பணத்தாசையில் மயங்கும் ஏழை இளைஞர்கள்:வனக்குற்றங்கள் பெருகும் அபாயம்

சென்னை : தமிழகம் முழுவதும், பணத்தாசை காட்டும் செல்வந்தர்களிடம் மயங்கும் ஏழை இளைஞர்களால்,வனக்குற்றங்கள் பெருகும் அபாயம் ஏற்பட்டுள்ளது. தமிழகம் முழுவதும், 22, 877சதுர கி.மீ., பரப்பளவு வனப்பகுதியாக உள்ளது; இதில், 19,388 சதுர கி.மீ., காப்புக்காடாக உள்ளது; காப்புக்காடுகளில் பொதுமக்கள் நுழைய தடை விதிக்கப்பட்டுள்ளது. திறந்த வெளி காடுகளில் மட்டுமே, கால்நடைகளை மேய்க்கவும், விறகு பொறுக்கவும் அனுமதி அளிக்கப்பட்டுள்ளது. மாநிலம் முழுவதும், வனச் சொத்துக்களை பாதுகாக்கவும், வனக்குற்றங்களை தடுக்கவும், வனத்துறையினர் பல்வேறு நடவடிக்கைகளை எடுத்து வருகின்றனர். இருப்பினும்,பாதுகாக்கப்பட்ட வனப் பகுதிக்குள், மர்ம நபர்களின் அத்துமீறல் அதிகளவில் உள்ளது. வனக் குற்றத்தை தடுக்க, அதிகாரிகள் மேற்கொண்ட எந்த முயற்சியும் கைகொடுக்கவில்லை. சில மாதத்தில் மட்டும், மாநிலம் முழுவதும் வனக் குற்றத்தில் ஈடுபட்ட, 200க்கும் மேற்பட்டோர் மீது, வழக்கு பதிவு செய்யப்பட்டுள்ளது. பணத்துக்கு ஆசை
இவர்களில், பலரும், கடத்தல் கும்பலுடன் நேரடி தொடர்பு இல்லாதவர்களாகவே உள்ளனர். விசாரணையில், பணத்துக்கு ஆசைப்பட்டு, முகம் தெரியாத நபர்கள், செல்வந்தர்களின் பேச்சில்மயங்கி, ஏழை இளைஞர்கள் பலர் வனக்குற்றத்தில் ஈடுபட்டுள்ளதாக, தகவல் வெளியாகி உள்ளது. மேலும், பணத்தாசைக்கு மயங்கும் ஏழை இளைஞர்களால், வனக்குற்றங்கள் பெருகும் அபாயம் ஏற்பட்டுள்ளது. ஏழைஇளைஞர்களை வனக்குற்றத்தில் ஈடுபடுத்தி, வனத்துறையினருக்கு, பெரும் சவாலாக உள்ள, கும்பல் குறித்து, வனத்துறையினர் விசாரித்துவருகின்றனர். இதுகுறித்து வனத்துறை அதிகாரிகள் கூறியதாவது: தமிழகம் முழுவதும் படித்த, படிக்காத ஏழை இளைஞர்கள் வேலையின்றி உள்ளனர். வனப்பகுதி அருகே வசிக்கும், படிப்பறிவு இல்லாத இளைஞர்கள் அதிகம் உள்ளனர்.இவர்களை, சமூக விரோத செயலுக்கு, மர்ம கும்பல் பயன்படுத்தி வருகிறது. சமீப காலமாக தமிழக வனப்பகுதியில், சிறுவனவிலங்கு வேட்டை, விலங்குகளின் உடற்பாகங்கள் கடத்தல், உயர்ரக மரக்கடத்தல் உள்ளிட்ட, பல வனக்குற்றங்கள் பெருகிவிட்டன.ஏவியவர்கள் எங்கோ இருக்க, வனக்குற்றத்தில் ஈடுபட்டவர்களை மட்டுமே, வனத்துறையினர் கைது செய்து வருகின்றனர். மாநிலம் முழுவதும், ஏழை இளைஞர்களுக்கு குறி வைக்கும் கும்பல் மீது, வனத்துறையினரும், அரசும் கடும் நடவடிக்கை எடுக்க வேண்டும். மேலும், வனப்பகுதி அருகே வசிக்கும் மக்களிடம், வனக்குற்றத்துக்கான தண்டனை குறித்தும், வனம், வனச்சொத்து பாதுகாப்பு குறித்த விழிப்புணர்வை ஏற்படுத்த வேண்டும். வனம் அருகே வசிப்போரிடம், சகோதரத்துவத்தோடு வனத்துறையினர் பழகினால், கும்பல் குறித்த தகவலை எளிதாக சேகரிக்க முடியும்.இவ்வாறு அவர்கள் தெரிவித்தனர்.
-
[b]தினமலர்