நியூ சவுத் வேல்ஸ் சாம்பியன்

முதல் சாம்பியன்ஸ் லீக் "டுவென்டி-20' தொடரில் கோப்பை வென்று அசத்தியது நியூ சவுத் வேல்ஸ் அணி. ஐதராபாத்தில் நேற்று நடந்த பைனல் போட்டியில், 41 ரன்கள் வித்தியாசத்தில் டிரினிடாட் டுபாகோ அணியை வீழ்த்தியது. ஆல்-ரவுண்டராக அசத்திய நியூ சவுத் வேல்ஸ் வீரர் பிரட் லீ ஆட்ட நாயகனாக ஜொலித்தார்.

சாம்பியன்ஸ் லீக் "டுவென்டி-20' கிரிக்கெட் தொடர் இந்தியாவில் நடந்தது. நேற்று ஐதராபாத்தில் நடந்த இத்தொடரின் பைனல் போட்டியில், ஆஸ்திரேலியாவின் நியூ சவுத் வேல்ஸ் அணியும், வெஸ்ட் இண்டீசின் டிரினிடாட் டுபாகோ அணியும் மோதின. டாஸ் ஜெயித்த டிரினிடாட் அணி கேப்டன் டேரன் கங்கா பீல்டிங் தேர்வு செய்தார்.

பவுலிங் மிரட்டல்: நியூ சவுத் வேல்ஸ் அணிக்கு வார்னர், ஹியுஸ் துவக்கம் தந்தனர். ராம்பால் வேகத்தில் வெறும் 3 ரன்களுக்கு அவுட்டானார் ஹியுஸ். அடுத்து பந்து வீச வந்த பிராவோ, வார்னர் (19), காடிச்சை (16) விரைவில் அவுட்டாக்கி நம்பிக்கை அளித்தார். மிடில் ஆர்டர் பேட்ஸ்மேன்களான ஹென்ரிக்ஸ் (4), ரோஹ்ரர் (16) , டேனியல் (3) கைகொடுக்க வில்லை. 83 ரன்களுக்கு 6 விக்கெட்டுகளை இழந்து தத்தளித்தது நியூ சவுத் வேல்ஸ் அணி.

பிரட் லீ அதிரடி: பின்னர் ஸ்டீவன் ஸ்மித், பிரட் லீ ஜோடி சேர்ந்து அணியை மீட்டனர். பொறுப்புடன் ஆடிய இந்த ஜோடி 7 விக்கெட்டுக்கு 49 ரன்கள் சேர்த்து ஆறுதல் அளித்தது. ஸ்டீவன் 33 ரன்களுக்கு அவுட்டானார். மறுமுனையில் அதிரடியில் மிரட்டிய பிரட் லீ, ரன் குவிப்புக்கு உதவினார். 5 சிக்சர்கள் உட்பட இவர் 48 ரன்கள் விளாச, 20 ஓவர் முடிவில் 9 விக்கெட்டுகளை இழந்த நியூ சவுத் வேல்ஸ் அணி 159 ரன்கள் எடுத்தது.

துவக்கம் ஏமாற்றம்: சவாலான இலக்கை விரட்டிய டிரினிடாட் அணி துவக்க வீரர்களை விரைவில் இழந்தது. பெர்கின்ஸ் (0), பரத் (14), சிம்மன்ஸ் (4) சொற்ப ரன்களுக்கு பெவிலியன் திரும்பினர்.

பிராவோ "அவுட்': பின்னர் களமிறங்கிய பிராவோ, வந்த வேகத்தில் அதிரடி காட்டினார். ஆனால் அதிகம் எதிர்பார்க்கப்பட்ட இவர், 17 ரன்களுக்கு அவுட்டானார். கேப்டன் கங்கா (19), ராம்தின் (16) சாதிக்க தவறினர். அடுத்து வந்த போலார்ட் 3 சிக்சர்களை விளாசி நம்பிக்கை தந்தார். ஹாரிட்ஸ் சுழலில் இவரும் (26) வெளியேற, டிரினிடாட் அணியின் வெற்றி கேள்விக்குறியானது. டெயிலெண்டர்களான ஸ்டூவர்ட் (4), மொகமத் (1) ஆகியோர் ஏமாற்ற, 15.5 ஓவரில் ஆல்-அவுட்டான டிரினிடாட் டுபாகோ அணி, 118 ரன்கள் மட்டுமே எடுத்து தோல்வி அடைந்தது.

சாம்பியன்:மொத்தம் 12 அணிகள் பங்கேற்ற, முதல் சாம்பியன்ஸ் லீக் "டுவென்டி-20' தொடரில் ஆஸ்திரேலிய அணியான நியூ சவுத் வேல்ஸ் அணி கோப்பை வென்று அசத்தியுள்ளது. இத்தொடரில் தொடர்ந்து வெற்றிகளை குவித்து வந்த வெஸ்ட் இண்டீசின் டிரினிடாட் டுபாகோ அணி, பைனலில் ஏமாற்றம் அடைந்தது.

