால்:
தென் ஆப்ரிக்காவுக்கு சற்றும் குறைவில்லாத அணியாக களமிறங்குகிறது இலங்கை. தில்ஷன், ஜெயசூர்யாவின் அதிரடியும், முரளிதரன், மெண்டிஸ் சுழலும் கைகொடுக்கும் பட்சத்தில், இன்றைய போட்டியில் தென் ஆப்ரிக்காவை
இலங்கை அணி எளிதாக வீழ்த்தலாம். அனுபவ வீரர்களான சங்ககரா, ஜெயவர்தனா நம்பிக்கை அளிக்கின்றனர்.
வலுவான பேட்டிங் வரிசை கொண்ட இலங்கை அணிக்கு, சமரவீரா, கண்டம்பி, கபுகேதரா ஆகியோரை உள்ளடக்கிய மிடில் ஆர்டர் கூடுதல் பலம் அளிக்கிறது. மலிங்கா, குலசேகராவின் வேகப்பந்து வீச்சு, தென் ஆப்ரிக்காவை
மிரட்டும் என்பதில் சந்தேகமில்லை. கடந்த 2002 ம் ஆண்டு சாம்பியன்ஸ் கோப்பையை இந்தியாவுடன் பகிர்ந்து கொண்ட இலங்கை அணி, இந்த முறை சாதிக்கும் நம்பிக்கையுடன் தொடரை எதிர்கொள்கிறது.
இரு அணிகளும்இதுவரை...
* தென் ஆப்ரிக்கா, இலங்கை அணிகள் இதுவரை 45 ஒரு நாள் போட்டிகளில் மோதி உள்ளன. இதில், தென் ஆப்ரிக்கா 22, இலங்கை 21 வெற்றிகளை பதிவு செய்துள்ளன. 2 போட்டிகளுக்கு முடிவு இல்லை.
* சாம்பியன்ஸ் டிராபி போட்டிகளில் இவ்விரு அணிகளும் இரண்டு முறை மட்டும் மோதி உள்ளன. இரண்டு
போட்டியிலும் தென் ஆப்ரிக்காவே வென்று உள்ளது.
* இவ்விரு அணிகள் மோதிய ஒரு நாள் போட்டிகளில், தென் ஆப்ரிக்காவின் அதிக பட்ச ஸ்கோர் 317 (2002, செஞ்சரியன்). குறைந்த பட்ச ஸ்கோர் 154 (1993, கொழும்பு).
* இலங்கை அணியின் அதிக பட்ச ஸ்கோர் 308 (2004, கொழும்பு). குறைந்த பட்ச ஸ்கோர் 98 (1993, கொழும்பு).