பொய் வழக்கு: ஆய்வாளர், தலைமைக் காவலர் கைது

தூத்துக்குடி,

கேரளத்தைச் சேர்ந்த 3 பேர் மீது பொய் வழக்கு பதிவு செய்ததாக போதைப்
பொருள் தடுப்பு நுண்ணறிவு புலனாய்வுப் பிரிவு ஆய்வாளர் மற்றும் தலைமைக்
காவலரை சிபிசிஐடி போலீஸôர் வெள்ளிக்கிழமை கைது செய்தனர். கேரள
மாநிலம், கொல்லம் மாவட்டத்தைச் சேர்ந்த அனுமோகன், ஆஜய்குமார் மற்றும்
அருண் ஆகிய 3 பேரை, தூத்துக்குடி போதைப் பொருள் தடுப்பு நுண்ணறிவு
புலனாய்வுப் பிரிவு போலீஸôர் கடந்த 10.2.2006-ல் கைது செய்தனர். இவர்கள்
3 பேரும் 24 கிலோ கஞ்சாவை கடத்தியதாக, தூத்துக்குடி- திருநெல்வேலி
புறவழிச்சாலையில் போதைப் பொருள் தடுப்பு நுண்ணறிவு புலனாய்வுப் பிரிவு
உதவி ஆய்வாளர் எஸ். ராஜமாணிக்கம் தலைமையிலான போலீஸôர் கைது செய்ததாக
வழக்குப் பதிவு செய்யப்பட்டது. உதவி ஆய்வாளர் எஸ். ராஜமாணிக்கம்
போதைப் பொருள் தடுப்பு நுண்ணறிவு புலனாய்வுப் பிரிவின் கன்னியாகுமரி
மாவட்ட அலுவலகத்தில் பணியாற்றி வந்தார். தூத்துக்குடியில் உதவி ஆய்வாளர் இல்லாததால் சம்பவம் நடந்த போது தூத்துக்குடி மாவட்ட பொறுப்பையும் சேர்த்து கவனித்தார். இந்த
வழக்கை அப்போது போதைப் பொருள் தடுப்பு நுண்ணறி புலனாய்வுப் பிரிவு
ஆய்வாளராக இருந்த எஸ். காந்தி பதிவு செய்தார். இந்த வழக்கு தொடர்பாக கைது
செய்யப்பட்ட 3 பேரும் நீதிமன்றத்தில் ஆஜர்படுத்தப்பட்டு காவலில்
வைக்கப்பட்டனர். இந் நிலையில் கைது செய்யப்பட்டவர்களில் அனுமோகன்,
தங்கள் மீது போடப்பட்டுள்ளது பொய் வழக்கு எனக் கூறி மதுரை உயர்நீதிமன்ற
கிளையில் வழக்குத் தொடர்ந்தார். இந்த வழக்கை விசாரித்த மதுரை உயர்நீதிமன்ற கிளை இந்த வழக்கை சிபிசிஐடி போலீஸôருக்கு மாற்றி 24.8.2006-ல் உத்தரவிட்டது. அதன்பேரில், சிபிசிஐடி போலீஸôர் விசாரணை நடத்தியதில் இந்த வழக்கு பொய் வழக்கு என நிரூபணமானது. இதையடுத்து
போதைப் பொருள் தடுப்பு நுண்ணறிவு புலனாய்வுப் பிரிவு ஆய்வாளர் காந்தி,
உதவி ஆய்வாளர் ராஜமாணிக்கம், தலைமைக் காவலர் ஸ்டீபன் லூயிஸ் செல்வராஜ்
உள்பட 4 பேர் மீது சிபிசிஐடி போலீஸôர் வழக்குப் பதிந்தனர். இதை தொடர்ந்து
4 பேரும் தாற்காலிகப் பணிநீக்கம் செய்யப்பட்டனர். இந்த நிலையில்,
இந்த வழக்குத் தொடர்பாக ஆய்வாளர் எஸ். காந்தி (48), தலைமைக் காவலர்
ஸ்டீபன் லூயிஸ் செல்வராஜ் (49) ஆகிய இருவரையும், சிபிசிஐடி திருச்சி
டிஎஸ்பி பரமேஸ்வரன், தூத்துக்குடி ஆய்வாளர் ராஜ்குமார் ஆகியோர் தலைமையிலான
போலீஸôர் வெள்ளிக்கிழமை கைது செய்தனர். பின்னர் அவர்கள் இருவரும் கோவில்பட்டி நீதித்துறை நடுவர் மன்றத்தில் ஆஜர்படுத்தப்பட்டு காவலில் வைக்கப்பட்டனர். இந்த வழக்கு தொடர்பாக தொடர்ந்து தீவிர விசாரணை நடைபெற்று வருவதாக சிபிசிஐடி போலீஸôர் தெரிவித்தனர்.