காஷ்மீரில் மதிக்கப்படும் தலைவர் யாசின்மாலிக்கை அழைத்தது எப்படி குற்றமாகும்! காங்கிரஸ்-பா.ஜ.க.விற்கு சீமான் கேள்வி!!

தமிழகத்திற்கு யாசின்மாலிக்கை அழைத்தது எப்படி பிழையாகும் என்று காங்கிரஸ், பா.ஜ.க.விற்கு நாம் தமிழர் சீமான் கேள்வி எழுப்பியுள்ளார்.
இலங்கையில் சிங்கள பௌத்த இனவெறி அரசால், தமிழினம் திட்டமிட்டு அழித்தொழித்து முடிக்கப்பட்ட நாளான மே-18-ஆம் நாளை இன எழுச்சி நாளாக கடலூர் நகரில் நாம் தமிழர் கட்சி நடத்திய உள்ளரங்கு கூட்டத்தில் ஜம்மு-காஷ்மீர் விடுதலை முன்னணியின் தலைவர் யாசின்மாலிக் கலந்து கொண்டதற்கு காங்கிரஸ் மற்றும் பாரதிய ஜனதா கட்சிகள் எதிர்ப்பும், கண்டனமும் தெரிவித்துள்ளன. இது தொடர்பாக நாம் தமிழர் கட்சியின் தலைமை ஒருங்கிணைப்பாளர் சீமான் வெளியிட்டுள்ள அறிக்கையில், யாசின்மாலிக்கை அழைத்தது எப்படி பிழையாகும் என்று கேள்வி எழுப்பியுள்ளார்.
காஷ்மீர் மக்களால் பெரிதும் மதிக்கப்படும் தலைவரான யாசின்மாலிக்கின் ஜம்மு-காஷ்மீர் விடுதலை இயக்கம், ஒரு தடை செய்யப்பட்ட இயக்கம் அல்ல, இன்றும் சுதந்திரமாக இயங்கி வருகிறது. காஷ்மீர் மக்களின் அரசியல் உரிமைக்காக போராடி வரும் அந்த கட்சிக்கு இந்திய நாட்டில் எங்கு சென்றாலும் கருத்துக்களை கூற உரிமை இருக்கிறது என்றும், அது இந்திய அரசியல் சட்டப்பூர்வமானது என்று சீமான் விளக்கம் அளித்துள்ளார்.
தொடர்ந்து காஷ்மீர் தலைவர் ஒருவரை இங்கு ஏன் அழைத்து வரக்கூடாது, தமிழகத்தைப்போல காஷ்மீரமும் இந்திய நாட்டின் அங்கம் தானே என்றும் காஷ்மீர் முதல் கன்னியாகுமரி வரை இந்தியா ஒரே நாடு என்று தங்கள் கட்சிகள் தானே முழங்குகிறது என்று குறிப்பிட்டுள்ள அவர், யாசின்மாலிக் பிரிவினைவாத தலைவர் என்றால் காஷ்மீர் சென்றபோது, இந்திய பிரதமர் அவரை சந்தித்து பேசியது ஏன் என்று கேள்வி எழுப்பியுள்ளார். ஆக அவரை நாங்கள் பேச அழைத்து வந்தால் குற்றம். மத்திய அரசு பேசினால் சரியானதா என்றும் சுட்டிக்காட்டியுள்ளார்.
தொடர்ந்து தமிழகத்தை கொன்று குவித்த அன்னிய நாட்டு தலைவனை அழைத்துவந்து அரசு மரியாதை கொடுப்பதுதான் தேசபக்தியா என்று கேட்டுள்ள சீமான், இராஜபக்ஷேவிற்கு இந்தியாவில் இராஜ உபச்சாரம் செய்வது தமிழர்களை வெறுப்பேற்றதா, பிரிவினைக்கு வித்திடதா என்றும் கேள்வி எழுப்பியுள்ளார்.
தமிழ் ஈழத்தில் எம் தமிழினம் எப்படி திட்டமிட்டு அழிக்கப்பட்டு வருகிறதோ அதேபோல் காஷ்மீரிலும் நாங்கள் நசுக்கப்படுகிறோம் என்று யாசின்மாலிக் கூறினாரே அதற்கு உங்கள் பதில் என்ன என்றும் காஷ்மீரில் இராணுவத்தால் விசாரணைக்கு அழைத்துச் செல்லப்பட்டவர்கள் 10-ஆயிரம் பேருக்குமேல் இன்று வரை என்ன ஆனார்கள் என்று தெரிவில்லை என்று ஐ.நா.மனித உரிமை அமைப்பு கூறியுள்ளதற்கு இந்த தேச பக்தர்களின் பதில் என்ன என்றும் சீமான் கேட்டுள்ளார்.
தமிழ்நாட்டு மக்களிடமிருந்து அன்னியப்பட்டு நிற்கும் தேசிய கட்சிகள், தங்கள் மீது கூறும் குற்றச்சாட்டுகள் எந்த அடிப்படையும் அற்றது என்று தமிழர்கள் அனைவருக்கும் தெரியும் என்று தெரிவித்துள்ள சீமான் இறையாண்மை என்பதற்கு பொருள் என்ன என்று புரியாத தலைவர்களுக்கு தாங்கள் விளக்கம் அளிக்க வேண்டிய அவசியம் இல்லை என்றும் கூறியுள்ளார்.

நன்றி: http://tamilantelevision.com/

"வேலியில் போறதை எடுத்து வேட்டிக்குள்ள விட்டுகிட்டானாம்" என்று ஒரு பழமொழி சொல்லுவார்கள் அதுபோல ஆகாமல் இருந்தா சரி