முதுகுவலி

ச. சந்திரசேகரன் · 16/09/2012

முதுகுவலி
மனிதனுடைய அன்றாட வாழ்க்கையின் எல்லா இயக்கங்களும் முதுகெலும்பை சார்ந்தே இருப்பதால் முதுகெலும்புக்கு அதிகமான வேலைப் பளுவாகிறது. இதனால் முதுகெலும்பின் மேற்பகுதியும் கீழ்பகுதியும் பலவீனமான பகுதியாகிறது. முதுகுவலியால் 80% மக்கள் வாழ்நாளில் ஒருமுறையேனும் பாதிக்கப்படாமல் இருந்ததில்லை. இதில் 70% மக்களுக்கு ஓய்வு, உடற்பயிற்சியின் மூலமே சரியாகிவிடும். மீதமுள்ள 30% பேருக்கே மருத்துவரின் பரிந்துரைகள் தேவைப்படுகிறது.

முதுகுவலிக்கான காரணத்தை இருபெரும் பகுதிகளாக நாம் பிரிக்கலாம். முதல் பகுதியில் காரணத்தை ஆராய்ந்தால் நம்முடைய வாழ்க்கை முறைகளே முதுகுவலிக்கு அதிகப்படியான காரணமாகிறது. தொடர்ந்து நீண்டநேரம் குனிந்து உட்கார்ந்து தொலைக்காட்சி பார்ப்பது, கம்ப்யூட்டர் முன் அமர்வது போன்றவையும், உடற்பயிற்சின்மையும், உயரத்திற்கு பொருந்தாத எடையும், அதிகப்படியான எடை தூக்குவதும், தவறான நிலையில் நீண்ட நேரம் நிற்பதும், அதிகமாக இரு சக்கர, நான்கு சக்கர வாகனங்களில் சரியான முறையில் உட்காராமல் நீண்ட நேரம் பயணிப்பதும், முதுகுதண்டு குனிந்தபடி அதிக நேரம் வேலை செய்வதும், தகுந்த மெத்தை, இருக்கை இவைகளை பயன்படுத்தாததும் முக்கிய காரணமாகும்.

இவைகளைச் சரியாக கடைப்பிடித்தாலே 75% நோயாளிகளுக்கு முதுகுவலி சரியாகிவிடும். இவைகளை கடைபிடித்தும், ஓய்வு, உடற்பயிற்சி எடுத்தும் முதுகுவலி சரியாகவில்லையெனில் மருத்துவரை நோயாளிகள் உடன் தாமதிக்காமல் அணுக வேண்டும். இதில்லாமல், பிறவிக்கோளாறு, முதுகுத்தண்டில் அடிபடுதல், டிஸ்க் விலகல், முதுகு தசை பிடிப்பு, முதுகுத்தண்டில் கட்டிகள், எலும்பு தேய்மானம், சிறுநீரகம், குடல் பகுதிகளில் ஏற்படும் நோய்களாலும் வலி வரலாம்.

காசநோய் போன்ற கிருமிகளின் தொற்றால் முதுகெலும்பு பாதிக்கப்பட்டும் முதுகுவலி உருவாகிறது. இம்மாதிரியான நோயாளிகளுக்கு அடிக்கடி காய்ச்சலோ அல்லது வேறு உபாதைகளோ உடன் இருக்கும். தண்டுவடத்தில் கட்டியோ, நரம்பில் வீக்கமோ, புற்றுநோய் பாதிப்பாலோ கூட முதுகுவலி வரலாம். புற்றுநோயை பொறுத்தவரையில் தைராய்டு, சிறுநீரகம் புராஸ்டேட், மார்பகம், நுரையீரல் போன்ற இடங்களில் ஏற்படும் புற்றநோய் பிற்காலத்தில் முதுகின் தண்டுவடத்தையும் பாதிக்கிறது.

முதுகெலும்பு அதனுடைய பலத்தை இழந்து சிறுசிறு துகள்களாக உடைந்து போவதை ஆஸ்டியோஸ்போரோசிஸ் என்கிறோம். இது கால்சியம் சத்து குறைவினாலும், ஹார்மோன் பாதிப்பாலும், பெண்களுக்கு மாதவிடாய் நின்ற பின்பும், கர்ப்பப்பை அகற்றப்பட்ட பெண்கள் தொடர் சிகிச்சை எடுக்காததாலும் உருவாகிறது.

