கரூர் அருகே வேலைக்கு சென்ற சிறுமி பாலியல் பலாத்காரம் செய்யப்பட்டு கொலை

கரூர் அருகே வேலைக்கு சென்ற 17 வயது சிறுமி பாலியல் பலாத்காரம் செய்யப்பட்டு கொலை செய்யப்பட்டுள்ளார்.

கரூர் மாவட்டம் கிருஷ்ணராயபுரம் அருகே உள்ள பிச்சம்பட்டியை சேர்ந்தவர் பொன்னுச்சாமி. இவரது மகள் வினிதா (வயது 17). இவர் பிளஸ்–2 முடித்து விட்டு கல்லூரியில் சேர விண்ணப்பித்து இருந்தார். விடுமுறை நாட்களில் வினிதா கரூரில் உள்ள கொசு வலை நிறுவனத்தில் வேலை செய்து வந்தார். பிச்சம்பட்டியில் இருந்து கிருஷ்ணராயபுரத்துக்கு சைக்கிளிலும், அங்கிருந்து கம்பெனி பஸ்சிலும் கரூருக்கு வினிதா வேலைக்கு சென்று வந்தார். இந்நிலையில், தினமும் வேலை முடிந்து இரவு 8 மணிக்கு வீட்டுக்கு வந்து சேரும் வினிதா நேற்று இரவு 10 மணி ஆகியும் வீடு திரும்பாததால் அவரது பெற்றோரும், உறவினர்களும் வினிதாவை தேடிச் சென்றனர்.

அப்போது பிச்சம்பட்டிக்கும், கிருஷ்ணராயபுரத்திற்கும் இடையே சாலையில் வினிதாவின் சைக்கிள் மட்டும் கிடந்தது. வினிதாவை தேடி சென்றவர்கள் சைக்கிள் மட்டும் கிடப்பதை பார்த்து அதிர்ச்சி அடைந்தனர். பின்னர் அருகில் உள்ள இடங்களில் தேடினர். அப்போது அந்த பகுதியில் உள்ள வெற்றிலை கொடிக்கால் தோட்டம் ஒன்றில் வினிதா அரை நிர்வாண நிலையில் கழுத்து நெறிக்கப்பட்டு பிணமாக கிடந்ததை கண்டனர். மேலும் அவர் பலாத்காரம் செய்து கொலை செய்யப்பட்டு இருந்ததும் தெரிய வந்தது. அவரது உடலை பார்த்து பெற்றோர் மற்றும் உறவினர்கள் கதறி அழுதனர்.

ஆத்திரம் அடைந்த வினிதாவின் உறவினர்கள் பிச்சம்பட்டி–கிருஷ்ணராயபுரம் சாலையில் நள்ளிரவில் சாலை மறியலில் ஈடுபட்டனர். சம்பவம் குறித்து அறிந்ததும் பிச்சம்பட்டி பொது மக்களும் திரண்டு வந்து மறியலில் கலந்து கொண்டனர். இதையடுத்து குளித்தலை டி.எஸ்.பி. ஜமீம் அங்கு வந்து விசாரணை நடத்தினார். வினிதாவின் உடலை கைப்பற்றி கரூர் அரசு மருத்துவமனைக்கு அனுப்பி வைத்தார். குற்றவாளிகளை பிடிக்க 3 தனிப்படைகள் அமைக்கப்பட்டுள்ளன. நேற்று கிருஷ்ணராயபுரத்தில் நடந்த கோவில் திருவிழாவில் கலந்து கொண்ட யாரேனும் மதுபோதையில் இந்த சம்பவத்தில் ஈடுபட்டிருக்கலாம் என்ற கோணத்தில் போலீசார் விசாரணையை தொடங்கி உள்ளனர். சந்தேகத்துக்கு இடமானவர்களை பிடித்து போலீசார் தீவிர விசாரணை நடத்தி வருகிறார்கள்.