சவுதியிலிருந்து இந்தியா திரும்ப விருப்பம்: 18,000க்கும் மேற்பட்டோர் அவசர சான்றிதழுக்காக விண்ணப்பம்

**சிவா** · **சிவா** Thu 9 May 2013 - 10:28

சவூதி அரேபிய அரசு, உள்ளூர் மக்களின் வேலையில்லாத் திண்டாட்டத்தைப் போக்கும் வண்ணம், புதிதாக நிடாகட் என்ற கொள்கையை அறிமுகம் செய்தது. 10 வெளிநாட்டவர்களுக்கு ஒருவர் சவுதியைச் சேர்ந்தவர் என்ற அடிப்படையில் வேலைவாய்ப்புகள் அளிக்கப்படவேண்டும் என்பதே அந்தத் திட்டமாகும். இதனால், ஏராளமான வெளிநாட்டவர் வேலை இழக்கும் சூழ்நிலை உருவானது. இதனை உடனடியாக செயல்படுத்தாமல், அயல்நாட்டவர்கள் வெளியேறும் விதமாக அரசு மூன்று மாதம் கால அவகாசம் கொடுத்திருந்தது.

இந்தக் காலக்கெடு விரைவில் முடிவதால், சவுதியிலிருந்து சொந்த நாட்டிற்குத் திரும்புவோரின் எண்ணிக்கை அதிக அளவில் இருக்கும் என்று எதிர்பார்க்கப்படுகின்றது. கிட்டத்தட்ட இரண்டு கோடிக்கும் மேற்பட்ட இந்தியர்கள், தற்போது சவூதி அரேபியாவில் வேலை செய்துவருகின்றனர். இவர்களில் ஏற்கனவே 18,000 பேருக்கும் மேற்பட்டோர் நாடு திரும்ப வேண்டி அவசர சான்றிதழுக்கு விண்ணப்பித்துள்ளனர். அவர்களுடைய பாஸ்போர்ட்டுகளையும் தங்களுக்கு ஆதரவளித்த ஸ்பான்சர்களிடம் ஒப்படைத்து விட்டனர். இந்த எண்ணிக்கை இன்னும் அதிகரிக்கும் என்று எதிர்பார்க்கப்படுகின்றது.

இரண்டு வாரங்களுக்கு முன்னால், இந்திய வெளியுறவுத்துறை அமைச்சர் வயலார் ரவியின் தலைமையில் ஒரு தூதுக்குழு சவூதி அரேபியா சென்றுவந்தது. அரசு நிடாகட் கொள்கையை செயல்படுத்தும் முன்னரே, இது குறித்த பிரச்சாரங்களே அங்கு பணியில் உள்ளவர்களை வெளியேறத் தூண்டுகின்றது, இதனால், இந்தியர்கள் மட்டுமல்லாது, அதிக அளவில் அயல்நாட்டவரும் சவுதியை விட்டு வெளியேறும் சூழல் உருவாகும் என்று வயலார் ரவி தெரிவித்தார்.

இதுபோல் வெளியேறும் மக்களுக்கு சவூதி அரசு சில சலுகைகளையும் அளித்துள்ளது. இதுவரை, 2,00,000க்கும் மேற்பட்டோர் சவுதியை விட்டு வெளியேறி உள்ளதாக தகவல்கள் தெரிவிக்கின்றன.

மாலைமலர்