கல்வி ஒன்றுதான் இந்தியாவை வல்லரசாக்க முடியும்: வைரமுத்து

கல்வி ஒன்றுதான் இந்தியாவை வல்லரசாக்க முடியும் என்று கவிஞர் வைரமுத்து பேசினார்.

சிங்கம்புணரி எஸ்.எஸ். மெட்ரிக். பள்ளியின் 3 ஆம் ஆண்டு விழா வெள்ளிக்கிழமை நடைபெற்றது. இதில் அவர் பேசியதாவது:

நூறு ஆண்டுகள் வாழ்ந்து தமிழுக்கு பணி செய்ய விரும்புகிறேன். மற்ற தொழில்களில் முதலீடு செய்தால் அவர்களது குடும்பம் மட்டுமே பயன்பெற முடியும். கல்வியில் முதலீடு செய்வோருக்கு அவர்கள் மட்டுமின்றி பலர் பயன்பெற்று தலைமுறைகள் வாழ்த்தும்.

வேளாண், தொழில் புரட்சிக்குப் பிறகு தற்போது மனிதன் கல்வி யுகத்திற்கு வந்துள்ளான். பள்ளிகளில் ஆசிரியர்களை மாணவர்கள் நேசிக்க வேண்டும். பள்ளியில் முதல் மதிப்பெண் எடுக்கும் மாணவனை நேசிப்பதைவிட கடைசி மதிப்பெண் எடுப்பவனை ஆசிரியர்கள் நேசிக்க வேண்டும்.

சிந்திக்கும் ஆற்றல் மாணவர்களுக்கு வளர்ந்து வருகிறது. குழந்தைகளுக்கு பெற்றோர்கள் முதலில் சுகாதாரத்தை கற்றுக் கொடுக்க வேண்டும். கை கொடுக்கும் பழக்கத்தை விடுத்து கை கூப்பி வணக்கம் சொல்லும் பழக்கத்தைக் கற்றுக் கொடுங்கள். அதுதான் தமிழ் கலாசாரம். கை கொடுப்பது ஐரோப்பிய கலாசாரம்.

மொழிகள் இனம், கலாசாரத்தின் அடையாளம். தமிழ் மொழியை முழுமையாகக் கற்ற பின்னர் மற்ற மொழிகளை கற்றுக் கொள்ளுங்கள். மூட நம்பிக்கையை ஒழிக்க கல்வி பயன்பட வேண்டும்.

இன்னும் 25 ஆண்டுகளில் விஞ்ஞானப் புரட்சி ஏற்படும். அடுத்த நூற்றாண்டில் உலகில் இரண்டே வல்லரசுகள்தான் இருக்கும். ஒன்று சீனா, மற்றொன்று இந்தியா.

இதில் முதலிடத்தை இந்தியாவே பிடிக்கும். ஏனென்றால் சீனாவில் 60 சதவிகிதம் பேர் முதியவர்கள், 40 சதவிகிதம் பேர் இளைஞர்கள். இந்தியாவில் 60 சதவிகிதம் பேர் இளைஞர்கள், 40 சதவிகிதம் பேர் முதியோர்கள். மாணவர்கள் ஆசிரியர்களை மறந்து விடக்கூடாது என்றார் வைரமுத்து.

முன்னதாக யு.கே.ஜி. மாணவர்களுக்கு பட்டமளித்து முனைவர் ஞானசம்பந்தம் சிறப்புரையாற்றினார். விழாவிற்கு பள்ளித் தாளாளர் செந்தில்குமார் தலைமை வகித்தார். பள்ளிச் செயலர் சந்திரசேகர் முன்னிலை வகித்தார். பள்ளி முதல்வர் வன்னியராஜ் வரவேற்றார்.

இதில் முன்னாள் சட்டப் பேரவை உறுப்பினர் அருணகிரி, பள்ளி நிர்வாக அலுவலர் போஸ், பள்ளி அறங்காவலர்கள் மதிசூடியன், குகன், கணேசன், ராஜமாணிக்கம், சண்முகசுந்தரம், அஞ்சனாதேவி, ஜெயபிரபா உள்பட பலர் கலந்து கொண்டனர்.

மாணவ, மாணவிகளின் கலை நிகழ்ச்சிகள் நடைபெற்றன. துணை முதல்வர் கருப்பசாமி நன்றி கூறினார்.

தினமணி

இவரோட கவிதை தோழர் அரசியலுக்கு வராமல் இருந்திருந்தால் நடந்திருக்கும் . அவரே இந்திய ஊழல்களின் முன்னோடி .. அவரை பார்த்தே இந்திய அரசியல்வாதிகள் அனைவரும் ஆரம்பித்துவிட்டனர் .