பெண் போலீசை கற்பழித்து கொன்ற வாலிபர் சிக்கினார்

பாதுகாப்பு பணிக்கு சென்ற பெண் போலீஸ் ஜெயமணியை கற்பழித்து கொன்ற வாலிபர் சிக்கினார். அவரை ரகசிய இடத்தில் வைத்து போலீசார் தீவிர விசாரணை நடத்தி வருகின்றனர்.
ஈரோடு மாவட்டம், அரச்சலூரை சேர்ந்த மணியம் மனைவி ஜெயமணி (39), காங்கயம் மகளிர் போலீஸ் நிலையத்தில் போலீசாக பணிபுரிந்தார். கடந்த ஆகஸ்ட் 23-ம் தேதி துணை முதல்வர் மு.க.ஸ்டாலின் பாதுகாப்பு பணிக்காக பெருமாநல்லூர் வந்தபோது, கொலை செய்யப்பட்டார். இவரது உடல் பெருமாநல்லூர் அருகே செப்டம்பர் 18-ம் தேதி கண்டெடுக்கப்பட்டது.

கொலையாளியைப் பிடிக்க அவிநாசி டிஎஸ்பி காமராஜ் தலைமையில் 5 தனிப்படைகள் அமைக்கப்பட்டது. விசாரணையில் முன்னேற்றம் இல்லாததையடுத்து, கூடுதல் எஸ்.பி. ஜெயபாண்டியன் தலைமையில் 4 டிஎஸ்பி, 4 இன்ஸ்பெக்டர், 5 எஸ்.ஐ.களைக் கொண்ட புதிய தனிப்படை அமைக்கப்பட்டது.

இந்நிலையில், ஜெயமணி கொலை தொடர்பாக சேலம் மாவட்டம் எடப்பாடியைச் சேர்ந்த வேன் டிரைவர் சங்கர் (31) என்பவரை போலீசார் கைது செய்தனர். பாதுகாப்பு பணிக்கு புறப்பட்ட ஜெயமணி, பெருமாநல்லூர் பகுதியில் பைக்கில் வந்த சங்கரிடம் லிப்ட் கேட்டுள்ளார். பைக்கில் அவரை அழைத்துச் சென்ற சங்கர், சிறிது தூரம் சென்றதும் கத்தியைக் காட்டி மிரட்டி ஒதுக்குப்புறமான இடத்துக்கு அழைத்துச் சென்றுள்ளார். அங்கு அவரை மிரட்டி கற்பழித்து, கத்தியால் குத்தி கொலை செய்துள்ளார். அவரிடம் இருந்த நகை, பணம், செல்போனை எடுத்துக்கொண்டு தப்பி விட்டார் என்று முதல்கட்ட விசாரணையில் தெரியவந்துள்ளது.

பிடிபட்ட சங்கரை ரகசிய இடத்தில் வைத்து போலீசார் தொடர்ந்து விசாரித்து வருகின்றனர். ஊத்துக்குளி உள்பட பல இடங்களில், பெண்களை கற்பழித்து கொலை செய்து கொள்ளையடித்தது தெரியவந்துள்ளது. விசாரணை தொடர்கிறது.