மறுமதிப்பீடு ?

**அகல்** · **அகல்** Fri 31 May 2013 - 21:33

மறுமதிப்பீடு

தேர்வு முடிவுகள் வந்தபிறகு, மதிப்பெண்கள் சரியாக வரவில்லை என்றால் மறு மதிப்பீட்டிற்கு விண்ணப்பித்து (Revaluation) சில மாணவர்கள் தங்களின் சரியான மதிப்பெண்களைப் பெற்றுக் கொள்கிறார்கள். ஆனால் தங்களது அலைச்சல், போக்குவரத்து செலவுகள் சேர்க்காமல் ஒவ்வொரு பாடத்திற்கும் 200 முதல் 500 ரூபாய் மறுமதிப்பீட்டிற்கு செலுத்த வேண்டியுள்ளது. இருப்பவன் பணத்தைக் கட்டி மறுமதிப்பீடு செய்கிறான். இல்லாதவன் என்ன செய்வான் ? பணத்தைச் செலுத்த முடியாதவன் தனக்கு நியாயமாக வரவேண்டிய மதிப்பெண்களை இழக்கிறானே. இது யார் குற்றம் ?

நமது நாட்டில் தனியார் பேருந்தில் செல்ல பணம் இல்லாமல் மணிக்கணக்கில் காத்திருந்து நகரப்பேருந்துகளில் செல்லும் மாணவர்களும், தங்கிப் படிக்க வீடில்லாமல் இரவு நேரத்தில் பிளாட்பாரத்தை வீடாக்கிக்கொள்ளும் மாணவர்களும் லட்சக்கணக்கில் இருக்கத்தானே செய்கிறார்கள். இவ்வாறான சூழலில் வளரும் ஒரு மாணவனால் எவ்வாறு தனது மதிப்பெண்களை சரி செய்துகொள்ள முடியும் ?

மறுமதிப்பீட்டிற்கு மாணவன் ஏன் பணம் செலுத்த வேண்டும் ? தவறு அவனுடையதா ? மறு மதிப்பீட்டில் ஒருவன் முன்பைவிட அதிக மதிப்பெண் பெற்றால், இதற்குமுன் மதிப்பீடு செய்த ஆசிரியர் சரியாக மதிப்பீடு செய்யவில்லை என்றுதானே பொருள் ? தவறு ஆசிரியரிடமும் அரசிடமும் உள்ளது. உங்களின் தவறுகளை சரி செய்ய மாணவன் ஏன் பணம் செலுத்த வேண்டும் ? உங்கள் தவறுக்கு அவன் ஏன் பலியாகவேண்டும் ?

முதலில் நமது கல்வி முறையே தவறானது. இதில் மறுமதிப்பீடு என்பது கீழ்த்தட்டு மக்களைப் பாதிப்பதாகவே உள்ளது. மறுமதிப்பீடு செய்யும் முறையை கட்டாயம் மாற்றுவது அவசியம் என்றே எனக்குப்படுகிறது.

Source : http://kakkaisirakinile.blogspot.in/2013/05/blog-post_31.html

அன்புடன்,
அகல்

சதாசிவம் · சதாசிவம் Sat 1 Jun 2013 - 16:03

நல்ல கேள்வி,

pre-kg படிப்புக்கே 25000 ரூபாய் கொடுக்க தயாராய் இருக்கும் பெற்றோர் இதைப் பற்றியெல்லாம் யோசிப்பதில்லை. ஏழைகள் இது போன்ற கேள்வியை கேட்க துணிவதில்லை.

பள்ளிக்கூடத்தில் நடத்த இயலாது, டூயுஷனில் பாடம் நடத்தி பிழைப்பு நடத்தும் ஆசிரியர்களே இன்று பெருகியுள்ளனர்.

ஆசிரியர் தகுதி தேர்வு தேவையில்லை என்று கூறும் ஆசிரியர் கூட்டம், இது போன்ற தேர்வுகளும் தேவையில்லை என்று கூறுவதில்லை. ஆசிரியர்களின் தகுதி நாளுக்குள் நாள் குறைந்து வருகிறது.

SSLC தேர்வு முடிவுகளின் முதல் நிலை மதிபீடுகளை பார்க்கும் பொழுது ஆசிரியர்களை மீண்டும் ஒரு முறை SSLC யில் படிக்க வைக்க வேண்டும் என்று தோன்றுகிறது.

மறுமதிப்பீடு ?

மறுமதிப்பீடு ?

Re: மறுமதிப்பீடு ?

மறுமொழி எழுத நீங்கள் உறுப்பினராக இருக்க வேண்டும்..

உறுப்பினராக பதிவு செய்க

உள்நுழைக