போலீஸ் முரட்டுத்தனத்துக்கு எதிராக கண்டனக் கூட்டம்

அரசு சாரா (என்ஜிஓ) 50 அமைப்புகளின் கூட்டணி, போலீசுக்கு எதிராக மாபெரும் கண்டனக் கூட்டம் நடத்தப் போவதாக மிரட்டியுள்ளது.

முரட்டுத்தனமான நடந்துகொள்ளும் அதிகாரிகளுக்கும் காவலில் இருந்தவர்களின் மரணத்துக்குப் பொறுப்பானவர்களுக்கும் எதிராக போலீஸ் நடவடிக்கை எடுக்காததைக் கண்டிப்பதற்காக இக்கூட்டம் ஏற்பாடு செய்யப்படுகிறது.

இந்தக் கண்டனக் கூட்டம், கோலாலம்பூரில் கூட்டரசு போலீஸ் தலைமையகம் அமைந்துள்ள புக்கிட் அமானில் நடத்தப்படும். கூட்டத்துக்கான தேதி, புக்கிட் செலாம்பாப் இடைத்தேர்தலுக்குப் பின்னர் அறிவிக்கப்படும்.
புதன்கிழமை நடத்தப்பட்ட என்ஜியோக்களின் கூட்டத்தில் அந்தக் கண்டனக் கூட்டம் நடத்தப்படுவது அவசியம்தான் என்று ஒப்புக்கொள்ளப்பட்டதாகக் கூட்டணியின் பேச்சாளர் எஸ்.மாணிக்கவாசகம் கூறினார்.

“போலீஸ் காவலில் மேலும் மரணங்கள் நிகழ்வதை நாங்கள் விரும்பவில்லை”, என்று மாணிக்கவாசகம் குறிப்பிட்டார். அவர் போலீஸ் நடவடிக்கைகளைக் கவனிக்கும் போலீஸ் கண்காணிப்பு மற்றும் மனித உரிமைக் குழுவின் உறுப்பினராவார்.

“இங்கு போலீஸ் சிறப்புப் பிரிவு அதிகாரிகள் இருப்பார்கள் என்பது எனக்குத் தெரியும். அவர்கள் இதை மூசா ஹசனிடம் (போலீஸ் இன்ஸ்பெக்டர் ஜெனரல்) தெரிவிக்க வேண்டும் என்று விரும்புகிறேன்”, என்று அவர் கூறினார்.

நேற்று மாணிக்கவாசகம், போலீஸ் காவலில் இருந்த ஏ.குகனின் மரணத்துக்கான காரணங்களை மூடி மறைத்தார் என்று கூறப்படும் மருத்துவருக்கு எதிராக மலேசிய மருத்துவர் மன்ற நடத்திய விசாரணையில் கலந்து கொண்ட பின்னர் செய்தியாளர்களிடம் பேசினார்.

இதனிடையே போலீஸ் கண்காணிப்பு அமைப்பின் ஒருங்கிணைப்பாளர் எஸ்.ஜெயதாஸ், மலேசியாவில் போலீஸ் காவலில் மரணங்கள் என்பது ஒரு “முடிவில்லா கதை” என்றார்.

“குகன் மரணமுற்று இரண்டு மாதங்கள் ஆகின்றன. அதைச் சட்டத்துறைத் தலைவர் கொலை என்று வகைப்படுத்தியும்கூட இதுவரை எவரும் நீதிமன்றம் கொண்டு செல்லப்படவில்லை.”

அமைதி ஆர்ப்பாட்டத்தில் ஈடுபடும் பொதுமக்கள் மீது நடவடிக்கை எடுப்பதில் வேகம் காட்டும் போலீசார், போலீசுக்கு எதிரான புகார்கள்மீது மெதுவாகச் செயல்படுவதை ஜெயதாஸ் சுட்டிக்காட்டினார்.

புக்கிட் செலாம்பாவ் இடைத்தேர்தலின்போது தாமும் மற்றவர்களும், வீடுவீடாகச் சென்று பரப்புரை செய்யவும் போலீசின் கொடூர நடவடிக்கைகள் பற்றிய தகவல்களைப் பரப்பவும் போவதாக மாணிக்கவாசகம் சூளுரைத்தார்.

“இந்தியர்களிடம் போலீசார் நடந்துகொள்ளும் விதத்தை மக்கள் அறியும்படிச் செய்வோம்”, என்றாரவர்.

மலேசியா இன்று