மக்கள் மீது குண்டுகளை வீசும் லிபியா போர் விமானங்களை சுட்டு வீழ்த்துவோம்: இங்கிலாந்து

மக்கள் மீது குண்டுகளை வீசும் லிபியா போர் விமானங்களை சுட்டு வீழ்த்துவோம்: இங்கிலாந்து பிரதமர் அறிவிப்பு

லிபியா நாட்டில் அதிபர் கடாபிக்கு எதிராக போராடும் மக்கள் மீது குண்டு வீசும் ராணுவ விமானங்களை சுட்டு வீழ்த்துவோம் என்று இங்கிலாந்து பிரதமர் கேமரூன் அறிவித்து இருக்கிறார். அதோடு அமெரிக்க போர்க்கப்பல்களும், ராணுவ விமானங்களும் லிபியாவை நோக்கி விரைகின்றன.

உள்நாட்டு போர்

லிபியா நாட்டில் சர்வாதிகாரியான கடாபிக்கு எதிராக மக்கள் போராட்டம் நடத்தி வருகிறார்கள். கடாபிக்கு விசுவாசமான ராணுவமும், அவரது ஆதரவாளர்களும் போராட்டம் நடத்தும் மக்கள் மீது தாக்குதல் நடத்தி வருகிறார்கள். போராட்டக்காரர்கள் மீது ராணுவ விமானங்கள் குண்டுகளை வீசி வருகின்றன. அந்த நாட்டில் அரசு தரப்புக்கும், போராட்டம் நடத்தும் மக்களுக்கும் இடையே உள்நாட்டுப்போர் ஏற்படும் சூழ்நிலை ஏற்பட்டு உள்ளது.

உள்நாட்டுப்போர் ஏற்பட்டால், லிபியா மக்களுக்கு ஆதரவாக அமெரிக்க ராணுவமும், இங்கிலாந்து ராணுவமும் இருக்கும் என்று தெரிகிறது.

பாராளுமன்றத்தில் கேமரூன் பேச்சு

இதுதொடர்பாக இங்கிலாந்து பிரதமர் கேமரூன் பாராளுமன்றத்தில் கூறியதாவது:-

லிபியாவில் போராட்டம் நடத்தும் மக்கள் மீது ராணுவம் குண்டுகளை வீசி தாக்கி வருகிறது. தன் சொந்த நாட்டு மக்கள் மீது ரசாயன ஆயுதத்தை கடாபி பயன்படுத்தலாம் என்ற அச்சம் நிலவுகிறது. இந்த நிலையில் தான் லிபியா மீது எடுக்கப்பட வேண்டிய ராணுவ நடவடிக்கைகள் குறித்து இங்கிலாந்தும், அதன் நட்பு நாடுகளும் பரிசீலித்து வருகின்றன.

சுட்டு வீழ்த்துவோம்

மக்கள் மீது விமானத்தில் இருந்து குண்டு வீசுவதை தடுப்பதற்காக விமானம் பறக்க கூடாத பகுதியாக லிபியா அறிவிக்கப்பட இருக்கிறது. இதுகுறித்து இங்கிலாந்தும், அதன் நட்பு நாடுகளும் பரிசீலித்து வருகின்றன. போராட்டக்காரர்கள் மீது குண்டுவீசும் விமானங்களை சுட்டு வீழ்த்தவும் பரிசீலனை நடத்தப்பட்டு வருகிறது.

ஆயுத உதவி

லிபியாவில் கடாபியை எதிர்த்து போராடிவரும் மக்களுக்கு ஆயுதங்களை கொடுத்து உதவுவது தொடர்பாகவும், அமெரிக்காவுடன் ஆலோசனை நடத்தி வருகிறோம். கடாபி மீது ராணுவ நடவடிக்கை எடுக்கப்படும்.

இவ்வாறு கேமரூன் கூறினார்.

அமெரிக்க போர்க்கப்பல்கள் விரைகின்றன

லிபியா மீது ராணுவ நடவடிக்கை எடுப்பது தொடர்பாக திட்டங்களை வகுக்கும்படி இங்கிலாந்து முப்படை தளபதி ஜெனரல் சர் டேவிட் ரிச்சர்ட்ஸ் கேட்டுக்கொள்ளப்பட்டு இருக்கிறார்.

இதற்கிடையில் அமெரிக்கா போர் விமானங்களையும், ராணுவ கப்பல்களையும் லிபியாவை நோக்கி அனுப்பி உள்ளது. போர்க்கப்பல்களில் 700-க்கும் மேற்பட்ட அமெரிக்க ராணுவ வீரர்கள் அனுப்பப்பட்டு உள்ளனர்.

கடாபி பேட்டி

இதற்கிடையில் லிபியா அதிபர் கடாபி பிபிசி ரேடியோவுக்கும், அமெரிக்காவின் ஏ.பி.சி சேனலுக்கும் பேட்டி அளித்தார். அப்போது அவர் கூறியதாவது:-

தன் நாட்டு மக்கள் அனைவரும் என்னை நேசிக்கிறார்கள் என்றும், என்னை காப்பாற்றுவதற்காக உயிரையும் கொடுப்பார்கள்.

எனக்கு எதிராக லிபியா நாட்டு தெருக்களில் போராட்டம் எதுவும் நடக்கவில்லை. மேற்கத்திய நாடுகள் தான் லிபியாவை கைவிட்டு விட்டன. அவை லிபியாவை ஆக்கிரமிக்க முயற்சி செய்கின்றன.

நான் பதவி விலக மாட்டேன். ஏனெனில் நான் எந்த பதவியிலும் இல்லை. நான் ஜனாதிபதியோ அல்லது மன்னரோ இல்லை. நான் வகிக்கும் பதவி கவுரவப்பதவி தான். அதிகாரத்தை செலுத்த என்னிடம் எந்த அதிகாரமும் கிடையாது.

இங்கிலாந்தில் அதிகாரம் யாரிடம் இருக்கிறது?. ராணி எலிசபெத்திடமா? கேமரூனிடமா? வெளிநாட்டுக்காரர்களுக்கு லிபியாவின் அரசியல் நடைமுறை புரியவில்லை. லிபியாவில் அதிகாரம் ஏற்கனவே மக்களிடம் தான் இருக்கின்றன.

இவ்வாறு கடாபி கூறினார்.