நடிகர் விஜய் வீடு மீது கல்வீச்சு

**சிவா** · **சிவா** Wed Apr 20, 2011 2:00 pm

நடிகர் விஜய் வீடு மீது மர்ம ஆசாமிகள் கல்வீசி தாக்குதல் நடத்தினார்கள். அதில், அவருடைய படுக்கை அறை ஜன்னல் கண்ணாடி உடைந்தது.

விஜய் வீடு

சென்னை சாலிகிராமம் ஸ்டேட் பாங்க் காலனியில், விஜய்யின் பூர்வீக வீடு உள்ளது. திருமணத்துக்கு முன்பு விஜய் இந்த வீட்டில்தான் வசித்து வந்தார். அவருடன் தந்தை டைரக்டர் எஸ்.ஏ.சந்திரசேகரன், தாயார் ஷோபா சந்திரசேகரன் ஆகியோரும் வசித்து வந்தார்கள்.

கடந்த சில வருடங்களுக்கு முன்பு விஜய் நீலாங்கரையில் உள்ள கபாலீஸ்வரர் நகரில் புது வீடு கட்டி குடிபோய்விட்டார். சாலிகிராமத்தில் உள்ள வீட்டை இசையமைப்பாளர் விஜய் ஆன்டனிக்கு வாடகைக்கு விட்டு இருந்தார்கள்.

கல்வீச்சு

அந்த வீட்டில், நேற்று முன்தினம் நள்ளிரவு 12-30 மணி அளவில் மர்ம ஆசாமிகள் கல்வீசி தாக்குதல் நடத்தினார்கள். இந்த கல்வீச்சில் விஜய் வசித்து வந்த படுக்கை அறை ஜன்னல் கண்ணாடி உடைந்தது.

அதிர்ச்சி அடைந்த இசையமைப்பாளர் விஜய் ஆன்டனி வெளியில் வந்து பார்த்தார். அதற்குள் கல்வீசிய மர்ம ஆசாமிகள் தப்பி ஓடிவிட்டார்கள். இதுபற்றி விஜய் ஆன்டனி விருகம்பாக்கம் போலீசில் புகார் செய்தார். அதன்பேரில் போலீசார் விசாரணை நடத்தி வருகிறார்கள்.

எஸ்.ஏ.சந்திரசேகரன் பேட்டி

இந்த கல்வீச்சு சம்பவம் பற்றி டைரக்டர் எஸ்.ஏ.சந்திரசேகரன் கூறியதாவது:-

``நடந்து முடிந்த சட்டசபை தேர்தலில், விஜய்யின் மக்கள் இயக்கம் அ.தி.மு.க.வுக்கு ஆதரவு அளித்தது. மக்கள் இயக்கம் சார்பில் நான் தமிழ்நாடு முழுவதும் அ.தி.மு.க.வுக்கு ஆதரவாக 10 நாட்கள் பிரசாரம் செய்தேன்.

என்னையும், விஜய்யையும் மிரட்டுவதற்காக யாரோ கல்வீசி இருக்கிறார்கள். கல்வீசியவர்களை விரைவில் கைது செய்து விடுவோம் என்று போலீசார் கூறியிருக்கிறார்கள்.''

இவ்வாறு எஸ்.ஏ.சந்திரசேகரன் கூறினார்.

தினதந்தி