முதுகுவலியை பொறுத்தவரையில் மேற்கூறிய காரணங்களை விட அதிகமாக ஜவ்வு விலகல் காரணத்தால் வருகிறது. இரு முதுகெலும்புக்கு இடையே உள்ள பகுதியை டிஸ்க் எனவும் அதன் நடுவில் ஸ்பைனல் கேனல் வழியாக நரம்புத்தண்டுவடம் செல்வதையும் இந்த பகுதிதான் நாம் குனிந்து நிமிர்வதற்கு வசதியாக செயல்படுகிறது.

சாதாரணமாக இடுப்பில் துவங்கி நரம்பு செல்லும் பகுதிகளான தொடை, கெண்டைகால், பாதம் வரை வலி பரவும் அழுத்தம் அதிகரிக்கையில் வலியுடன் கால் மரத்துப்போகும். இன்னும் அழுத்தம் அதிகமாகும்பொழுது கால் நடக்கும்பொழுது பஞ்சின் மேல் வைத்தது போலாகும். இது அதிகமாகும்போது கால் செயலிழக்கவும் அருகிலுள்ள சிறுநீரக, மலம் ஆகியவற்றை கட்டுப்படுத்தும் நரம்பை பாதிக்கவும் வாய்ப்பு உள்ளதாகிறது.

முதுகுவலி வந்தவுடன் ஓய்வு எடுத்தும், வலி நிவாரண மாத்திரைகள் எடுத்தபின்பும் வலி குறையாவிட்டால் தாமதமின்றி மருத்துவரை உடன் அணுக வேண்டும். எக்ஸ்ரே, ரத்த பரிசோதனை, ஓய்வு, இடுப்பில் பாரம் கட்டி இழுத்தல் போன்ற பிசியோதெரபி சிகிச்சை மேற்கொண்டும் நிவாரணம் கிடைக்காவிட்டால் ஸ்கேன் செய்வது அவசியம்.

முதுகுவலி வந்தவுடன் பரிசோதனையில் எந்தவித தொந்தரவும் இல்லை எனில் உடல் எடையை சரிசெய்வது, உட்காரும் விதம், எடைதூக்கும் விதம் இவற்றிலே கவனம் செலுத்தினாலே சரியாகி விடும். முதுகுவலி உள்ளவர்கள் சமமான தளத்தில் படுப்பதும், கூன்விழாமல் நிமிர்ந்து உட்காருவதும், திடீரென முன்புறமாக குனிவது, குனிந்து எடை அதிகமாக தூக்குவது, திடீரென பக்கவாட்டில் திரும்புவது போன்றவற்றை தவிர்ப்பதும் எடை தூக்கும்பொழுது முதுகெலும்பு மடங்காமல் நிமிர்ந்தபடியே முழங்காலை மடக்கி சிறிய பளுவை தூக்குவதும், மிக்க பலனளிக்கும்.

முதுகுவலி உள்ளவர்கள் முதுகு தண்டிற்கு அதிகமான அழுத்தம் கொடுக்கும் உடற்பயிற்சியை தவிர்த்து நடப்பது, நீந்துவது போன்ற உடற்பயிற்சி மேற்கொள்வது நலமுடையது. ஆகாரத்தில் கால்சியம், புரத சத்துக்கள் சேர்ப்பது ஆஸ்டியோஸ்போரோசிஸ் நோயாளிக்கு பயனளிக்கும். இதனுடன் தகுந்த ஓமியோபதி மருந்தை உட்கொள்ளும்பொழுது 90% அறுவை சிகிச்சையை தவிர்த்து மருந்தின் மூலமே நிரந்தர குணமளிக்க இயலும்.

அதிகமான வயதின் பாதிப்பாலோ, அதிகமான பாரத்தை தூக்குவதாலோ மிக அதிகமான உள் அழுத்தம் உருவாவதால் இந்த ஜவ்வானது பின்னோக்கி நகர்கிறது. இது சிறிது சிறிதாக பின்னோக்கி சென்று நரம்புத்தண்டை அழுத்துகிறது. இதனால் எந்த இடத்தில் நரம்பு அழுத்தப்படுகிறதோ அந்த நரம்பு செல்லும் இடம் முழுவதும் வலி ஏற்படுகிறது. இந்த நிலையை �டிஸ்க் புரோலேப்ஸ்என்கிறோம்.

இந்த நோயே 75% முதுகுவலிக்கு காரணமாக அமைகிறது. இது சாதாரணமாக குனிந்து நிமிரும்போதும், திடீரென அதிக பாரத்துடன் நிமிரும்போதும் ஜவ்வானது சிறிது சிறிதாக விலகி பின்னுக்கு சென்று நரம்பு தண்டுவடத்தை பாதிக்கிறது.

நன்றி தினகரன்