உருவு கண்டு எள்ளாமை வேண்டும்!

ஒளிந்திருந்து காக்கும் ஒற்றன்
சென்ற மாதம் மும்பையில் எஸ்கே பிரதர்ஸ் என்கிற கட்டுமான நிறுவனத்தின் அதிபர் தன் காரை பார்க்கிங்செய்யும்போது சில ரவுடிகளால் சுடப்பட்டு கொலை செய்யப்பட்டார். காவல்துறை சில நாட்களிலேயே குற்றவாளிகளைக் கண்டுபிடித்தது. பார்க்கிங்கில் பொருத்தப்பட்டிருந்த கண்காணிப்பு கேமரா, ரவுடிகளை காட்டிக்கொடுத்தது.
முன்பெல்லாம் கண்ணுக்குத் தெரிகிற வகையில் மிகப் பெரிய அளவில் இருந்த கண்காணிப்பு கேமராக்கள் இன்று மிகச் சிறியதாக நம் பார்வையிலேயே சிக்காத அளவுக்கு அமைக்கப்படுகின்றன. இது குற்றங்களைத் தடுப்பதில் மிக முக்கியப் பங்காற்றுகிறது. விரல்நுனியில் அடங்கிவிடக்கூடிய மிகச் சிறிய கேமராக்களும் வந்துவிட்டன. இன்று பேனாவில் கேமரா, கண்கண்ணாடியில் கேமரா, சட்டை பொத்தானில் கேமரா, கடிகார கேமரா, சிகரெட் லைட்டரில் கேமரா என்று ஜேம்ஸ்பாண்ட் மட்டுமே உபயோகித்துக் கொண்டிருந்த சகல வித கேமரா வகைகளும் பர்மா பஜாரில் கிடைக்கின்றன.
-
உள்ளங்கையில் நூலகம்!

சில வருடங்களுக்கு முன்புவரை வீடு கட்டும்போதே படிப்பதற்கென்று தனி அறை கட்டுவார்கள். இப்போது அந்தக் கலாச்சாரம் கிட்டத்தட்ட காணாமல் போய்விட்டது. ஆனால், இன்றும் படிக்கிற ஆர்வம் மட்டும் நம்மிடையே ஓரளவு மிச்சமிருக்கிறது. என்ன செய்ய? நம்முடைய வீடுகள் சுருங்கிவிட்டன. நிறைய புத்தகங்களை அடுக்கி வைக்கவோ அதைப் பாதுகாக்கவோ இயலாது. அதுமாதிரியான புத்தகப் புழுக்களுக்கென்று வரப்பிரசாதமாக வந்திருப்பதுதான் ஈ-புக் ரீடர்ஸ்.
லட்சக்கணக்கான புத்தகங்களை ஒரு டேப்லெட் கணினியின் உதவியோடு படிக்கலாம். புத்தகங்கள் படிப்பதற்கென்றே அமேசானின்கிண்டுல் (KINDLE), சோனி நிறுவனத்தின் ரீடர், சாம்சங்கின் பாப்பிரஸ் என்று பிரத்யேக ரீடர்களும் கிடைக்கின்றன. அல்லது உங்களிடம் ஓர் ஆப்பிள் ஐபோன் அல்லது ஐபேட் அல்லது ஆண்ட்ராய்டு செல்போனோ டேப்லெட்டோ இருந்தாலும் கூட புத்தகங்களை அதற்கேற்ற மென்பொருள்களின் உதவியோடு படிக்க இயலும். இன்று மொபைல் போனிலேயே செய்தித்தாள் படிக்கிறவர்கள் எண்ணிக்கை அதிகரித்துள்ளது.
-
கூகுள் காகுள்!
செல்போன்கள் எப்படி உலகத்தையே புரட்டிப் போட்டதோ அதற்கிணையான மாற்றத்தை கூகுளின் இந்த மூக்குக்கண்ணாடி செய்யப்போகிறது என்கிறார்கள் தொழில்நுட்ப வல்லுநர்கள். கைகளில் செல்போனை தூக்கிக்கொண்டு செல்வதையே பெரிய வேலையாக நினைப்பவர்களுக்கு பொக்கிஷமாக வரப்போகிறது இந்த கூகுள் காகுள். சாதாரணக் கண் கண்ணாடியைப்போலவே இருக்கிறஇதில், போன் பேசலாம், வீடியோஎடுக்கலாம், போட்டோ பிடிக்கலாம், இண்டர்நெட்டில் காதலியோடு சாட்டிங்கும் பண்ணலாம், யூ டியூபில் HD தரத்தில் புத்தம்புதுப் படங்கள் பார்க்கலாம், கேம்ஸ் ஆடலாம்.
