மேகங்கள்

**சிவா** · **சிவா** Wed Jun 12, 2013 12:05 pm

மழை தரும் மேகங்கள் இயற்கை அதிசயங்களில் ஒன்றாகும். பூமியின் பரப்பில் உள்ள கடல் நீர் மற்றும் ஆறுகள், ஏரிகளில் உள்ள தண்ணீர், சூரிய வெப்பத்தால் ஆவியாகி மேலெழும்பிச் செல்கிறது. அந்த நீராவி மூலக்கூறுகள் இணைந்து மேகங்களாக திரள்கிறது.

மேகங்களில் நான்கு வகை உண்டு. அவை, கீழ்மட்ட மேகங்கள், இடைமட்ட மேகங்கள், உயர்மட்ட மேகங்கள், செங்குத்து மேகங்கள் எனப்படுகிறது. இவற்றைப் பற்றிய சிறு குறிப்புகளை இங்கே காண்போம்...

கீழ்மட்ட மேகங்கள்:

குறைந்தபட்ச உயரத்தில் காணப்படும் மேகங்கள் கீழ்மட்ட மேகங்கள் என அழைக்கப்படுகிறது. இவை பூமியின் மேற்பரப்பில் இருந்து 2 ஆயிரம் கிலோ மீட்டர் உயரம் வரை காணப்படும். அடர்த்தியான நீர்த்திவலைகள், பனித்துளிகள், மாசுபடர்ந்த தூசுகள் இந்த மேகக் கூட்டத்தில் மிகுதியாக கலந்திருக்கும். இதனால் சூரியக்கதிர்கள் எளிதாக ஊடுருவ முடியாது. இந்த கீழ்மட்ட மேகங்களே பெரும்பாலும் மழையைக் கொடுக்கின்றன.

இடைமட்ட மேகங்கள்:

பூமியின் வளிமண்டல பரப்பில் 2 ஆயிரம் கிலோ மீட்டருக்கு மேலிருந்து 7ஆயிரம் கிலோ மீட்டர் உயரம் வரை காணப்படும் மேகங்கள் இடைமட்ட மேகங்கள் எனப்படுகின்றன. இவை அகலமாகவும், அடர்த்தியாகவும் இருக்கும். ஆனால் இங்கு குறைந்தபட்ச அளவிலே நீர்த்திவலைகளும், பனித்துகள்களும் காணப்படும். இந்த வகை மேகங்களும் மழையைப் பொழிகின்றன.

உயர்மட்ட மேகங்கள்:

வளிமண்டலத்தில் சுமார் 7ஆயிரம் கிலோ மீட்டருக்கு மேலிருந்து 12 ஆயிரம் கிலோ மீட்டர் உயரம் வரை காணப்படும் மேகங்கள் உயர்மட்ட மேகங்கள். இவை பஞ்சுப்பொதி போன்று மிருதுவான தோற்றத்தில் வெண்மையாக இருக்கும். அதிகமான உயரத்தில் உருவாவதால் நீராவி குளிர்ந்து பனிப்படிகங்களாகவே அதிகம் இருக்கும்.

செங்குத்து மேகங்கள்:

பூமியின் மேற்பரப்பிலிருந்தும், தொழிற்சாலைகளில் இருந்தும் வரும் கரும்புகை விரைவாக மேலே எழும்பி காற்றில் பரவி இந்த செங்குத்து மேகங்கள் உருவாகின்றன. இவற்றுடன் மிக அடர்த்தியான நீர்த்துளிகளும், தூசுக்களும் கலந்திருக்கும். இவை கருமையாக காணப்படுகின்றன. இதனால் சூரிய ஒளிக்கதிர்கள் இம்மேகங்களுள் புக முடியாமல் போகின்றன. செங்குத்து மேகங்கள் மின்னல் மற்றும் இடியோடு கூடிய மழையைத் தருகின்றன.

தினத்தந்தி