கறுப்பு பணம் பதுக்கியவர்கள் பட்டியல் வெளியாகுமா? மத்திய அரசுக்கு சுப்ரீம் கோர்ட் கேள்வி

புதுடில்லி : அன்னிய நாட்டு வங்கிகளில் கறுப்புப் பணத்தை குவித்து பதுக்கியுள்ள இந்தியர்களின் பெயர்களையும், அதுதொடர்பான தகவல்களையும் வெளியிட மத்திய அரசு மறுப்பது ஏன், அது வெளியாகுமா என, சுப்ரீம் கோர்ட் கேள்வி எழுப்பியுள்ளது.

சுவிட்சர்லாந்து உட்பட சில அன்னிய நாட்டு வங்கிகளில் இந்தியர்கள் பலர், தாங்கள் முறைகேடான வகையில் சேர்த்த பணத்தை டிபாசிட் செய்துள்ளதாகவும், அந்த கறுப்புப் பணம் பல ஆயிரம் கோடி ரூபாய் இருக்கும் என்றும் கடந்த லோக்சபா தேர்தலின் போது செய்திகள் வெளியாகின. "தங்கள் கட்சி ஆட்சிக்கு வந்தால், வெளிநாட்டு வங்கிகளில் இந்தியர்கள் குவித்துள்ள கறுப்புப் பணத்தை மீட்டுக் கொண்டுவர நடவடிக்கை எடுக்கப்படும்' என, பாரதிய ஜனதா கட்சியும் அறிவித்தது. இதையடுத்து, வெளிநாட்டு வங்கிகளில் டிபாசிட் செய்யப்பட்டுள்ள அந்தக் கறுப்புப் பணத்தை மீட்டுக் கொண்டுவர நடவடிக்கை எடுக்கும்படி, மத்திய அரசுக்கு உத்தரவிடக்கோரி, முன்னாள் மத்திய அமைச்சரும், பிரபல வக்கீலுமான ராம்ஜெத் மலானி உட்பட பலர், சுப்ரீம் கோர்ட்டில் மனு தாக்கல் செய்தனர். இதுதொடர்பாக விசாரணை நடத்திய அமலாக்கத் துறையினர், சுப்ரீம் கோர்ட்டில் அறிக்கை ஒன்றை தாக்கல் செய்தனர். அந்த அறிக்கையில் கையெழுத்தில்லாததால், கடந்த நவ.30ல் இந்த வழக்கு விசாரணைக்கு வந்த போது, சுப்ரீம் கோர்ட் கண்டனம் தெரிவித்து அறிக்கையை சம்பந்தப்பட்ட துறையினருக்கு திருப்பி அனுப்ப உத்தரவிட்டது.

இந்நிலையில், இந்த வழக்கு சுப்ரீம் கோர்ட்டில் நேற்று நீதிபதிகள் சுதர்சன ரெட்டி மற்றும் எஸ்.எஸ். நிஜார் பெஞ்ச் முன் மீண்டும் விசாரணைக்கு வந்தது. அப்போது மத்திய அரசு சார்பில் ஆஜரான சொலிசிட்டர் ஜெனரல் கோபால் சுப்பிரமணியம், ""ஜெர்மன் நாட்டு வங்கிகளில் பணம் டிபாசிட் செய்துள்ள இந்தியர்கள் பற்றிய விவரங்களை அந்நாட்டு அரசு தெரிவித்துள்ளது,'' என்றார். ராம்ஜெத் மலானி சார்பாக ஆஜரான சீனியர் வக்கீல் அனில் திவான், ""அன்னிய நாட்டு வங்கிகளில் கறுப்புப் பணத்தை குவித்து வைத்துள்ள இந்தியர்கள் விவகாரத்தில் மத்திய அரசு அதிக அக்கறை காட்டவில்லை,'' என்றார்.

வழக்கை விசாரித்த நீதிபதிகள் சுதர்சன ரெட்டி மற்றும் எஸ்.எஸ். நிஜார் அடங்கிய பெஞ்ச் அளித்த தீர்ப்பு விபரம் வருமாறு: அன்னிய நாட்டு வங்கிகளில் கறுப்புப் பணத்தை டிபாசிட் செய்துள்ள இந்தியர்களின் பெயர்களை வெளியிட மத்திய அரசு மறுப்பது ஏன்? அந்தத் தகவல்களை வெளியிடுவதில், அரசுக்கு என்ன பிரச்னை உள்ளது. "சில தகவல்களை வெளியிட முடியாது. அப்படி வெளியிடாமல் இருப்பதற்கு மத்திய அரசுக்கு உரிமையுள்ளது' என, மனுவில் தெரிவிக்கப்பட்டுள்ளது. அப்படி என்ன சிறப்பு உரிமை உங்களுக்கு உள்ளது. அன்னிய நாட்டு வங்கிகளில் பணம் குவித்துள்ள இந்தப் பிரச்னை மிகவும் மோசமானது. வரி ஏய்ப்பு என்ற அளவில் மட்டும் எடுத்துக் கொள்ள முடியாது.

அன்னிய நாட்டு வங்கிகளில் பணம் குவித்துள்ளது தொடர்பாக, புனேயைச் சேர்ந்த வர்த்தகர் ஹசன் அலி கானிடம் அமலாக்கத் துறையிடம் விசாரணை நடத்தியுள்ளனர். அவரையும் இந்த வழக்கில் சேர்த்துக் கொள்ளலாம் அல்லவா. அதே போல், பணம் குவித்துள்ள மற்றவர்களின் பெயர்கள் எங்களுக்கு கிடைத்தால், அவர்களையும் இந்த வழக்கில் சேர்த்துக் கொள்ள முடியும். அவர்களும் கோர்ட்டிற்கு வரட்டும். இவ்வாறு நீதிபதிகள் தங்கள் உத்தரவில் கூறினர்.

இதற்கு பதில் அளித்த சொலிசிட்டர் ஜெனரல் கோபால் சுப்பிரமணியம், ""எந்த ஒரு தனி நபர் குறித்த விசாரணை அறிக்கையையும் கோர்ட்டில் தாக்கல் செய்ய மத்திய அரசு தயார். அதில் எந்த சிரமமும் இல்லை. அதே நேரத்தில், வெளிநாடுகளில் கறுப்புப் பணத்தை டிபாசிட் செய்துள்ள இந்தியர்கள் அனைவரின் பட்டியலையும் கோர்ட்டில் சமர்ப்பிக்கும் விவகாரத்தில், அரசு என்ன சொல்கிறதோ அதைத்தான் செய்ய முடியும். அரசின் நிலை என்ன என்பதை கேட்டுத் தெரிவிக்கிறேன்,'' என்றார்.

தினமலர்

இதில் பல அரசியல் முதலைகள் சிக்குவார்கள்... இந்த விஷயத்தில் மட்டும் அனைத்து கட்சியுமே அமௌனம் சாதிப்பதும் குறிப்பிடத்தக்கது.

சாமான்யனாய் இருந்தால் இந்நேரம் அவன் குரல்வளையை நெறித்திருக்கும் அரசாங்கம்.