ஏற்கெனவே அமெரிக்கர்களில் சிலரைத் தேர்ந்தெடுத்து ஆளுக்கொரு கண்ணாடியைக் கொடுத்து இதற்கான சோதனைகளை தொடங்கிவிட்டது கூகுள்! இன்னும் என்னென்ன வசதிகள் சேர்க்கலாம் என ஆராய்ச்சிகளை மேற்கொண்டுள்ளது. எப்படியும் அடுத்த ஆண்டு நம்மூர் சந்தையில் இந்தக் கண்ணாடி கிடைக்கும் என்று தெரிகிறது. கூகுள் கஷ்டப்பட்டு இப்படி ஓர் ஆராய்ச்சி செய்யும்போதே சீனா, கொரியாவிலும் இதற்கெனமலிவு விலை கண்ணாடிகள் உற்பத்தியும் தொடங்கிவிட்டதாகக் கூறுகிறார்கள். அடுத்த ஆண்டில் நம்மூர் பர்மா பஜாரிலேயே இந்தக் கண்ணாடி மொபைல் போன்களை 500 ரூபாய்க்கு காணமுடியும் என நம்பலாம்.
-
கணினியாய் மாறும் டி.வி.
உங்கள் வீட்டில் HDMI டி.வி., இருக்கிறதா? இல்லையென்றால், ஒன்றை வாங்கிவிடுங்கள். இப்போதெல்லாம் அந்த ரக டி.வி.க்கள்தான் அதிகமாக விற்கப்படுகின்றன. இவ்வகை டி.வி. உங்களிடமிருந்தால், அதனை ஒரு மினி டி.வி. ஸ்டிக் என்கிற குட்டி உபகரணத்தின் உதவியோடு கணினியாக மாற்றிவிட இயலும்! இதில் ஆண்ட்ராய்டு மாதிரியான பல்வேறு இயங்குதளங்களையும்பயன்படுத்த இயலும். இதில் WIFI வசதியும் இருப்பதால், இணையமெங்கும் சுற்றலாம். உங்கள் டி.வி.யிலேயே மின்னஞ்சல் பார்க்கலாம். உங்கள் புகைப்படங்களை சேமிக்கலாம். இந்த மினி டி.வி. ஸ்டிக்கிலேயே யுஎஸ்பிவசதியிருப்பதால் கீ போர்டு,மௌஸ் கூட இணைத்துக்கொண்டால் உங்கள் டி.வி.யே முழுமையான கணினியாகமாறிவிடும். மெகா சீரியல் போரடிக்கும்போது ஃபேஸ்புக்கில் ஸ்டேடஸ் போடலாம்!
-
பாக்கெட் பிரிண்டர்
இப்போதெல்லாம் எல்லோரும் போட்டோ பிடிக்கத் துவங்கி விட்டோம். செல்போனில் கேமராவந்தபிறகு ஸ்டூடியோவுக்கு சென்று படம் பிடித்துக் கொள்வதெல்லாம் மலையேறிப் போச்சு! ஆனாலும் இன்னமும் நம்முடைய பிரத்யேக நிகழ்வுகளை போட்டோ பிடித்து, பிரிண்ட் போட்டு வைத்துக்கொள்ளவே செய்கிறோம். அப்படிப் பட்டவர்களுக்காகவே எல்ஜி நிறுவனம் பாக்கெட் பிரிண்டர் என்ற ஒன்றை அறிமுகப்படுத்தியுள்ளது. 5 இஞ்ச் உயரமும் 3 இஞ்ச் அகலமும் கொண்ட இந்த பிரிண்டரோடு உங்கள் மொபைலை இணைத்து, வேண்டிய படங்களை உடனுக்குடன் பிரிண்ட் பண்ணிக் கொள்ளலாம். இது ஜீரோ இங்க் டெக்னாலஜியை பயன்படுத்துகிறது. அதாவது, போட்டோ பேப்பரில் இருக்கிற டைகிரிஸ்டல்களை வேண்டிய நிறங்களுக்கு சூடாக்கி மாற்றிக்கொண்டு பிரிண்ட் போட்டுக் கொடுத்து விடுமாம். காட்ரிஜ் மாற்றவும் தேவையில்லை.
-
உடல்நலத்தைக் கண்காணிக்கும் இயர் போன்:
ரிவர்ஆன் என்னும் அமெரிக்க நிறுவனம் புதுவிதமான இயர் போன்களை உருவாக்கியுள்ளது. இது நீங்கள் காலையில் வாக்கிங்கோ, ஜாக்கிங்கோ, உடற்பயிற்சியோ எது செய்வதாக இருந்தாலும் ஜாலியாக பாட்டுக்கேட்க உதவும். அதானே எல்லா இயர் போனும் செய்கிறது என்று நினைக்கலாம். இது பாட்டுக் கேட்க மட்டுமல்ல, உடற்பயிற்சியின்போது உங்கள் இதயத்துடிப்பு, ரத்தஅழுத்தம், கலோரிகள் குறைவதுஎனப் பல்வேறு உடல்நலம் சார்ந்த விஷயங்களையும் கண்காணித்து உங்களுக்குச் சொல்லும். இந்த ஆண்டு சினெட் நிறுவனம் நடத்திய போட்டியில் இந்தக் கண்டுபிடிப்பு விருதுகளை வென்றுள்ளது. விரைவில் சந்தையில் கிடைக்குமாம்!
-
புதிய தலைமுறை