விக்கிரக வழிபாடு கடவுள் வழிபாடா? – வள்ளலாருக்கும் பிரம்மசமாஜ புலவருக்கும் இடையே நடந்த தர்க்கம்

1866 ஆம் ஆண்டு, ஜனவரித் திங்கள், 18ஆம் நாள், தென்னார்க்காடு மாவட்டத்தின் தலைநகரான கடலூர் புதுப்பொலிவுடன் திகழ்ந்தது. அதன் அருகில் பெண்ணை நதி அமைதியாக ஓடிக்கொண்டிருந்தது. பெண்ணையின் தென்கரையில் இருக்கும் உண்ணாமுலைச் செட்டி சாவடியோ கலகலப்பாக இருந்தது. சாவடிக்குப்பக்கத்தில் உள்ள பந்தலில் அறிஞர்கள் பலர் கூடியிருந்தனர்.

இவர்கள் அங்கு நடைபெற்ற ஒரு திருவிழாவில் கலந்து கொள்வதற்காக வந்திருந்தவர்கள். இவர்களில் பலர் அந்த நாளில் தமிழ்நாட்டில் புகழுடன் இருந்த பெரும்புலவர்களும், ஞானிகளும் ஆவர்.

அதில் சிறப்பாகக் குறிப்பிடத்தக்கவர்கள் இருவர். ஒருவர் திரு அருட்பிரகாச வள்ளலார் என்று புகழ்பெற்ற வடலூர் இராமலிங்க அடிகள், மற்றொருவர் சம்பேடு ஸ்ரீதர சுவாமிகள். இவர் பிரம்ம சமாஜத்தைச் சேர்ந்தவர். பெரும்புலவர். பிரம்ம சமாஜம் விக்கிரக வழிபாட்டை மறுக்கும் இயக்கத்தைச் சேர்ந்தது.

தமிழ்நாட்டின் பல பகுதிகளுக்குப் பிரம்மசமாஜப் புலவரான ஸ்ரீதர சுவாமிகள் சொற்பொழிவாற்றப் போவார். அடிக்கடி திருப்பாதிரிப் புலியூருக்கும் சொற்பொழிவாற்ற வருவார். இந்தத் திருவிழா நடைபெறுவதற்கு சில மாதங்களுக்கு முன்னால் ஸ்ரீதர சுவாமிகள் திருப்பாதிரிப்புலியூருக்கு வந்து சொற்பொழிவாற்றும் போது வழக்கம்போல் விக்கிரக ஆராதனை செய்வதை மிக வன்மையாகக் கண்டித்துப்பேசினார்,

ஸ்ரீதர சுவாமிகளின் விக்கிரக வழிபாட்டு நிந்தனைப் பேச்சைக் கேட்ட அன்பர்களில் சிலரும் இந்த அறிஞர்கள் கூட்டத்தில் இருந்தனர். அவர்கள் ஸ்ரீதர சுவாமிகளின் பேச்சைக்கேட்டுப் பெரிதும் குழம்பிப் போயிருந்தார்கள். அவர்களுக்கு ஸ்ரீதர சுவாமிகளையும், திருஅருட்பிரகாச வள்ளலாரையும் சேர்த்து பார்த்ததும் தங்கள் மனக்குழப்பத்தைப் போக்கிக்கொள்ள இதுதான் சரியான சமயம் என்று தோன்றியது.

(தொடரும்) (கோ.வன்மீகநாதன் எழுதிய ஜோதி வழியில் வள்ளலார் என்ற புத்தகத்தில் இருந்து எடுத்தது)
.