திருமணத்துக்கு பெண் கிடைக்காமல் எருமைகளை கொடுத்து பெண்களை வாங்கும் ம.பி., இளைஞர்கள்

போபால்: மத்திய பிரதேசத்தில், ஆண்களை விட, பெண்களின் எண்ணிக்கை குறைந்துள்ளதால், அங்குள்ள இளைஞர்கள், திருமணம் முடிப்பதற்கு, பெண்கள் கிடைக்காமல் திண்டாடுகின்றனர். பணம், எருமை மாடுகளை கொடுத்து, பெண்களை விலைக்கு வாங்கும் போக்கு, அங்கு அதிகரித்துள்ளது.

மத்திய பிரதேசத்தின் சில மாவட்டங்களில், கல்வி அறிவு பெற்றவர்கள், குறைந்த அளவே உள்ளனர். போதிய வாழ்வாதாரம் இல்லாததால், இங்குள்ளவர்கள், வறுமையில் வாடுகின்றனர். இவர்களிடம், விழிப்புணர்வும் மிக குறைவு. பெண் குழந்தைகள் பிறப்பதை, இங்குள்ள பெற்றோர் விரும்புவது இல்லை. அப்படியே, பெண் குழந்தைகள் பிறந்தாலும், சிசுவிலேயே, அவற்றை கொலை செய்யும் நடைமுறையும், இங்கு அதிகரித்து விட்டது. இதன் காரணமாக, இந்த பகுதியில், பெண்களின் எண்ணிக்கை கணிசமாக குறைந்து விட்டது. ஆண் - பெண் விகிதாசாரம் மிகவும் குறைந்து விட்டதால், இங்குள்ள இளைஞர்கள், முதிர் இளைஞர்களாக மாறி, திருமணம் முடிக்காமலேயே, விரக்தியில் வாடுகின்றனர். பணம் வைத்திருக்கும் பலர், அருகில் உள்ள, மகாராஷ்டிரா மாநிலத்தில் செயல்படும், கடத்தல் கும்பலின்

உதவியை நாடுகின்றனர். இந்த கடத்தல் கும்பல், வறுமையில் வாடும் குடும்பங்களை சேர்ந்த, இளம் பெண்களை கடத்தி, பெண் கிடைக்காமல் ஏங்கும், ம.பி., இளைஞர்களிடம், நல்ல விலைக்கு விற்பனை செய்கின்றனர். கடத்தல் கும்பலின் இலக்கு, 14 முதல், 16 வயதுக்குட்பட்ட பெண்கள் தான். சமீபத்தில், இப்படி கடத்தி, விற்பனை செய்யப்பட்ட, மூன்று இளம் பெண்களை, மகாராஷ்டிரா போலீசார் மீட்டனர்.

இதுகுறித்து, மகாராஷ்டிரா போலீசார் கூறியதாவது: இந்த மூன்று பெண்களில், ஒருவரை, 50 ஆயிரம் ரூபாய்க்கு, ம.பி.,யைச் சேர்ந்த, ஒரு இளைஞரிடம் விற்பனை செய்துள்ளனர். மற்ற இரண்டு பெண்களையும், தலா, 35 ஆயிரம் ரூபாய்க்கு விற்பனை செய்துள்ளனர். கடத்தல் கும்பல் நிர்ணயித்த அளவுக்கு, பணம் கொடுக்க முடியாததால், தங்களிடம் இருந்த பணம் போக, மீதமுள்ள தொகைக்கு, தங்களிடம் இருந்த, எருமை மாடுகளை, கடத்தல் கும்பலுக்கு, இந்த இளைஞர்கள் கொடுத்துள்ளனர். இதுபற்றி, எங்களுக்கு ரகசிய தகவல் கிடைத்ததை அடுத்து, மூன்று பெண்களையும் மீட்டோம். கடத்தல் கும்பலை சேர்ந்தவர்களிடம், தீவிர விசாரணை நடத்தி வருகிறோம். விரைவில், மேலும் பல பெண்களை மீட்கவுள்ளோம். கடத்தல் கும்பலின் இலக்கிற்கு ஆளாவது, பெரும்பாலும் ஏழைக் குடும்பங்களை சேர்ந்த பெண்கள் தான். இந்த பெண்களை, ம.பி., இளைஞர்கள், திருமணம் செய்து கொள்வதால், பெரும்பாலும், இவர்கள், போலீசில் புகார் செய்வது இல்லை. இதன் காரணமாக, கடத்தல் கும்பலின் அட்டூழியம் அதிகரித்து வருகிறது. இவ்வாறு, போலீசார் தெரிவித்தனர்.

ம.பி.,யைச் சேர்ந்த, சமூக ஆர்வலர்கள் கூறியதாவது: போதிய கல்வி அறிவு இல்லாததால் தான், பெண் சிசுக் கொலைகள் அதிகரித்துள்ளன. இதனால் தான், தங்களின் திருமணத்துக்கு பெண் கிடைக்கவில்லை என்பதை, இளைஞர்கள் உணர வேண்டும். அப்போது தான், சமூகத்தில் விழிப்புணர்வு ஏற்படும். இதற்கு, பெரிய அளவில், விழிப்புணர்வு பிரசாரம் மேற்கொள்வதற்கு, மத்திய, மாநில அரசுகள், நடவடிக்கை எடுக்க வேண்டும். இவ்வாறு, சமூக ஆர்வலர்கள் தெரிவித்தனர்.

nandri : dinamalar

அடப்பாவமே எருமையைக் குடுத்து பெருமையா வாழ்க்கை
பூரா எருமையா இருக்க முடிவு பண்ணிட்டாங்களே!!!

இதன்படி எருமையும் பெண்களும் ....