என்னிடம் விவாதிக்கவில்லை: அழகிரி கோபம்

**சிவா** · **சிவா** Thu 21 Mar 2013 - 1:04

மத்திய அரசில் இருந்தும் கூட்டணியில் இருந்தும் விலகும் முடிவினை திமுக தலைவர் கருணாநிதி நேற்று அறிவித்தார். இதை அடுத்து, மத்தியில் உள்ள திமுக அமைச்சர்கள் இன்று தங்களது ராஜினாமாக் கடிதங்களை பிரதமரிடம் அளித்தனர். இந்த நிலையில், திமுக தலைவர் தன்னிடம் இந்த முடிவு குறித்து ஏதும் விவாதிக்க வில்லை என்று மு.க. அழகிரி தனது வருத்தத்தை தெரிவித்தாராம். தன்னிடம் ஆலோசிக்காமல் திமுக தலைவர் எடுத்த இந்த முடிவு காரணமாக அவர் கோபத்தில் இருந்ததாக தில்லி வட்டாரங்கள் தெரிவித்தன.

திமுகவின் விலகல் முடிவு குறித்து நேற்று, தில்லியில் செய்தியாளர்கள் மு.க. அழகிரியிடம் கேட்டபோது, தலைமையின் முடிவே தன் முடிவு என்று கூறிச் சென்றார். ஆனால், தன்னிடம் இது குறித்து கலந்து ஆலோசிக்கவில்லை என்று அழகிரி வருத்தப்பட்டதாகத் தெரிகிறது. எனவே, அழகிரியும் நெப்போலியனும் தனியே சென்று பிரதமரைச் சந்திப்பார்கள் என்று கூறப்பட்டது.

இன்று காலை பிரதமரைச் சந்தித்த 3 அமைச்சர்கள் தங்களது ராஜினாமாக் கடிதத்தை அவரிடம் அளித்தனர். அதில் அழகிரியும் நெப்போலியனும் இடம்பெறவில்லை.

இந்நிலையில், தனக்கு மத்திய அமைச்சரவையில் இருந்து வெளியே வர விருப்பமில்லை என அழகிரி கூறியதாக தகவல்கள் வெளியாகின. எனவே அழகிரியும் நெப்போலியனும் தங்களின் ராஜினாமாக் கடிதத்தைக் கொடுக்கவில்லை எனக் கூறப்பட்டது.

ஆனால் இன்று மதியம் ஜனாதிபதி பிரணாப் முகர்ஜியிடம் அழகிரி மற்றும் நெப்போலியன் ஆகிய இருவரும் தனது ராஜினாமா கடிதத்தைக் கொடுத்தனர்.

தினமணி

**சிவா** · **சிவா** Thu 21 Mar 2013 - 1:06

நிதியமைச்சர் பேசும் முன்னரே இணையத்தில் வெளியான பிரிட்டன் பட்ஜெட்!

பிரிட்டிஷ் நிதி அமைச்சர் ஜார்ஜ் ஓஸ்போர்ன் பங்குச் சந்தை குறித்த அறிவிப்பை நாடாளுமன்றத்தில் பட்ஜெட் தாக்கல் செய்து பேசுவதற்கு சில நொடிகளுக்கு முன்பே இணையத்தில் வெளியானது.

லண்டன் மாலைப் பத்திரிகையான ஈவினிங் ஸ்டாண்டர்ட் பத்திரிகையில் முதல் பக்கத்தில் என்ன செய்திகள் சொல்லப்பட்டனவோ, அதுவே நிதி அமைச்சரின் பேச்சிலும் இடம்பெற்றிருந்தது.

இது பெரிய பிரச்னையைக் கிளப்பியவுடன், பத்திரிகையின் அரசியல் பிரிவு ஆசிரியர் ஜோ மர்பி இது மிகவும் மோசமான தவறு என்று கூறி அதற்கு மன்னிப்பும் கேட்டுக்கொண்டார்.

பட்ஜெட் இந்த அளவுக்கு பத்திரிகைகளுக்குக் கசிந்தது, பிரிட்டனின் அரசியல் மற்றும் பத்திரிகைகளுக்கு இடையேயான தொடர்பைக் காட்டுவதாகவும் இது சரிசெய்யப்பட வேண்டும் என்றும் கோரிக்கை எழுந்தது.