ஹூஸ்டனில் தமிழ்ப்பள்ளி ஆண்டு விழா!

**சாமி** · **சாமி** Thu May 30, 2013 7:24 pm

ஹூஸ்டன்: அமெரிக்காவின் ஹூஸ்டன் மாநகரில் ஹூஸ்டன் பெருநகரத் தமிழ்ப்பள்ளி இயங்கி வருகிறது. இதில் 160க்கும் மேலான குழந்தைகள் தமிழ்க்கல்வி கற்று வருகிறார்கள். இங்கு தமிழ் சொல்லிக் கொடுப்பவர்கள் அனைவரும் பெற்றோர்கள். இவர்கள் தங்களது நேரத்தையும் உழைப்பையும் செலவழித்து குழந்தைகளுக்கு சனிக்கிழமை, ஞாயிற்றுகிழமை நாட்களில் தமிழ் சொல்லிக் கொடுக்கிறார்கள்.

மழலை நிலையிலிருந்து 6ம் நிலை வரை தமிழ்ப்பாடம் சொல்லிக் கொடுக்கிறார்கள். வருடந்தோறும் மே மாதம் ஆண்டு விழா நடத்தி மாணவர்களுக்கு சான்றிதழ்கள் மற்றும் தமிழ்ப் போட்டிகளுக்கான பரிசுகளும் கொடுக்கிறார்கள். இவ்வருடம் ஹூஸ்டன் பெருநகரத் தமிழ்ப்பள்ளி தமது ஆண்டு விழாவினை மே 25ம் தேதி பிற்பகல் மேடிகிரீக் நடுநிலைப்பள்ளியில் மிகச் சிறப்பாகக் கொண்டாடியது. அதன் உறுப்பினர் பள்ளிகளான பியர்லேண்ட், கேட்டி மற்றும் உட்லண்டஸ் தமிழ்ப் பள்ளிகளிலிருந்து சுமார் 150-க்கும் மேற்பட்ட மாணாக்கர்கள் தத்தம் தமிழ்த் திறமையை வெளிக் கொணர்ந்ததுடன் 2012-2013 கல்வியாண்டில் பல்வேறு வகையான போட்டிகளில் வென்று விருதுகளை அள்ளிச் சென்றனர்.

விழா, பள்ளிமாணாக்கர்களின் இறைவணக்கப் பாடலுடன் துவங்க, தொடர்ந்து பெருநகரப் பள்ளித் தலைவர் இரா.கோபாலகிருஷ்ணன் வரவேற்புரை நிகழ்த்த, மாணாக்கர்களின் தரமான நிகழ்ச்சிகள் அரங்கேறின.

அனைத்துப் பள்ளிகளது மழலையரின் மயக்கும் தமிழ் மகிழ்ச்சியைப் பெருக்க, உயர்நிலை மாணாக்கர்களின் உன்னதமான தமிழ் நிகழ்ச்சிக்கு மெருகூட்டியது. கேட்டி பள்ளி மாணாக்கர்களால் உருவாக்கப்பட்ட பல்வேறு இடங்கள் குறித்த ஒரு கட்டிட கலைக்களஞ்சிய வலைத்தளம் பற்றிய விளக்கவுரை மற்றும் “கடையேழு வள்ளல்கள்” பற்றிய நாடகம் பார்வையாளர்களின் கவனத்தை ஈர்த்தது. பியர்லேண்ட் பள்ளி மாணாக்கர்களது ”டெக்சஸ்-தமிழ்நாடு”மாநிலங்களின் ஒற்றுமை அனைவரையும் வெகுவாகக் கவர்ந்தது. உட்லண்ட்ஸ் பள்ளி மாணாக்கர்களது அற்புத உழைப்பில் உருவான “வீரபாண்டிய கட்டபொம்மன்”நாடகம் பார்வையாளர்களை அந்தக்காலக் கட்டத்திற்கே கொண்டு சென்றது என்றால் அது மிகையன்று.

