கறுப்பு பணத்தை பதுக்க உதவிய இந்திய வங்கிகள்

**சிவா** · **சிவா** Thu Mar 14, 2013 7:20 pm

புதுடில்லி : என்னமோ வெளிநாட்டில் தான் நமது இந்தியர்கள் கறுப்பு பணத்தை பதுக்கி வைத்து வருகின்றனர் என்றும் இதனை கொண்டு வர முழு நடவடிக்கை எடுக்க வேண்டும் என்றும் பார்லி.,யில் எதிர்கட்சியினர் குரல் கொடுத்தும் இது வரை எவ்வித நடவடிக்கையும் இல்லாமலே இருந்து வந்தது. அதற்கும் மேலாக இந்தியாவில் உள்ள சில தனியார் வங்கிகள் வாடிக்கையாளர்களின் கறுப்பு பணத்தை மாற்று வழியில் டெபாசிட் செய்ய உதவி புரிந்து உள்ளது என்று அம்பலத்திற்கு வந்துள்ளது.

ரெட் ஸ்பைடர் ஆப்பரேஷன்:

பல்வேறு ஊழல் முறைகேட்டினை வெளியுலகிற்கு கொண்டு வந்தது தெகல்கா பத்திரிகை நிறுவனம். இந்த நிறுவவத்தில் பணியாற்றும் அனிருத்தா பெஹல் என்பவர் தலைமையில் ஒரு குழுவினர் ரெட் ஸ்பைடர் ஆபரேஷன் என்ற பெயரில் ஒரு புலனாய்வு நடத்தியுள்ளனர். அனிருத்ரா பெஹல் கோப்ரா போஸ்ட் என்ற இணையதளமும் நடத்தி வருகிறார். இதன்படி இந்த குழுவினர் சென்னை. மும்பை, கோல்கட்டா, உள்ள முன்னணியில் இருக்கும் வங்கிகளை கண்காணித்தது. இதில் வாடிக்கையாளர்கள் போல நடித்து வங்கியின் உண்மை நிலைய அறிந்துள்ளனர். இதற்கென நடந்த ஆபரேஷன் வீடியோ மூலம் படமாக்கப்பட்டுள்ளது. இதில் பிரபல தனியார் வங்கிகளான ஐ.சி.சி.ஐ., எச்.டி.எப்.சி., ஆக்ஸிஸ் என 3 வங்கிகள் சிக்கியுள்ளன. ஆனால் இதனை தனியார் வங்கிகள் மறுத்துள்ளன. இது தொடர்பாக முழு அளவில் விசாரணை நடத்த உத்தரவிடப்பட்டுள்ளது என்று வங்கிகள் தரப்பில் கூறப்பட்டுள்ளது.

இந்த ஆப்பரஷேனில் வங்கிகள் பலரிடம் கணக்கில் வராத பணத்தை பெற்று மாற்று திட்டங்களில் போட்டு பயன்படுத்தியுள்ளனர். இந்த பணம் ஓய்வூதிய திட்டம், மற்றும் இன்ஸ்சூரன்ஸ் திட்டம் என மாற்றி பயன்படுத்தப்பட்டுள்ளது. அதாவது ஒருவர் ரூ .49 ஆயிரம் வரை வங்கியில் டெபாசிட் செய்ய முடியும் . ஆனால் இந்த தனியார் வங்கிகள் பலரிடம் பல லட்சங்களை எவ்வித அத்தாட்சியும் இல்லாமல் பெற்றுள்ளனர். குறிப்பாக பான் கார்டு விவரம் கூட கேட்கவில்லை. இதனால் பலர் தங்களின் கறுப்பு பணத்தை இவ்வாறு ஒயிட்டாக மாற்றியுள்ளனர்.

பலர் அக்கவுண்ட் துவங்கி லாக்கர் பெற்று அதில் பல கோடிகளை பதுக்கி வைத்துள்ளனர். பினாமி கணக்குகள் துவக்கப்பட்டுள்ளன. சில கணக்குகள் ரகசியமாக வைக்கப்பட்டுள்ளன, இது ரிசர்வ் வங்கி விதிமுறைகள் மீறப்பட்டுள்ளன. இதன் மூலம் பல பண முதலைகள் வரி ஏய்ப்பு செய்துள்ளனர்.

இது குறித்து அடுத்தக்ககட்ட விசாரணைக்கு மத்திய அரசு உத்தரவிடும் என எதிர்பார்க்கப்படுகிறது. குறிப்பாக ரிசர்வ் வங்கி என்ன நடவடிக்கையில் இறங்கும் என்ற கேள்வி தற்போது எழுந்திருக்கிறது . இதனால் தனியார் வங்கிகள் கலக்கத்தில் உள்ளன.

தினமலர்