ஆண்கள் மட்டும் பங்கேற்கும் பொங்கல் விழா : பெண்களுக்கு அனுமதியில்லை

ராசிபுரம் : ராசிபுரம் அருகே, மலையாம்பட்டி கிராமத்தில் அமைந்துள்ள
கொங்காலம்மன் கோவிலில் ஆடி பண்டிகையை முன்னிட்டு, ஆண்கள் மட்டும் பொங்கல்
வைத்து, கிடா வெட்டி வழிபாடு செய்யும் வினோத திருவிழா நடந்தது.
இவ்விழாவில் பெண்கள் பங்கேற்பதற்கு அனுமதியில்லை.
நாமக்கல் மாவட்டம், ராசிபுரம் அருகே மலையாம்பட்டி கிராமத்தில்
பிரசித்தி பெற்ற கொங்கலம்மன் கோவில் அமைந்துள்ளது. இக்கோவிலில்
ஆண்டுதோறும், ஆடி மாதம் 18ம் தேதிக்கு முந்தைய ஞாயிற்றுக்கிழமை பொங்கல்
திருவிழா நடக்கும். இரவு நேரத்தில் நடக்கும் இந்த விழாவில், பெண்கள்
யாரும் பங்கேற்க அனுமதிக்கப்படுவதில்லை. ஆண்கள் மட்டும் பங்கேற்று பொங்கல்
வைத்து, கிடா வெட்டி படையல் செய்வது விழாவின் சிறப்பம்சம். இந்தாண்டு
பொங்கல் திருவிழா ஜூலை 23ம் தேதி பூச்சாட்டுதலுடன் துவங்கியது. நாள்தோறும்
பல்வேறு அபிஷேக, ஆராதனைகள் நடந்தது. நேற்று முன்தினம் இரவு, கோவில்
வளாகத்தில் ஆண்கள் ஒன்றுகூடி இரவு 11 மணிக்கு பொங்கல் வைத்து சுவாமிக்கு
படையல் செய்தனர். தொடர்ந்து, பல்வேறு மாவட்டங்களில் இருந்து வந்த ஆண்
பக்தர்கள் 100க்கும் மேற்பட்ட ஆட்டுக்கிடா வெட்டி கோவில் தர்மகர்த்தாவிடம்
ஒப்படைத்தனர். அவற்றை அங்கேயே கறியாக்கி சமையல் செய்து, அதிகாலையில்
அனைவருக்கும் விருந்து வைக்கப்பட்டது. பல்வேறு மாவட்டங்களில் இருந்து,
2,000க்கும் அதிகமான ஆண் பக்தர்கள் விழாவில் பங்கேற்றனர்.
இதுகுறித்து, கோவில் தர்மகர்த்தா செல்வராஜ் கூறியதாவது: கொங்கலம்மன்
கோவிலில், 200 ஆண்டுகளுக்கு மேலாக ஆண்கள் மட்டும் கலந்து கொள்ளும் பொங்கல்
விழா நடந்து வருகிறது. இரவு நேரத்தில் பொங்கல் வைத்து, நேர்த்திக்கடனாக
வெட்டப்படும் ஆட்டுக்கிடாக்களை இரவே சமைத்து படையல் போட்டு விருந்து
பரிமாறப்படும். கறியை வீடுகளுக்கு எடுத்துச் செல்வதில்லை. அம்மன் வழிபாடாக
இருப்பினும், இந்த பொங்கல் விழாவில் பெண்கள் கலந்துக் கொள்ள
அனுமதிப்பதில்லை. இங்கு வரும் பக்தர்கள், வேண்டுதல் நிறைவேறியதற்காக கிடா
வெட்டி நேர்த்திக் கடனை நிறைவேற்றுகின்றனர். ராசிபுரம் அதன் சுற்றுவட்டார
கிராமத்தை சேர்ந்தோர் மட்டுமின்றி சேலம், ஈரோடு, நாமக்கல், சின்னசேலம்
போன்ற இடங்களில் இருந்தும், ஆயிரக்கணக்கான ஆண் பக்தர்கள் விழாவில் கலந்து
கொள்வர். ராசிபுரம் அருகே உள்ள போதைமலைக்கு உட்பட்ட கிடமலையைச்
சேர்ந்தோர், காலங்காலமாக கோவில் பூசாரியாக உள்ளனர். தொன்று தொட்டு,
பெண்களை இவ்விழாவில் அனுமதிக்காத நடைமுறை உள்ளதால், அதை மாற்ற
விரும்பவில்லை. இவ்வாறு அவர் தெரிவித்தார்.