கீதையின் தத்துவம்

**சிவா** · **சிவா** Fri 13 Mar 2009 - 4:25

ஸ்ரீ கிருஷ்ணர் தம் பகவத் கீதையின் மூலம் உலகுக்குச் சொன்ன அருளுரைகள் ஏராளம். ஆன்மீகம் மட்டுமல்லாமல் வாழ்வியல் அறம், மனிதனின் நடத்தை, சமூக நன்னெறிகள் என நமக்கு கீதை தரும் பாடங்கள் நிறைய. மனிதனின் இலட்சியமாகவும், அதற்காக அவன் ஆற்ற வேண்டிய கர்மங்களாகவும் கீதை சொல்லும் தத்துவங்களை அறிந்துணர்வோம்.

* தொழில் செய்யத்தான் மனிதர்களுக்கு அதிகாரம் உண்டு. அதன் பலன்களில் எப்போதுமே மனிதர்களுக்கு அதிகாரம் இல்லை. தொழில் செய்கையில் பலனைக் கருதக்கூடாது. தொழில் செய்யாமலும் இருக்கக் கூடாது.

* மனிதன் சினத்தால், அதாவது கோபத்தால், மயக்கம் அடைகிறான். மயக்கத்தால் நினைவு தவறுகின்றான். நினைவு தவறுதலால் புத்தி நாசம் அடைகின்றான். புத்தி நாசத்தால் அழிகின்றான்.

* கர்மயோகம் என்பது உண்பது, உறங்குவது, இனத்தைப் பெருக்குவது, ஆணவமாக உலவுவது அல்ல. பார்க்கின்ற பொருள் அனைத்திலும் கடவுளையேக் கண்டு, கடவுளுக்குச் சேவை செய்கின்றோம் என்ற எண்ணத்தோடு தன்னலமற்று, பிற உயிர்களுக்கு இயன்ற உதவி செய்து வாழ்வதுதான் கர்ம யோகமாகும்.

* தன்னைத்தான் வென்றவனே, தனக்குத்தான் நண்பன். தன்னைத் தான் வெல்லாதவனே தனக்குத்தான் பகைவன் போல் கேடு சூழ்கின்றான்.

* இறைவன் எல்லா உயிர்களுக்கும் சமமானவன். இறைவனுக்குப் பகைவனும் இல்லை. நண்பனுமில்லை. அதனால் இறைவனைத் தொழு வோர் இதயத்தில் இறைவன் குடிகொண்டிருக்கின்றான்.

* யாரை உலகத்தார் வெறுப்பதில்லையோ, உலகத்தாரை யார் வெறுப்பதில்லையோ, யார் மகிழ்ச்சியாலும், பயத்தாலும், கோபத்தாலும், விளையும் கொதிப்புகளினின்றும் விடுபட்டவரோ, அவரே இறைவனுக்கு இனியவராவார்.

* எந்த எந்த பக்தன் நம்பிக்கையுடன் எந்த எந்த வடிவத்தை வழிபட விரும்புகின்றானோ, அவனுடைய அசையாத நம்பிக்கைக்குத் தக்க வடிவத்தைக் கடவுள் மேற்கொள்கின்றார்.

கீதையின் தத்துவம்

கீதையின் தத்துவம்

மறுமொழி எழுத நீங்கள் உறுப்பினராக இருக்க வேண்டும்..

உறுப்பினராக பதிவு செய்க

உள்நுழைக