உலக டென்னிஸ் தர வரிசை: சானியா முன்னேற்றம்

உலக டென்னிஸ் பெண்கள் ஒற்றையர் தர வரிசையில் சானியா மிர்சா 58 வது இடத்துக்கு முன்னேறி உள்ளார்.


உலக டென்னிஸ் வீரர் வீராங்கனைகளின் தர வரிசைப் பட்டியலை சர்வதேச டென்னிஸ் சங்கம் வெளியிட்டுள்ளது.


இதன்படி பெண்கள் ஒற்றையர் பிரிவில் இந்திய வீராங்கனை சானியா மிர்சா தர வரிசையில் 61 வது இடத்தில் இருந்து 58 வது இடத்துக்கு முன்னேறி உள்ளார். ஜப்பான் ஓபன் டென்னிஸ் போட்டியில் ஷாகர் பீர் (இஸ்ரேல்), மரியன் பார்டோலி (பிரான்ஸ்) ஆகியோரை வீழ்த்தி அரை இறுதிக்கு தகுதி பெற்றதன் மூலம் சானியா இந்த ஏற்றத்தை பெற்றுள்ளார்.


பெண்கள் ஒற்றையர் பிரிவில் அமெரிக்க வீராங்கனை செரீனா வில்லியம்ஸ் முதலிடத்திலும், ரஷிய வீராங்கனை தினரா சபீனா 2 வது இடத்திலும் தொடர்ந்து நீடிக்கிறார்கள். 4 வது இடத்தில் இருந்த ஸ்வெட்லானா குனெட்சோவா (ரஷியா) 3 வது இடத்துக்கு முன்னேறி இருக்கிறார். அமெரிக்க வீராங்கனை வீனஸ் வில்லியம்ஸ் 3 வது இடத்தில் இருந்து 4 வது இடத்துக்கு பின்தங்கி உள்ளார்.


ஆண்கள் ஒற்றையர் பிரிவில் சுவிட்சர்லாந்து வீரர் ரோஜர் பெடரர் தொடர்ந்து முதலிடம் வகிக்கிறார். ரபெல் நடால் (ஸ்பெயின்) 2 வது இடமும், நோவாக் ஜோகோவிச் (செர்பியா) 3 வது இடமும், ஆன்டி முர்ரே (இங்கிலாந்து) 4 வது இடமும் பெற்றுள்ளனர். இந்திய வீரர் சோம்தேவ் வர்மன் 124 வது இடத்தில் உள்ளார்.


ஆண்கள் இரட்டையர் பிரிவில் இந்திய வீரர்கள் மகேஷ்பூபதி 6 வது இடமும், லியாண்டர் பெயஸ் 8 வது இடமும் வகிக்கின்றனர்.