ஐ .பி .எல் - 6 மகுடம் யாருக்கு ?

பெங்களூர் 'அவுட்'... பிளே ஆபுக்குள் நுழைந்தது சன்ரைசர்ஸ் ஹைதராபாத்


ஹைதராபாத்: 6வது ஐபிஎல் தொடரிலிருந்து வெளியேற்றப்பட்டுள்ளது ராயல் சேலஞ்சர்ஸ் பெங்களூர். நேற்றைய போட்டியில் கொல்கத்தா நைட் ரைடர்ஸ் அணியை வீழ்த்தியதன் மூலம் பிளே ஆப் பிரிவுக்குள் நுழைந்து விட்டது சன் ரைசர்ஸ் ஹைதராபாத் அணி.

இதையடுத்து பிளே ஆப் போட்டிகளில் சென்னை சூப்பர் கிங்ஸும், மும்பை இந்தியன்ஸும் ஒரு போட்டியில் மோதுகின்றன. இன்னொரு போட்டியில், ராஜஸ்தான் ராயல்ஸும், சன்ரைசர்ஸ் ஹைதராபாத்தும் மோதுகின்றன.

முன்னதாக பிளே ஆப் பிரிவுக்குத் தகுதி பெறும் நான்கு அணிகளில் 3 அணிகள் மட்டுமே உறுதியாகியிருந்தன. அவை சென்னை, மும்பை மற்றும் ராஜஸ்தான். 4வது அணிக்கான போட்டியில் பெங்களூர் மற்றும் ஹைதராபாத் ஆகியவை கடுமையான மோதலில் இருந்தன.



நேற்று நடந்த போட்டியில் ஹைதராபாத் வென்றால் பிளே ஆப்புக்குள் நுழையலாம் என்ற நிலை. ஒருவேளை தோற்றால் நெட்ரன்ரேட் அடிப்படையில் பெங்களூர் உள்ளே புகுந்து விடக் கூடிய சூழ்நிலை. இதனால் நேற்று இரு அணிகளின் ரசிகர்களும் பதைபதைப்புடன் இருந்தனர். இருப்பினும் ஹைதராபாத் அணி நேற்று சிறப்பாக ஆடி கொல்க்ததாவை வென்று தனது ரசிகர்களை உற்சாகக் கடலில் மூழ்கடித்தது. பெங்களூர் ரசிகர்கள் பெரும் சோகத்தில் மூழ்கினர்.

சன்ரைசர்ஸ் ஹைதராபாத் அணி இந்த ஆண்டுதான் உருவாக்கப்பட்டது. இதற்கு முன்பு வரை அது டெக்கான் சார்ஜர்ஸ் என்ற பெயரில் இருந்தது. உருவாக்கப்பட்ட முதல் ஆண்டிலேயே அது தனது சிறப்பான ஆட்டத்தால் பிளே ஆப் பிரிவுக்குள் நுழைந்திருப்பது குறிப்பிடத்தக்கது.

முதல் ப்ளே ஆஃப்: சென்னை சூப்பர் கிங்ஸ்- மும்பை இந்தியன்ஸ் இன்று மோதல்!

டெல்லி: ஐ.பி.எல். 20 ஓவர் கிரிக்கெட் போட்டியில் இன்று நடைபெறும் இறுதிப்போட்டிக்கு முந்தைய தகுதி சுற்று (பிளே-ஆப்) ஆட்டத்தில் சென்னை சூப்பர் கிங்ஸ்-மும்பை இந்தியன்ஸ் அணிகள் மோதுகின்றன.

இந்தப் போட்டி டெல்லியில் இன்று மாலை 8 மணிக்கு நடக்கிறது. 6-வது ஐ.பி.எல். 20 ஓவர் கிரிக்கெட் போட்டியில் நேற்று முன் தினத்துடன் லீக் ஆட்டங்கள் முடிவடைந்தன. இதன் முடிவில் சென்னை சூப்பர் கிங்ஸ், மும்பை இந்தியன்ஸ், ராஜஸ்தான் ராயல்ஸ், ஹைதராபாத் சன் ரைசர்ஸ் ஆகிய 4 அணிகள் இறுதிபோட்டிக்கு முந்தைய சுற்றுக்கு (பிளே-ஆப்) தகுதி பெற்றன.

