அருட்களஞ்சியம்

விஷ்ணுவே பரம்பொருள் என்று கூறும் வேத வாக்கியத்தின்
ஸாரமாக மஹாபாரதம் சாந்தி பருவத்தில் ஒரு வருணனை
காணப்படுகிறது:
-
உலக மாந்தர் தமது நுண்ணறிவினால் அறிய வேண்டிய,
ஆத்மாவில் ஒன்றியுள்ள பரம்பொருளை அறியாத
நிலையிலேயே உள்ளனர். விஸ்தீரணத்தில் பூமியைவிட
நீர்ப் பரப்பு உயர்ந்தது.

ஒளி, நீரைப் போலல்லாமல் எங்கும் வியாபித்து நீரைவிட
உயர்ந்ததாகிறது. வாயு இல்லாத இடமே இல்லையாதலால்,
ஒளியைவிடக் காற்று உயர்ந்ததாகும்.

இந்தக் காற்றையும் தன்னுள் அடக்கிய எங்கும் நிறைந்த
ஆகாயமோ, காற்றுக்கும் உயர்வாகக் காண்கிறது.
மனமோ ஆகாயத்தைக் கடந்து செல்லக்கூடிய வலிமை
பெற்றிருப்பதால் ஆகாயத்தைக் காட்டிலும் உயர்ந்தது.

மனம் லயிக்கும் விஷயங்களில் உள்ள தத்துவத்தைப்
புரிந்துகொள்ளும் வலிமை அறிவுக்கே ஏற்பட்டுள்ளதால்
மனத்தைக் காட்டிலும் அறிவே சிறந்தது.

காலம் காட்டும் வழியிலேயே அறிவு செல்ல
வேண்டியிருப்பதால் அறிவுக்கும் மேம்பட்டது காலம்.
-
ஆனால், பிரபஞ்சமே தானாகி, மேலே சொல்லப்பட்ட எல்லா
பூதங்களையும் தன்னுள் அடக்கிக் கொண்டிருப்பவனான
ஸ்ரீமந்நாராயணனோ இவை எல்லாவற்றுக்கும் மேம்பட்டவர்.

பகவான் முதல், நடு, முடிவு (ஆதி மத்யாந்தம்) என்ற மூன்று
நிலைகளும் அற்றவர். இந்த மூன்று நிலைகளும்
அற்றவராததலால், இவரது ஸ்தானம் மாற்றப்படவே
முடியாதது. இவர் சகல துக்கங்களும் அண்ட முடியாத
நிலையிலேயே எப்போதும் இருப்பதால் மிக உயர்ந்தவர்
ஆவார்.

துக்கத்துக்கு எல்லையுண்டு. இவருக்கோ எல்லையே இல்லை.
இவரே விஷ்ணு எனப்படுவோர்.
இத்தகைய பெருமைகளைத் தாங்கிய விஷ்ணு உலக
ரக்ஷகனாகத் திகழ்கிறார்.

ஸ்ரீமந்நாராயணனைச் சரணடைந்தோரின் இக வாழ்வில்
ஏற்படும் இன்னல்களிலிருந்து அவர்களை மீட்டுப் பரத்துக்கு
அவர்களைப் பாத்திரமாகச் செய்கிறார்.

இந்த ஸத்திய வாக்கியமே ஸ்ரீமஹாவிஷ்ணுவின் எல்லையற்ற
கருணைக்கும் வைஷ்ணவத்தின் சிறப்புக்கும் ஒரு சான்றாகும்.

மேலும் ஸ்ரீராமாநுஜரது விசிஷ்டாத்வைத சித்தாந்தமும்,
ஸ்ரீமத்வருடைய த்வைத சித்தாந்தமும் இந்த சர்வ
வல்லமையுள்ள மந் நாராயணன், அநேக அம்சங்களாகவும்
அவதாரங்களாகவும் நம்மிடையே உலவி நம்மையாள்கிறான்
என வலியுறுத்துகின்றன.

ஆண்டவன் அன்புக்கும் அசஞ்சலமான (அசையாத) பக்திக்கும்
கட்டுப்பட்டவன், அவ்வித மனப்பான்மையுள்ளோர் என்றும்
அவனைச் சுலபமாக அடைந்துவிடுவர் என்பது உண்மை.
-
-----------------------
(1965 விகடன் தீபாவளி மலரில் இருந்து) ஓவியம்: கோபுலு
நன்றி- விகடன்

விகடன் காப்பிக்கு நன்றி.