லோக்பால் தேர்வுக் குழுவில் காங்கிரஸ்: மத்திய அமைச்சரவை ஒப்புதல்

லோக்பால் தேர்வுக் குழுவில் மக்களவையில் தனிப்பெரும்
எதிர்க்கட்சியின் தலைவரைச் சேர்ப்பதற்கு வழிவகை
செய்யும் வகையில் சட்டத்திருத்தம் மேற்கொள்வதற்கு,
மத்திய அமைச்சரவை புதன்கிழமை ஒப்புதல் அளித்தது.

லோக்பால், லோக் ஆயுக்த சட்டத்தில் மேற்கொள்ளப்பட
உள்ள இந்தத் திருத்தத்தின் மூலம் பிரதமர் தலைமையிலான
லோக்பால் தேர்வுக் குழுவில் மக்களவை காங்கிரஸ் தலைவர்
இடம்பெற முடியும் என்பது குறிப்பிடத்தக்கது.

இதேபோல, மின்துறையில் பல்வேறு சீர்திருத்தங்களை
மேற்கொள்ளும் வகையில், 2003ஆம் ஆண்டின் மின்சாரச்
சட்டத்தில் திருத்தம் செய்யவும் அமைச்சரவை ஒப்புதல் அளித்தது.

தமிழ்நாட்டின் தன்னம்பட்டியில் ரூ.1,593 கோடி செலவில்
மாநிலங்களுக்கு இடையிலான மின் பகிர்மானக் கட்டமைப்பை
அமைக்கவும் அமைச்சரவைக் கூட்டத்தில் ஒப்புதல் அளிக்கப்பட்டது.
இந்தத் திட்டம் மூன்று ஆண்டுகளில் நிறைவேற்றப்படும்.

பயிர்க்கடன் வட்டி மானியம்: தவிர, வசதியற்ற விவசாயிகள்
ரூ.3 லட்சம் வரை வாங்கியுள்ள பயிர்க் கடன்களுக்கான
வட்டியை அடைப்பதற்கான மானியம் வழங்குவதைத்
தொடர்வதற்கும் மத்திய அமைச்சரவைக் கூட்டத்தில் ஒப்புதல்
அளிக்கப்பட்டது.

சூரிய மின்சக்தி நிலையங்கள்: இதனிடையே, தமிழ்நாடு, குஜராத்,
ராஜஸ்தான் உள்ளிட்ட மாநிலங்களில் 500 மெகாவாட் உற்பத்தி
செய்யும் திறன் கொண்ட 25 சூரிய மின்சக்தி நிலையங்களை
அமைப்பதற்கும் அமைச்சரவை ஒப்புதல் அளித்தது.

ரூ.5 லட்சம் இழப்பீடு: தில்லியில் கடந்த 1984-ஆம் ஆண்டு
சீக்கியர்களுக்கு எதிராக நிகழ்ந்த கலவரத்தில் உயிரிழந்தோர்
குடும்பங்களுக்கு தலா ரூ.5 லட்சம் இழப்பீடு வழங்கவும்
அமைச்சரவைக் கூட்டத்தில் ஒப்புதல் அளிக்கப்பட்டது.
-
------------------------------
--தினமணி