" உயிர் வாழ எள்ளளவும் ஆசையில்லை "

பூர்ணகுரு · பூர்ணகுரு Fri Apr 05, 2013 3:45 pm

என்னை பிடிக்கவில்லை என்றாயே

வேறு எதற்கும் எவருக்கும் பிடிக்காதென்றாயே

இதோ!

உன்னைத் தவிர

என்னை பிடித்தவை அனைத்தும் பட்டியலிடுகிறேன்

கேள் !

உயிர் வாழ எள்ளளவும் ஆசையில்லை - ஆனாலும்

இந்தப் பாழாய்ப் போன இதயம்

துடித்துக் கொண்டே இருக்கிறது

எனக்காக !

வெற்றி எனும் வார்த்தை பெயரளவில் மட்டுமே - ஏனெனில்

இந்தத் தோல்விக்கு என் மேல் கொள்ளை ஆசை

நான் எங்கு சென்றாலும் நிழல்போல தொடர்ந்து வரும்

எனக்காக !

மதி என்பது இருந்தும் இல்லாத

நானென்றால் இந்த விதிக்குக் கொள்ளைப் பிரியம்

என்னை ஆட்டிப் படைக்கிறது

எனக்காக !

நேரத்தை சரியாக செலவிடத் தெரியாத

என் மீது இந்தக் காலத்திற்கு அத்தனை விருப்பம்

வீணாக விரைந்து ஓடுகிறது

எனக்காக !

நேசிக்கத் தெரியாத என் மேல்

இந்த மோகத்திற்கு அத்தனை காமம்

என் இளமையை பாடாய் படுத்துகிறது

எனக்காக !

வாழ்க்கையை வாழத் தெரியாத என்னிடம்

இந்த வாழ்க்கைக்கு எல்லையில்லா ஆர்வம்

தேவை இல்லாமல் வாழ்ந்து கொண்டிருக்கிறது

எனக்காக !

எல்லாவற்றிற்கும் மணிமகுடமாக

காதலிக்கவேத் தெரியாத என் மீது

இந்தக் காதலுக்கு உயிர்க் காதல்

உன்னை மறக்கவே செய்யாமல் வாட்டுகிறது

எனக்காக !

இப்படி

எல்லாமே எனக்காக இருக்க

நீ என்னை பிடிக்கவில்லை என்பது எதற்காக ...?

இவை அனைத்தையும்

நான் அனுபவிக்க வேண்டும்

அதற்காகவோ ...?