பனிக்கட்டிகளுக்குள்ளே பெட்ரோல்!

வரும் 2020ம் ஆண்டிற்குப் பின், உலகில் பல எண்ணெய்க் கிணறுகள் வற்றி விடலாம் என கருதப்படுகிறது. இதனால் புதிய இடங்களில் எண்ணெய் கண்டுபிடித்து எடுக்க வேண்டிய கட்டாயத்தில் பெரிய நாடுகள் உள்ளன. எங்கே தேடுவேன் என்று அவர்கள் உலகம் முழுவதும் தேடித் துருவித்தான் பனி மூடிய ஆர்க்டிக் கடலில் வந்து நின்றிருக்கிறார்கள். ஆம், ஆர்க்டிக் கடலின் அடியில் ஹைட்ரோகார்பன் படிமங்கள் அதிகம் உள்ளதால், அங்கு எண்ணெய் மற்றும் எரிவாயு நிறையக் கிடைக்கும் என ஆய்வாளர்கள் கருதுகின்றனர். ஆர்க்டிக் கடலை எல்லையாகக் கொண்ட கனடா, டென்மார்க், நார்வே, ரஷ்யா, அமெரிக்கா ஆகிய ஐந்து நாடுகளும் இணைந்து ஆர்க்டிக் டெவலப்மென்ட் ஸ்ட்ராடஜி என ஒப்பந்தம் செய்து கொண்டன. ஆர்க்டிக் கடலை ஒட்டிய பெரிய நிலப்பகுதி ரஷ்யாவுக்குச் சொந்தமானது. இதனால் அங்கு எண்ணெய் வளம் உள்ளதா என ஆராய்ச்சி செய்து கொள்ள தனக்கு அதிக உரிமை கோரியது ரஷ்யா.

இதற்காக அடுத்த 30 ஆண்டுகளில் அந்நாடு 5000 பில்லியன் டாலர் வரை செலவு செய்யவும் திட்டமிட்டுள்ளது. ஒரு நாட்டின் பொதுவான கடல் எல்லை 12 நாட்டிகல் மைல் என்றாலும், மேற்கண்ட ஐந்து நாடுகளும் தங்கள் எல்லையை ஒட்டிய கடலில் 350 நாட்டிகல் மைல் தூரத்திற்கு கனிம வளங்களை பயன்படுத்திக்கொள்ள இந்த ஒப்பந்தம் வழி செய்துள்ளது. ஸ்வீடன், பின்லாந்து மற்றும் ஐஸ்லாந்து நாடுகளுக்கும் ஆர்க்டிக் கடலை ஒட்டி எல்லை உண்டு. எனவே, தற்போது அவையும் இந்த ஒப்பந்தத்தில் இணைந்துள்ளன! இப்படி 8 நாடுகள் மட்டும் இணைந்து ஆர்க்டிக் கவுன்சில் அமைக்கும்போது இந்தியா, சீனா போன்ற நாடுகள் இதை வேடிக்கை பார்த்துக் கொண்டிருக்குமா? இந்தியா, சீனா மட்டுமல்ல... இத்தாலி, ஜப்பான், தென் கொரியா, சிங்கப்பூர் ஆகிய நாடுகளும் தங்களுக்கு பார்வையாளர் நிரந்தர அந்தஸ்து வேண்டும் எனக் கேட்டுள்ளன.

மே மாதத்தில் ஆர்க்டிக் கவுன்சில் நாடுகளின் மீட்டிங் நடக்க உள்ளது. இதற்கு கனடா தலைமை தாங்கப்போகிறது. கனடாவும் இந்தியாவும் நல்ல நண்பர்கள் என்பதால், இந்த மீட்டிங்கில் இந்தியாவுக்கு நிரந்தர பார்வையாளர் அந்தஸ்து கிடைக்கும் வாய்ப்பு அதிகம்! 350 நாட்டிகல் மைல் கடந்த ஆர்க்டிக் கடலின் மற்ற பகுதிகளை, எந்த நாடு வேண்டுமானாலும் பயன்படுத்தி அதில் ஆராய்ச்சிகளை மேற்கொள்ளலாம். ஆனால், உற்பத்தியானதை எடுத்துச் செல்ல வழி தேவை! ஆர்க்டிக் கண்டத்துக்குச் செல்லும் பாதைகள் பெரும்பாலும் ரஷ்யா மற்றும் கனடா கடல் எல்லையில் வருகின்றன. ‘‘இவை சர்வதேச கடல்பாதைகள் அல்ல. எங்கள் நாட்டுக்கு மட்டும் சொந்தமான பாதைகள்’’ என்கின்றன இந்த இரண்டு நாடுகளும். இப்படி உரிமை கொண்டாடி, இதர கப்பல்களின் போக்குவரத்தைத் தடுக்க முடியாது.

ஆனால், கப்பல்கள் இந்த வழியாகப் போவதற்கு இந்த நாடுகளிடம் அனுமதி வாங்க நேரும். உலகின் மிகப் பெரும் எண்ணெய் நிறுவனங்கள் அனைத்தும் ஆர்க்டிக் கடலில் கால் பதித்து எண்ணெய் எடுக்கத் துடிக்கின்றன. ரஷ்யாவின் கடற்படை அதிக பனிக்கட்டி உடைப்பு கப்பல்களைப் பயன்படுத்தி, இந்தக் கடலில் பனிக்கட்டிகளை உடைத்து பாதைகளை உருவாக்கி வருகிறது. இன்னொரு பக்கம் ஆர்க்டிக் கவுன்சிலில் இருக்கும் எல்லா நாடுகளும் தங்கள் ராணுவத்தில் ஆர்க்டிக் படைப்பிரிவை பலப்படுத்தி வருகின்றன. பனிப்பாறைகளுக்கு அடியில் புதைந்து கிடக்கும் எண்ணெய் வளத்தை எடுப்பது சாதாரண விஷயம் இல்லை. ஆனால் அதற்கு போட்டி குவிந்து போரே வந்துவிடும் போலிருக்கிறது. வருங்காலத்தில் ஆர்க்டிக் பிரதேசம் வெறும் ஐஸ் மண்டலம் என்ற நிலை மாறி, செல்வம் கொழிக்கும் எண்ணெய் மற்றும் எரிவாயு பூமியாய் ஆகப்போவது நிச்சயம்!

- தினகரன்

பனிப்பாறைகளுக்கு அடியில் புதைந்து கிடக்கும் எண்ணெய் வளத்தை எடுப்பது சாதாரண விஷயம் இல்லை. ஆனால் அதற்கு போட்டி குவிந்து போரே வந்துவிடும் போலிருக்கிறது. வருங்காலத்தில் ஆர்க்டிக் பிரதேசம் வெறும் ஐஸ் மண்டலம் என்ற நிலை மாறி, செல்வம் கொழிக்கும் எண்ணெய் மற்றும் எரிவாயு பூமியாய் ஆகப்போவது நிச்சயம்!

இது மட்டும் நிகழாமல் இருந்தால் சரி தான்