இன்று (செவ்வாய்க்கிழமை) நடைபெறும் இறுதிப்போட்டிக்கான முதல் தகுதி சுற்றில், புள்ளி பட்டியலில் முதலிடம் பிடித்த சென்னை சூப்பர் கிங்ஸ், 2வது இடம் பெற்ற மும்பை இந்தியன்ஸ் அணிகள் மோதுகின்றன.

டோணி தலைமையிலான சென்னை சூப்பர் கிங்ஸ் அணி 16 லீக் ஆட்டங்களில் விளையாடி 11 வெற்றி கள், 5 தோல்விகளுடன் 22 புள்ளிகள் பெற்றது. ரன் ரேட் (+0.530) அடிப்படையில் முதலிடம் பெற்று பிளே-ஆப் சுற்றுக்கு முன்னேறியது.

ரோகித் ஷர்மா தலைமையிலான மும்பை இந்தியன்ஸ் அணி 16 லீக் ஆட்டத்தில் விளையாடி 11 வெற்றி, 5 தோல்விகளுடன் 22 புள்ளிகள் பெற்றது. ரன்ரேட் (+0.441) அடிப்படையில் புள்ளி பட்டியலில் 2-வது இடம் பெற்று பிளே-ஆப் சுற்றுக்கு தகுதி பெற்றது.

மும்பை இந்தியன்ஸ் அணி தனது 2 லீக் ஆட்டங்களிலும் முறையே 9 ரன் மற்றும் 60 ரன் வித்தியாசத்தில் சென்னை அணியை வீழ்த்தியுள்ளது. மும்பை அணி தனது கடைசி லீக் ஆட்டத்தில் பஞ்சாபிடம் 50 ரன் வித்தியாசத்திலும், சென்னை அணி தனது கடைசி லீக் ஆட்டத்தில் 24 ரன் வித்தியாசத்தில் பெங்களூரிடமும் தோல்வி கண்டுள்ளது.

முந்தைய தோல்வியில் இருந்து மீள இரு அணிகளுமே முயற்சிக்கும்.

சென்னை அணியில் மைக்ஹஸ்ஸி, கேப்டன் டோனி, விஜய், சுரேஷ்ரெய்னா, ரவீந்திர ஜடேஜா, பிராவோ ஆகிய பேட்ஸ்மேன்களும், அல்பிமோர்கல், அஸ்வின், மொகித் ஷர்மா, ஹோல்டர் ஆகிய பந்து வீச்சாளர்களும் நல்ல ஃபார்மில் இருக்கிறார்கள். மும்பை அணியில் அம்பத்தி ராயுடு, தினேஷ் கார்த்திக், பொல்லார்ட், கேப்டன் ரோகித் ஷர்மா ஆகியோர் பேட்டிங்கிலும், ஹர்பஜன்சிங், மலிங்கா, குல்கர்னி, ஜான்சன் ஆகியோர் பந்து வீச்சிலும் ஃபார்மில் உள்ளனர்.

டெண்டுல்கர் கைவிரலில் ஏற்பட்ட காயம் காரணமாக கடந்த 2 ஆட்டத்தில் ஆடவில்லை. இந்த ஆட்டத்தில் அவர் அணிக்கு திரும்புவார் என்று எதிர்பார்க்கப்படுகிறது. ஐ.பி.எல். போட்டி வரலாற்றில் இரு அணிகளும் இதுவரை 13 முறை நேருக்கு நேர் மோதி உள்ளன.

இதில் சென்னை அணி 5 முறையும், மும்பை அணி 8 முறையும் வெற்றி பெற்றுள்ளது குறிப்பிடத்தக்கது. சோனிசெட்மேக்ஸ் மற்றும் சோனி சிக்ஸ் டெலிவிஷனில் இந்தப் போட்டியை இன்று நேரடியாகப் பார்க்கலாம்.


-தட்ஸ்தமிழ்