மாற்றுத்திறனாளி மகளை தினமும் முதுகில் சுமக்கும் தாய்.......

DERAR BABU · DERAR BABU Tue Mar 26, 2013 6:28 pm

ஈரோடு மாவட்டம் பெருந்துறை அருகே உள்ள நிச்சாம்பாளையத்தை சேர்ந்தவர் தேவி (வயது 20). 7-ம் வகுப்பு வரை படித்துள்ளார். அதற்கு மேல் படிக்க வைக்க அவரது ஏழ்மையான பெற்றோர்களால் முடியவில்லை.

தேவி பிறவியிலேயே மாற்றுத்திறனாளியாக பிறந்தார். 2 கால்களும் சூம்பி மடங்கி இருப்பதால் அவரால் நடக்க முடியாமல் 2 கைகளையும் தரையில் ஊன்றிதான் தவழ்ந்து செல்வார்.

மாற்றுத்திறனாளியாக இருந்தாலும் தேவி ஊனத்தை பற்றி கவலைப்படாமல் வேலைக்கு போய் வருகிறார். தனது வீட்டிலிருந்து சுமார் 2 கிலோ மீட்டர் தூரத்தில் உள்ள துணி ஏற்றுமதி நிறுவனத்தில் பணிபுரிந்து வருகிறார். அதில் கிடைக்கும் வருமானத்தை வைத்து தனது வயதான பெற்றோரை கவனித்து வருகிறார்.

தேவி வேலைக்கு போகும்போது தனது 3 சக்கர சைக்கிளில் வேலைக்கு போய் வந்தார். ஆனால் இப்போது பலமாதமாக அவரது மூன்று சக்கர சைக்கிள் 'ரிப்பேர்' ஆகி விட்டதால் சைக்கிளில் போக முடியவில்லை. பக்கத்து ஊருக்கோ அல்லது ஏதோ ஒரு நல்லது கெட்டதுக்கோ என்றால் கூட அவரது வயதான அம்மாதான் மகளை தனது முதுகில் தூக்கி வைத்து சுமந்து செல்வார்.

இப்போது வேலைக்கு செல்ல மகள் தேவியை அவரது தாயார் தனது முதுகில் தூக்கி சுமந்து கொண்டு வருகிறார். வேலை முடிந்து வரும் போதும் மகளை சுமந்து கொண்டுதான் அந்த வயதான தாய் வருகிறார்.

10 மாதம் வயிற்றில் சுமந்த அந்த தாய் தினமும் இப்போது தனது மகளை முதுகில் சுமந்து செல்கிறார். இதை பார்ப்போர் கண்கள் கலங்கதான் செய்கிறது. மூன்று சக்கர சைக்கிளை பழுது பார்க்க முடியாததால் தேவி தனக்கு 3 சக்கர மோட்டார் வாகனம் கேட்டு நேற்று ஈரோடு மாவட்ட கலெக்டர் அலுவலகத்தில் நடந்த மக்கள் குறை தீர்க்கும் கூட்டத்தில் கலந்து கொண்டார்.

வழக்கம்போல் அவரது தாயாரே மகளை தன் முதுகில் சுமந்து கொண்டு வந்தார். கலெக்டர் அலுவலகத்தில் கலெக்டர் சண்முகத்திடம் தனக்கு 3 சக்கர வாகனம் கேட்டு தேவி மனு கொடுத்தார். மூன்று சக்கர சைக்கிள் பழுதாகி விட்டது. அதை ரிப்பேர் செய்ய கூட முடியாது. தாங்கள் மூன்று சக்கர வாகனம் கொடுத்து உதவி செய்தால் வாழ்நாள் முழுவதும் அதில் வேலைக்கு சென்று என் அம்மாவையும், அப்பாவையும் நல்லபடியாக பார்த்து கொள்வேன் என்று மனுவில் கேட்டுக் கொண்டுள்ளார்.

நல்ல திடகாத்திரமான பிள்ளைகள் இருந்தாலும் பெற்றோரை கவனிக்காமல் எத்தனையோ பேர் இருக்க மாற்றுத்திறனாளியான தேவி வயதான பெற்றோரை நல்லபடியாக பார்த்து கொள்ள வேலைக்கு சென்று வருகிறார். அவரை வயதான தாய் முதுகில் சுமந்து செல்கிறார்... நிச்சயம் இந்த சுமை தீர தேவிக்கு அவரது கோரிக்கை நிறைவேறும் என்பது திண்ணம்.

மாலைமலர்