ஐ .பி .எல் - 6 மகுடம் யாருக்கு ?

சென்னை சூப்பர் கிங்ஸ்– புனே வாரியர்ஸ் இன்று மோதல்

புனே: ஐ.பி.எல்., தொடரில் இன்று புனேயில் நடக்கவுள்ள லீக் போட்டியில், சென்னை சூப்பர் கிங்ஸ், புனே வாரியர்ஸ் அணிகள் மீண்டும் மோதுகின்றன. ஏற்கனவே சென்னையில் நடந்த லீக் போட்டியில் புனே அணியிடம் தோற்ற சென்னை அணி அதற்கு பழி தீர்த்துக் கொள்ளுமா? என்று ரசிகர்கள் எதிர்பார்க்கின்றனர்.

வலுவான சென்னை அணி

சென்னை அணியை பொறுத்தவரை 7 வெற்றிகளுடன் வலுவான நிலையில் உள்ளது. சிறப்பான பேட்டிங்கை வெளிப்படுத்தி வரும் மைக்கேல் ஹசி (8 போட்டி, 445 ரன்கள்) இதுவரை 4 அரைசதம் அடித்துள்ளார். இவருடன் களமிறங்கிய சகா அதிரடியாக ரன்கள் சேர்த்தது, துவக்க ஜோடி பிரச்னையை தீர்ந்து வைத்துள்ளார்.

பேட்டிங் பலம்

"மிடில் ஆர்டரில்' வரும் ரெய்னா, "மேட்ச் வின்னராக' ஜொலித்தால் நன்றாக இருக்கும். இவர்களுடன் கேப்டன் டோணி ரன்வேட்டை தொடரவாய்ப்பு உள்ளது. மேலும் பத்ரிநாத், "ஆல்-ரவுண்டர்' பிராவோ, ரவிந்திர ஜடேஜாவும் பின்வரிசை வீரர்களும் சிறப்பான நிலையில் உள்ளனர்.

பந்து வீச்சில் கவனம் டோணி

சென்னை அணியின் பந்து வீச்சுதான் மோசமான நிலையில் உள்ளது. எதிர் அணியினர் பந்தை அடித்து ரன் எடுப்பதை விட இவர்கள் அதிகமாக கொடுக்கின்றனர். கடந்த இரு போட்டிகளில் கடைசி 5 ஓவர்களில், ஐதராபாத்துக்கு எதிராக 63, கோல்கட்டாவுக்கு எதிராக 60 என, ரன்களை வாரி வழங்கினர். இதைத் தவிர்க்க முயற்சிக்க வேண்டும். கடந்த போட்டியில் 4 ஓவரில் 50 ரன்கள் கொடுத்த நானசிற்குப் பதில், ஹில்பெனாசை களமிறக்கி பார்க்கலாம்.

வெளியேற வாய்ப்பு

புனே அணி இதுவரை விளையாடிய 9 போட்டியில் 2ல் மட்டும் வென்று, 7ல் தோற்றுள்ளது. கேப்டன் பின்ச், ஸ்டீவன் ஸ்மித் மட்டும் பேட்டிங்கில் நம்பிக்கை தருகின்றனர். உத்தப்பா நல்ல துவக்கம் தந்தாலும், அதேவேகத்தில் அவுட்டாவது சிக்கலைத் தருகிறது. இனி மீதமுள்ள 7 போட்டிகளிலும் வெற்றி பெற்றால் மட்டுமே, அடுத்த சுற்று குறித்து யோசிக்க முடியும்.

யுவராஜ் ஏமாற்றம்

"மிடில் ஆர்டரில்' பெரிதும் எதிர்பார்க்கப்பட்ட யுவராஜ் சிங், 6 போட்டியில் 135 ரன்கள் மட்டும் எடுத்து ஏமாற்றுகிறார்.

புவனேஷ்வர் கவனம்

ஏற்கனவே சென்னையில் நடந்த லீக் போட்டியில் புனே அணி வென்றது. இதற்கு இன்று சென்னை அணி பழிதீர்க்கும் என்று எதிர்பார்ப்பு நிலவுவதால் இன்றைய ஆட்டம் விறுவிறுப்பாக இருக்கும் எதிர்பார்க்கப்படுகிறது. கடந்த முறை சென்னைக்கு எதிரான போட்டியில் பெரும் சிக்கலை கொடுத்த வேகப்பந்து வீச்சாளர் புவனேஷ்வர் குமார் இன்றும் இவர் சிக்கலை ஏற்படுத்தலாம். இவருடன் சேர்ந்து டிண்டா மிட்சல் மார்ஷ் சாதிக்க காத்திருக்கின்றனர். சென்னை - புனே ஐபிஎல் வரலாற்றில் சென்னை, புனே அணிகள் இதுவரை மொத்தம் 5 போட்டிகளில் மோதியுள்ளன. இதில் 3 ல் சென்னை வென்றது. 2ல் புனே வெற்றிபெற்றது. புனே மைதானத்தில் இவ்விரு அணிகள் மோதிய 2 போட்டிகளில், சென்னை, புனே அணிகள் தலா ஒரு வெற்றி பெற்றன.

இன்றைய போட்டியில் சென்னை அணி வென்று பழி தீர்க்குமா? அல்லது புனே அணி வென்று கணக்கை நேர் செய்யுமா என்று எதிர்பார்ப்பை ஏற்படுத்தியுள்ளது.

--தட்ஸ்தமிழ்