அமெரிக்க மண்ணில் பிறந்து வளர்ந்த மாணவர்கள் தமிழைத் திருத்தமாக மேடையில் பேசிய விதம் அனைவரையும் மகிழ்ச்சியடைச் செய்தது. தத்தம் குழந்தைகள் அருமையாகத் தமிழ்ப் பேசும் விதத்தைப் பெற்றோர்கள் படம்பிடித்து மகிழ்ந்தனர். இவ்விழாவின் சிறப்பு விருந்தினர் ஆஸ்டின்- டெக்சஸ் பல்கலைக்கழக ஆசியக் கல்வித்துறைப் பேராசிரியர் சங்கரன் இராதாகிருஷ்ணன் இவையனைத்தையும் மனமாரப் பாராட்டியதுடன் குழந்தைகள் வழக்கமாக வீட்டில் தமிழ் பேச வேண்டும் என்று கேட்டுக் கொள்வதை சற்றுமாற்றாக அக்குழந்தைகள் தத்தம் பெற்றோரை வீட்டில் தமிழில் பேசச் சொல்ல வேண்டும் என கேட்டுக் கொண்டது கவனத்தில் கொள்ள வேண்டிய வித்தியாசமான வேண்டுகோளாக அமைந்தது. அத்துடன் தமிழ் கற்பது வெறும் மொழி அறிந்து கொள்ள வேண்டும் என்பதற்காக மட்டுமல்லாமல் அமெரிக்க மண்ணில் வளரும் எதிர்காலத் தலைமுறையினர் தமிழ்ப் பண்பாடு தெரிந்து கொள்ளவும் ஒரு வாய்ப்பாக அமையும் என்றார்.

அதனைத் தொடர்ந்து அனைத்துத் தமிழ்ப்பள்ளி தன்னார்வ ஆசிரியப்பெருமக்கள் அனைவருக்கும் விருது வழங்கி மரியாதை செய்யப்பட்டது.இந்தத் தமிழ்ப் பள்ளிகளில் கற்றுத்தரப்படும் தமிழுக்கு அமெரிக்காவில் அங்கீகாரம் பெறுவதற்காக தமிழர்கள் பெருமுயற்சியுடன் உழைக்கிறார்கள். இந்த முயற்சி பற்றிய வழிமுறைகள் குறித்தும் மதிப்பீட்டுக்குழு கலந்துரையாடல் மூலம் விரிவாக விளக்கம் தரப்பட்டது. அதனைத் தொடர்ந்து பள்ளி ஆண்டு மலரை அகிலா பாலகிருஷ்ணன் வெளியிட்டார்கள். இறுதியாக மாணாக்கர்களுக்கு விருதுகள் வழங்கப்பட்டு, விழா அமைப்பாளர் ஜகன் அண்ணாமலை நன்றி கூற, அனைவருக்கும் அறுசுவை உணவு வழங்கப்பட்டு விழா இனிதே நிறைவு பெற்றது. கடல்தாண்டி தமிழ் வளர்கிறது என்பதற்கு இது ஒரு சிறப்பான சான்றாக அமைந்தது என்றால் மிகையாகாது.

- தினமலர் வாசகர் கரு.மாணிக்கவாசகம்

பூவன் · பூவன் Thu May 30, 2013 11:41 pm

கடையேழு வள்ளல்கள்” பற்றிய நாடகம் பார்வையாளர்களின் கவனத்தை ஈர்த்தது

அமெரிக்காவில் வள்ளல்களை பற்றி பேசுகிறார்கள் , தமிழை போற்றுகிறார்கள் ,

குழந்தைகள் வழக்கமாக வீட்டில் தமிழ் பேச வேண்டும் என்று கேட்டுக் கொள்வதை சற்றுமாற்றாக அக்குழந்தைகள் தத்தம் பெற்றோரை வீட்டில் தமிழில் பேசச் சொல்ல வேண்டும் என கேட்டுக் கொண்டது

நம் நட்டு அல்லல் அரசியல் பேர்வழிகள் தமிழை தள்ளி விட்டு அங்கிலத்தை அள்ள சொல்கிறார்கள் .

தமிழுக்கு அமெரிக்காவில் அங்கீகாரம் பெறுவதற்காக தமிழர்கள் பெருமுயற்சியுடன் உழைக்கிறார்கள். இந்த முயற்சி பற்றிய வழிமுறைகள் குறித்தும் மதிப்பீட்டுக்குழு கலந்துரையாடல் மூலம் விரிவாக விளக்கம் தரப்பட்டது.

ஆங்கில நாட்டில் அவர்கள் உழைப்பது சரி , நாமோ நம் தமிழ்நாட்டிலும் உழைத்து கொண்டுதானே உள்ளோம் தமிழன் என்று அங்கீகாரம் பெற ....