தமிழகத்தில் சிறு தொழில்கள் முதலீடு ரூ. 26,136 கோடியாக உயர்வு: அமைச்சர் பொங்கலூர் நா. பழனிச்சாமி

தூத்துக்குடி,

தமிழகத்தில் குறு, சிறு மற்றும் நடுத்தர தொழில் நிறுவன முதலீடு
ரூ.26,136 கோடியாக உயர்ந்துள்ளது என, தமிழக ஊரக தொழில்துறை அமைச்சர்
பொங்கலூர் நா. பழனிச்சாமி வெள்ளிக்கிழமை தெரிவித்தார். தூத்துக்குடி மாவட்ட சிறுதொழில் சங்கம் சார்பில் 3 நாள்கள் தொழில் கண்காட்சி தொடக்க விழா நடைபெற்றது. இந்த கண்காட்சியைத் தொடங்கி வைத்து அமைச்சர் மேலும் பேசியதாவது: தொழில்
வளர்ச்சிக்கு ஏற்ற மாவட்டமாக தூத்துக்குடி விளங்குகிறது. துறைமுகம், விமான
நிலையம், ரயில் வசதி மற்றும் சாலை வசதி போன்ற அனைத்து வசதிகளும்
இம்மாவட்டத்தில் அமைந்துள்ளது. அடுத்த 25 ஆண்டுகளில் சென்னையை போல
தூத்துக்குடி வளர்ச்சி அடையும். தொழில் வளர்ச்சியில் தமிழகம் இந்தியாவில் முதல் மாநிலமாக இருந்து வந்தது. ஆனால், முந்தைய ஆட்சியில் 15-வது இடத்திற்கு தள்ளப்பட்டது. நாட்டிலேயே முதன் முறையாக சிறு தொழில்களுக்கு என தனியாகத் தொழில் கொள்கை 2008-ம் ஆண்டில் வெளியிடப்பட்டது. மேலும்,
தொழில் வளர்ச்சிக்கு பல்வேறு சலுகைகள் அளிக்கப்பட்டு வருகின்றன. இதன்
மூலம் ரூ. 10 ஆயிரம் கோடி அளவுக்கு பல்வேறு தொழிற்சாலைகள் அமைக்க
புரிந்துணர்வு ஒப்பந்தங்கள் போடப்பட்டு பணிகள் நடைபெற்று வருகின்றன.இதன் மூலம் தொழில்வளர்ச்சியில் தமிழகம் 3-வது இடத்திற்கு முன்னேறியுள்ளது. மேலும், முதலிடத்தை நோக்கி வேகமாக முன்னேறி வருகிறது.
தமிழகத்தில் குறு, சிறு மற்றும் நடுத்தர தொழில் நிறுவன முதலீடு கடந்த
2005-2006-ம் ஆண்டில் ரூ. 16 ஆயிரம் கோடியாக இருந்தது. இது 2009-2010-ம்
ஆண்டில் 26.36 கோடியாக உயர்ந்துள்ளது. இது 62 சதவிகித வளர்ச்சி ஆகும்.
ஆண்டு வளர்ச்சி 15.5 சதவிகிதம் ஆகும். இந்தியாவில் பதிவு பெற்ற
குறு, சிறு மற்றும் நடுத்தர தொழில் நிறுவனங்கள் 2.85 கோடி. தமிழகத்தில்
6.31 லட்சம் நிறுவனங்கள் பதிவு செய்துள்ளன. தூத்துக்குடி
மாவட்டத்தில் மட்டும் 9,062 நிறுவனங்கள் பதிவு செய்துள்ளன. இந்த
நிறுவனங்கள் மூலம் நாட்டில் 6.59 கோடி பேர் வேலைவாய்ப்பு பெற்றுள்ளனர்.
தமிழ்நாட்டில் 74 லட்சம் பேரும், தூத்துக்குடி மாவட்டத்தில் 63,434 பேரும்
வேலைவாய்ப்பு பெற்றுள்ளனர். முதலீட்டு மதிப்பை பொறுத்தவரை
இந்தியாவில் குறு, சிறு மற்றும் நடுத்தர தொழில் நிறுவனங்கள் மூலம் ரூ.
6,21,753 கோடி முதலீடு செய்யப்பட்டுள்ளது. தமிழகத்தை பொறுத்தவரை ரூ.
26,136 கோடியும், தூத்துக்குடி மாவட்டத்தை பொறுத்தவரை ரூ. 876.77 கோடியும்
முதலீடு செய்யப்பட்டுள்ளன. உற்பத்தி பொருள்களின் மதிப்பு
இந்தியாவில் ரூ. 8,80,805 கோடியாகவும், தமிழகத்தில் ரூ. 1,14,000
கோடியாகவும், தூத்துக்குடி மாவட்டத்தில் மட்டும் ரூ. 24,996 கோடியாகவும்
உள்ளது. முந்தைய ஆட்சியில் நலிவடைந்த டான்சி நிறுவனம் தற்போது லாபம் ஈட்டும் நிறுவனமாக மாறியுள்ளது. இந்த ஆண்டில் மட்டும் ரூ. 50 கோடி அளவுக்கு லாபம் கிடைத்துள்ளது.
தகவல் தொழில்நுட்ப தொழிலில் தமிழகம் இந்தியாவில் 3-வது இடத்திற்கு
முன்னேறியுள்ளது. முதலிடத்தில் பெங்களூரு, 2-வது இடத்தில் மகாராஷ்டிரா,
3-வது இடத்தில் ஹைதராபாத் ஆகியவை இருந்தன. இந்த ஆண்டு
ஹைதராபாத்தை பின்னுக்கு தள்ளிவிட்டு தமிழகம் 3-வது இடத்தைப்
பிடித்துள்ளது. இந்த ஆண்டில் மென்பொருள்கள் ரூ. 42 ஆயிரம் கோடிக்கு
உற்பத்தி செய்யப்பட்டுள்ளது என்றார் அமைச்சர். தூத்துக்குடி மாவட்ட
சிறுதொழில் சங்கத் தலைவர் என். ஜெயராயன் தலைமை வகித்தார். சங்க செயலர் கே.
நேருபிரகாஷ் திட்டம் குறித்து விளக்கிப் பேசினார். மாநில சமூக
நலத்துறை அமைச்சர் பெ. கீதா ஜீவன், மாநில தொழில்துறை முதன்மைச் செயலர்
ராஜீவ் ரஞ்சன், மாவட்ட வருவாய் அலுவலர் துரை. ரவிச்சந்திரன், மேயர் இரா.
கஸ்தூரி தங்கம், கோல் அன்ட் ஆயில் குழுமத் தலைவர் அகமது புகாரி, தமிழ்நாடு
சிறுதொழில் சங்கத் தலைவர் டி. காந்திகுமார், தேசிய சிறுதொழில் சம்மேளன
தென்மண்டல துணைத் தலைவர் டி.வி. ஹரிகரன் ஆகியோர் கலந்து கொண்டனர். மத்திய
அரசின் சிறு தொழில் சேவை நிறுவன உதவி இயக்குநர் ஆருண் ரஷித் வரவேற்றார்.
தொழில் கண்காட்சி தலைவர் ஜி. கிரகதுரை நன்றி கூறினார். இந்த கண்காட்சி ஆக.
8-ம் தேதி வரை 3 நாள்கள் நடைபெறுகிறது.