இளைஞர் காமன்வெல்த்: இந்தியா ஆதிக்கம்

புனே: இளைஞர் காமன் வெல்த் போட்டியில் இந்தியாவின் ஆதிக்கம் தொடர் கிறது. நேற்று துப்பாக்கி சுடுதலில் அசத்திய நம்மவர்கள் ஒரே நாளில் ஐந்து பதக்கம் வென்றனர். புனேவில் 3வது இளைஞர் காமன்வெல்த் போட்டி நடக்கிறது. நேற்று நடந்த பெண்களுக்கான துப்பாக்கி சுடுதல் 10 மீ., ஏர் பிஸ்டல் போட்டியில் இந்தியாவின் தீபிகா படேல் 470.2 புள்ளிகள் எடுத்து தங்கம் கைப்பற்றினார். சிங்கப்பூரின் மெய் கெய் வெள்ளியையும், மலேசியாவின் பிந்தே வாகிடா வெண்கலத்தையும் வென்றனர். ஆண்களுக்கான "டபுள் டிராப்' துப்பாக்கி சுடுதலில் இந்தியாவின் நோரியா குஸ்டி 180 புள்ளிகள் பெற்று தங்கம் வென்றார். ஸ்போர்ட்ஸ் பிஸ்டல் பிரிவில் இந்திய வீரர் பன்சால் லக்சயா தங்கம் வென்றார்.



மல்யுத்தம் அசத்தல்: நேற்று நடந்த ஆண்களுக் கான 50 கி.கி., பிரிவு மல்யுத்தப் போட்டியில் இந்தியாவின் அமித் குமார் 14-3 என்ற புள்ளி கணக்கில் கனடாவின் ஸ்டீவன் தகஹசியை வென்று, தங்கம் கைப்பற்றினார். 54 கி.கி., பிரிவில் இந்தியாவின் ஜிதேந்திர ஹரிபிரசாத் 9-0 என்ற புள்ளி கணக்கில் நமீபியாவின் ஷிலிமேலா நடாலேவை வீழ்த்தி, தங்கம் வென்றார். பெண்களுக்கான 58 கி.கி., பளுதூக்குதல் போட்டியில் இந்தியாவின் யாமினி 178 கி.கி., தூக்கி தங்கம் வென்றார்.



பதக்கப்பட்டியலில் இந்தியா 14 தங்கம், 7 வெள்ளி, 7 வெண்கலம் உட்பட 28 பதக்கம் வென்று முதலிடத்தில் இருக்கிறது. ஆஸ்திரேலியா 2வது (9 தங்கம், 4 வெள்ளி, 9 வெண்கலம்), இங்கிலாந்து 3வது (7 தங்கம், 4 வெள்ளி, 4 வெண்கலம்) இடம் பிடித்துள்ளது.



அரையிறுதியில் செய்னா: நேற்று நடந்த பெண்கள் பாட்மின்டன் காலிறுதியில் இந்தியாவின் செய்னா நேவல் 21-13, 21-9 என்ற செட் கணக்கில் மலேசியாவின் சின் எர்னை எளிதாக வீழ்த்தி, அரையிறுதிக்கு தகுதிபெற்றார். மற்றொரு காலிறுதியில் இந்தியாவின் ரெட்டி சிக்கி 21-14, 22-20 என நியூசிலாந்தின் ஜெசிகா விசாஸ்ட்ரோவை வென்றார்.