தொடர் நாயகன்: இத்தொடர் முழுவதும் போட்டிங் மற்றும் பவுலிங்கில் அசத்திய நியூ சவுத் வேல்ஸ் வீரர் பிரட் லீ, தொடர் நாயகன் விருதை கைப்பற்றி அசத்தினார். இத்தொடரில் அதிக சிக்சர் அடித்த வீரர் என்ற விருதை டிரினிடாட் அணி வீரர் போலார்ட் (16 சிக்சர்) தட்டிச் சென்றார்.

12 கோடி பரிசு:சாம்பியன்ஸ் லீக் "டுவென்டி-20' தொடரில் கோப்பை கைப்பற்றி அசத்திய நியூ சவுத் வேல்ஸ் அணி, ரூ. 11.50 கோடி பரிசு வென்றது. இரண்டாவது இடம் பிடித்த டிரினிடாட் டுபாகோ அணி ரூ.6.50 கோடி பரிசுத் தொகை கைப்பற்றி அசத்தியது.

ஸ்கோர் போர்டு

நியூ சவுத் வேல்ஸ்

வார்னர் (கே) மொகமத் (ப) பிராவோ 19 (16)
ஹியுஸ் (ப) ராம்பால் 3 (5)
காடிச் (கே) பரத் (ப) பிராவோ 16 (14)
ஹென்ரிக்ஸ் (கே) ஷெர்வின் (ப) போலார்ட் 4 (7)
ரோஹ்ரர் (கே) ஷெர்வின் (ப) மொகமத் 16 (12)
ஸ்டீவன் (கே) சிம்மன்ஸ் (ப) ஷெர்வின் 33 (26)
டேனியல் (ப) ராம்பால் 3 (3)
பிரட் லீ (கே) பெர்கின்ஸ் (ப) ராம்பால் 48 (31)
ஹாரிட்ஸ் -ரன் அவுட்(ராம்பால்) 10 (6)
கிளார்க் -அவுட் இல்லை- 0 (0)
உதிரிகள் 7
மொத்தம் (20 ஓவரில் 9 விக்., இழப்பு) 159

விக்கெட் வீழ்ச்சி: 1-24 (ஹியுஸ்), 2-32 (வார்னர்), 3-45 (காடிச்), 4-47 (ஹென்ரிக்ஸ்), 5-75 (ரோஹ்ரர்), 6-83 (டேனியல்), 7-132 (ஸ்டீவன்), 8-159 (ஹாரிட்ஸ்), 9-159 (பிரட் லீ).

பந்து வீச்சு: ஷெர்வின் 4-0-29-1, ராம்பால் 4-0-20-3, பிராவோ 3-0-27-2, போலார்ட் 3-0-27-1, மொகமத் 3-0-19-1, சிம்மன்ஸ் 2-0-23-0, ஸ்டூவர்ட் 1-0-9-0.

டிரினிடாட் டுபாகோ

பெர்கின்ஸ் (ப) பிரட் லீ 0 (2)
பரத் (கே) டேனியல் (ப) ஸ்டீவன் 14 (6)
சிம்மன்ஸ் (கே) அண்ட் (ப) பிரட் லீ 4 (7)
கங்கா (கே) வார்னர் (ப) ஸ்டீவன் 19 (20)
பிராவோ (ப) போலிங்கர் 17 (13)
ராம்தின் (கே) ஸ்டீவன் (ப) கிளார்க் 16 (23)
போலார்ட் (கே) பிரட் லீ (ப) ஹாரிட்ஸ் 26 (15)
ஷெர்வின் (கே) ஹென்ரிக்ஸ் (ப) ஹாரிட்ஸ் 5 (7)
ஸ்டூவர்ட் (கே) ஹென்ரிக்ஸ் (ப) கிளார்க் 4 (3)
மொகமத் (கே) ஹியுஸ் (ப) கிளார்க் 1 (2)
ராம்பால் -அவுட் இல்லை- 0 (0)
உதிரிகள் 12
மொத்தம் (15.5 ஓவரில் ஆல்-அவுட்) 118

விக்கெட் வீழ்ச்சி: 1-1 (பெர்கின்ஸ்), 2-21 (பரத்), 3-21 (சிம்மன்ஸ்), 4-45 (பிராவோ), 5-68 (கங்கா), 6-93 (ராம்தின்), 7-107 (ஷெர்வின்), 8-113 (போலார்ட்), 9-118 (ஸ்டூவர்ட்), 10-118 (மொகமத்).

பந்து வீச்சு: பிரட் லீ 2-0-10-2, ஸ்டீவன் 4-0-32-2, போலிங்கர் 4-0-27-1 கிளார்க் 3.5-0-21-3, ஹாரிட்ஸ் 2-0-23-2.