Search found 1 match for சூதாட்டம்

தமிழ்நாடு சட்டமன்றத்தில் நிறைவேற்றப்பட்ட ஆன்லைன் சூதாட்டத் தடை சட்ட மசோதாவுக்கு ஒப்புதல் தராமல் 142 நாள்கள் கழித்து ஆளுநர் ஆர்.என்.ரவி திருப்பி அனுப்பியிருப்பதும், அதற்கு அவர் குறிப்பிட்டிருக்கும் காரணமும் பெரும் அரசியல் சர்ச்சைகளை ஏற்படுத்தியுள்ளன. `மத்திய அரசின் தகவல் தொழில்நுட்பத் துறையின் அதிகார வரம்பிற்கு உட்பட்ட இந்த விவகாரத்தில் மாநில அரசு எந்த அடிப்படையில் சட்டம் இயற்றலாம்' என்பதே கவர்னர் எழுப்பியுள்ள கேள்வியாக உள்ளது.

ஆன்லைன் சூதாட்டத்தில் பணத்தை இழந்த பலர் தற்கொலை செய்துகொள்ளும் சமூக அவலத்தைத் தடுப்பதற்கான முயற்சிகளுக்கு நீண்ட காலமாக எந்தப் பலனும் கிடைக்கவில்லை. கடந்த அ.தி.மு.க ஆட்சிக்காலத்தில் ஒருமனதாக நிறைவேற்றப்பட்ட சட்டம், உயர் நீதிமன்றத்தால் ரத்து செய்யப்பட்டது. திறமை அடிப்படையில் ஆடப்படும் விளையாட்டுகளை சட்டப்படி தடை செய்ய முடியாது. அதிர்ஷ்டம் அடிப்படையில் ஆடப்படும் விளையாட்டுகளையே தடை செய்ய முடியும். இந்த எல்லைக்கோடு தெரியாத குழப்பத்துடன் அந்தச் சட்டம் இருந்தது என்பதே காரணம். அப்போதுகூட, `இப்படி ஒரு சட்டத்தை இயற்ற மாநில அரசுக்கு அதிகாரம் இல்லை' என நீதிமன்றம் குறிப்பிடவில்லை.

பாரம்பரியமான சூதாட்டத்தைத் தடை செய்வதுபோல ஆன்லைன் சூதாட்டத்தைத் தடை செய்ய முடியுமா என்பதே குழப்பமான விஷயமாக இருக்கிறது. என்றாலும், ஏற்கெனவே மேற்கு வங்காளம், தெலங்கானா, ஆந்திரப் பிரதேசம் ஆகிய மாநிலங்களில் ஆன்லைன் சூதாட்டத் தடைச் சட்டம் அமலில் உள்ளது. கர்நாடகா மற்றும் கேரளாவில் கொண்டு வரப்பட்ட சட்டங்களை உயர் நீதிமன்றங்கள் ரத்து செய்துவிட்டன. திறமை அடிப்படையில் ஆடப்படும் விளையாட்டுகளுக்குத் தடை விதிக்க முடியாது என்று பழைய நீதிமன்றத் தீர்ப்பு ஒன்று இருப்பதே இதற்குக் காரணம்.

இந்த ஜனவரி மாதம் மத்திய அரசின் தகவல் தொழில்நுட்பத் துறை அமைச்சகமானது, ஆன்லைன் விளையாட்டுகள் தொடர்பான வரைவு விதிகளை வெளியிட்டது. அப்போது நாடாளுமன்றத்தில் பேசிய மத்திய அமைச்சர் அஸ்வினி வைஷ்ணவ், “ஆன்லைன் விளையாட்டுகள் தொடர்பாக மத்திய அரசு இந்த விதிகளைக் கொண்டு வந்துள்ளது. ஆன்லைன் சூதாட்டத்தைப் பொறுத்தவரை, எல்லா மாநில அரசுகளும் மத்திய அரசுக்கு உதவி செய்தால், முறையான சட்டத்தைக் கொண்டு வர முடியும்'’ என்றே குறிப்பிட்டிருந்தார்.

இதற்கு முன்பே உயர் நீதிமன்ற முன்னாள் நீதிபதி கே.சந்துரு தலைமையில், மனநல நிபுணர், தொழில்நுட்ப வல்லுநர் கொண்ட குழுவை அமைத்து, அந்தக் குழு விசாரித்து அளித்த பரிந்துரைகளின் அடிப்படையிலேயே இப்படி ஒரு மசோதாவைத் தமிழ்நாடு சட்டப்பேரவை நிறைவேற்றியிருந்தது. இதே விஷயத்தில் ஏற்கெனவே அனுப்பப்பட்ட அவசரச் சட்டத்துக்கு உடனடியாக ஒப்புதல் அளித்திருந்த ஆளுநர் இப்போது மசோதாவைத் திருப்பி அனுப்பியிருப்பது ஒரு புரியாத புதிர்தான்.

ஆன்லைன் சூதாட்டத்தின் காரணமாக இதுவரை தமிழகத்தில் 44 பேர் தற்கொலை செய்துகொண்டிருப்பதாக புள்ளிவிவரங்கள் கூறுகின்றன. பலரின் உயிரைப் பறிக்கும் இந்தக் கொடிய விளையாட்டைத் தடை செய்வதற்கான முயற்சிகள் அரசியல் சூதாட்டத்தில் சிக்கிவிடக்கூடாது.

குறிச்சொற்கள் #ஆன்லைன்_சூதாட்டம் #சூதாட்டம்