பச்சை குத்தினால் மஞ்சள் காமாலை!

உடலில் பச்சை குத்திக் கொண்டால் அழகு வரும். ஆபத்து வருமா? வரும் என்கிறது அண்மையில் சென்னையில் மருத்துவ வட்டாரங்களில் எடுக்கப்பட்ட ஆய்வு. அதன்படி, பச்சை குத்திக் கொள்வதால், மஞ்சள் காமாலை ஏற்படும் எனத் தெரிய வந்திருப்பதுதான் ஆதிர்ச்சி.

கால் நூற்றாண்டுக்கு முன்பே தமிழகத்தில் அறிமுகமான இந்த அழகு சிகிச்சைக்கு மிக நுண்ணிய ஊதிதான் மூலதனம். அது நுனியை ஒருவித மையில் தோய்த்து உடலில் கை, கால், முகம் என விரும்பிய இடத்தில், தேவையான வடிவத்தில் குத்திக் கொள்ளலாம். ஒருமுறை குத்திக் கொண்டால் அழிப்பது கடினம்.

ஊசியால் குத்தும்போது தோலின் மேற்பரப்பில் உண்டாகும் மெல்லிய துவாரங்கள் வழியாக உள்ளே புகுந்துவிடும் தொற்றுநோய் கிருமி உடலில் கடுமையான பாதிப்புகளை உருவாக்குவதாக அப்போதே பரபரப்பு கிளம்பியது. ஆனால், குடலுக்குள் நுழைந்து கல்லீரலை காலி செய்துவிடும் என்று வரும் தற்போதைய “பகீர்’ தகவல்களால் பச்சை குத்திக் கொள்பவர்களிடம் ஒருவித பீதி, பயம்.

இது குறித்து தோல் நோய் நிபுணர் ஒருவரிடம் பேசினோம். “பச்சை குத்த பயன்படுத்தும் ஊசி துருப்பிடிக்காத மிக மெல்லிய இரும்பினால் செய்யப்பட்டிருக்க வேண்டும். அடுத்து, ப்சை குத்த பயன்படுத்தும் மை முழுக்க ரசாயண சேர்மங்கள் நிறைந்தது. அந்த மையை ஒவ்வொரு முறையும் ஊசியில் தொட்டுத் தொட்டுத்தான் உடலில் வைப்பார்கள். இதில் கவனிக்க வேண்டிய விஷயம் என்ன தெரியுமா? தோலின் மெல்லிய மேற்பரப்பை ஊசியால் லேசாகச் சுரண்டி விரும்பிய வடிவம் கொண்டு வரப்பட வேண்டும். அதில் கொஞ்ம் பிசகினாலும் பேச்சு. சதைப் பகுதி கிழிந்து, ரத்தம் வெளியேறும். இதுதான் பிரச்னைக்குப் பிள்ளையார் சுழி. இந்த துவாரம் வழியாக உள்ளே நுழையும் தொற்றுநோய் கிருமிகள் தான் வில்லன்கள். அவை குடலுக்குள் போய் கல்லீரலைப் பதம் பார்க்கும் ஆபத்து உண்டு’ என்கிறார்.

அழகுக் கலை நிபுணர் சங்கீதாவிடம் கேட்டோம். “ஒரு ஊசி என்றால் பிரச்னை இருக்காது. ஆனால் ஐந்தாறு ஊசிகளை ஒன்றிணைத்து பச்சை குத்தும்போது கவனம் தேவை.

ஒரு அங்குல் பச்சை குத்த குறைந்தபட்ச செலவு 1500 ரூபாய். மலேசியா, சிங்கப்பூர் உள்ளிட்ட தெற்காசிய நாடுகளில் புருவம், நெற்றியில் பச்சை குத்துவது இப்ப அதிகரிச்சிருக்கு. ஒருவகையில் இது ஆபத்துதான். அதேபோல், ஒருவருக்கு பச்சை குத்த பயண்படுத்திய மையை சேமிச்சு வச்சு அடுத்தவருக்குப் போடுவாங்க. இது தவறு. இதனால் கிருமிகள் எளிதில் மற்றவர்களுக்கு பரவும்!’ என எச்சரிக்கும் தொனியில் சொல்லும் சங்கீதா, “முறையான பயிற்சி எடுத்தவர்களிடம் மட்டுமே பச்சை குத்திக் கொள்வது நல்லது!’ என்றார்.

பச்சை குத்தும் போது வெளியேறும் ரத்தம் உடனே காய்ந்துவிடும். அதனால் பயமில்லை. இருந்தாலும், சுத்தம் செய்யப்படாத ஊசி, மையை பயன்படுத்தினால் நிலைமை தொல்லைதான்... அதன் வழியாக கிருமிகள் ஊடுருவும். இதில் ஒரு நல்ல விஷயம் இருக்கு. அது... மஞ்சள் காமாலையை உருவாக்கும் கிருமிகளில் “ஆ’ வகைக்கு தடுப்பு மருந்து வந்திருச்சு. ஆனால் “இ’ வகையை கட்டுப்படுத்த இதுவரை தடுப்பு மருந்து கண்டுபிடிக்கப் படவில்லை.

சரி, இதற்கு என்னதான் வழி? என்ன சொல்கிறார் குடல் நிபுணர் மாறன் மாரியப்பன்.

“பச்சை குத்துவதில் அடிப்படை ஆபத்தே தொற்றும் “இ’ வகை கிருமிகள் தான். பொதுவாக 1000 மி.லி. ரத்தத்தில் இருக்கும் பிற வகையை விட இந்த “இ’ வகை தொற்றுநோய் கிருமிகளின் எண்ணிக்கை அதிகமிருக்கும். அழிக்க முடியாது. மஞ்சள் காமாலை முதல் ஏப்பு வரை பாதிப்புகளையும் பட்டியலிட முடியாது!’ என்கிறார்.

தடுப்பது எப்படி?

பச்சை குத்த பயன்படுத்தப்படுவது கிருமி நீக்கிய ஊசிதானா என்பதை உறுதி செய்யுங்கள்.
குத்தி முடித்தவுடன் அழுந்தத் தேய்க்கக்கூடாது. சொரியக்கூடாது.
ஒரு வாரம் வரை ஈரமாக இருக்கும்படி பார்த்துக் கொள்வதோடு, உலராமல் பாதுகாப்பதும் முக்கியம்.
ஒவ்வாமை, எரிச்சல் உள்ளிட்ட பாதிப்பு இருப்பவர்கள் போதிய பயிற்சி பெற்றவர்களிடம் மட்டுமே பச்சை குத்திக் கொள்வது நல்லது.

- எஸ். அன்வர்

இந்த மஞ்சக் காமாலை பச்சைக் காமாலைன்னு சொல்றாங்க!!!