சரப்ஜித் சிங் உடல் இந்திய அதிகாரிகளிடம் ஒப்படைப்பு

அமிர்தசரஸ்: லாகூர் சிறையில் சக கைதிகளால் தாக்கப்பட்டு உயிரிழந்த சரப்ஜித் சிங்கின் உடல், இந்திய அதிகாரிகளிடம் ஒப்படைக்கப்பட்டது.

பஞ்சாப் மாநிலம் அமிர்தசரசைச் சேர்ந்தவர் சரப்ஜித் சிங். இவரது மனைவி சுக்பிரீத் கவுர். இரண்டு பெண் குழந்தைகள் உள்ளனர். கடந்த 1990ம் ஆண்டு பாகிஸ்தானின் லாகூர் மற்றும் பைசலாபாத் ஆகிய நகரங்களில் நடந்த தொடர் குண்டுவெடிப்பில் 14 பேர் பலியாகினர். இவ்வழக்கில் சரப்ஜித் சிங்கை பாக்., அரசு குற்றவாளியாக சேர்த்தது. பின் கோட் லாக்பத் சிறையில் அடைக்கப்பட்டார். விசாரணையில் அவருக்கு மரண தண்டனையும் வழங்கப்பட்டது. ஆனால் சம்பவத்தின் போது தான் இந்தியாவில் இருந்ததாகவும், தண்டனையை குறைக்க வேண்டும் என்றும் சரப்ஜித் சிங் தரப்பில் கோரிக்கை விடப்பட்டது. இவரது குடும்பம் சார்பில் இந்திய மக்களிடம் கையெழுத்து வாங்கி, பாகிஸ்தானுக்கு தரப்பட்டது. மேலும் இந்திய அரசு சார்பிலும் சரப்ஜித் சிங்கை விடுதலை செய்ய முயற்சிகள் மேற்கொள்ளப்பட்டன.

இவருக்கு 2008ம் ஆண்டு மரண தண்டனை நிறைவேற்றுவதாக இருந்தது. ஆனால் அப்போதைய பாக்., பிரதமர் கிலானி இவரது தண்டனையை நிறுத்தி வைத்தார். 4 முறை சரப்ஜித் சிங் கருணை மனு தாக்கல் செய்தார். நான்குமே நிராகரிக்கப்பட்டது. 5வது முறையாக தாக்கல் செய்த கருணை மனுவை ஏற்று, மரண தண்டனையை, ஆயுள் தண்டனையாக குறைப்பதாகவும், அவர் இந்தியாவிடம் ஒப்படைப்பதாகவும் பாகிஸ்தான் அறிவித்தது. ஆனால் அவருக்குப்பதிலாக வேறு ஒருவரை விடுவிக்கவுள்ளதாகவும் கூறி பல்டியடித்தது.

இந்நிலையில், லாகூர் கோட் லாக்பத் சிறையில் இருந்த சரப்ஜித் சிங்கை கடந்த மாதம் 26ம் தேதி சக கைதிகள் தாக்கினர். இதில் தலையில் படுகாயமடைந்த சரப்ஜித் சிங், கோமா நிலைக்கு தள்ளப்பட்டார். லாகூர் ஜின்னா மருத்துவமனையில் அனுமதிக்கப்பட்டிருந்த அவரை இந்தியா அழைத்து வந்து சிகிச்சை அளிக்க வேண்டும் என அவரது குடும்பத்தினரும், மத்திய அரசும் விடுத்த கோரிக்கையை பாகிஸ்தான் நிராகரித்து விட்டது. இந்நிலையில், இன்று அதிகாலை சரப்ஜித் சிங் மருத்துவமனையில் உயிரிழந்து விட்டதாக டாக்டர்கள் தெரிவித்தனர். இந்த செய்தி இந்தியாவில் பெரும் அதிர்ச்சியை ஏற்படுத்தியது.

சரப்ஜித் சிங் குடும்பத்தினருக்கு மத்திய உள்துறை அமைச்சர் ஷிண்டே, காங்கிரஸ் துணைத்தலைவர் ராகுல் உள்ளிட்டோர் நேரில் ஆறுதல் கூறினர். பிரதமர் மன்மோகன் சிங் தனது இரங்கலைத் தெரிவித்தார். சரப்ஜித் சிங்குக்கு அரசு மரியாதை அளிக்கப்படும் என பஞ்சாப் முதல்வர் பிரகாஷ் சிங் பாதல் தெரிவித்தார்.

சரப்ஜித் குற்றவாளி அல்ல: சரப்ஜித் தொடர்பாக நிருபர்களிடம் பேசிய மத்திய வெளியுறவுத்துறை செய்தித்தொடர்பாளர் அக்பருதீன், சரப்ஜித் சிங்கை குற்றவாளியாக இந்தியா கருதவில்லை என்றும், அவ்வாறு கருதியிருந்தால் அவரை மீட்க நடவடிக்கை எடுத்திருக்காது என்றும் தெரிவித்துள்ளார். சரப்ஜித் சிங்கின் உடலை இந்தியா கொண்டு வருவதே அரசின் முதல் பணி என்றும், அவரது உடலுடன் தூதரக அதிகாரிகளும் உடன் வருவார்கள் என்றும் தெரிவித்தார். மேலும், சீனப்படைகள் ஊடுருவல் குறித்து அரசுத்துறைகளிடம் விவாதிக்கப்பட்டு வருவதாகவும், சீனப்படைகள் ஏப்ரல் 15ம் தேதிக்கு முந்தைய நிலைக்கு திரும்ப வேண்டும் என்றும் அவர் கோரிக்கை விடுத்தார்.

தனி விமானம்: இதனிடையே, சரப்ஜித் சிங்கின் உடலை கொண்டு வருவதற்காக ஏர் இந்தியாவின் சிறப்பு விமானம் லாகூர் சென்றது. லாகூரில் சரப்ஜித்தின் உடலை பாகிஸ்தான் அதிகாரிகள் இந்திய அதிகாரிகளிடம் ஒப்படைத்தனர்.

பாகிஸ்தான் உறுதி: சரப்ஜித் சிங்கின் மரணத்திற்கு காரணமானவர்கள் மீது கடும் நடவடிக்கை எடுக்கப்படும் என பாகிஸ்தான் அரசு உறுதியளித்துள்ளது.

நன்றி : தினமலர்