மரணமடைந்து 153 ஆண்டுகளுக்கு பிறகு ஈம சடங்கு!

**krishnaamma** · **krishnaamma** Thu Feb 14, 2013 9:19 pm

உலகின் மிக அருவருப்பான முகமுடையவர் என கருதப்பட்டவர், உயிரிழந்து 153 ஆண்டுகளுக்கு பின்னர் அவரது சொந்த ஊரில் புதைக்கப்பட்டுள்ளார்.

மெக்சிகோவை சேர்ந்தவர் ஜூலியா பாஸ்டிரானா, 1834 ஆம் ஆண்டு பிறந்தார். ஹைப்பர் டிரைகோசிஸ் (Hyper trichosis) என்னும் நோயால் அவதிப்பட்ட ஜூலியாவிற்கு முகமெங்கும் அதிகமான முடி வளர்ச்சி காணப்பட்டது. அதிக அளவு முடி மற்றும் வித்தியாசமான தாடை அமைப்புடன் தோற்றமளித்த ஜூலியாவை 'கரடி பெண்' மற்றும் 'குரங்கு பெண்' என கூட பலர் கேலி செய்தனர்.

1850 களில் தியோடார்ட் லென்ட் என்பவரை திருமணம் செய்துகொண்ட ஜூலியா, ஒரு குழந்தைக்கு தாயானார். ஜூலியாவை போலவே உடல் குறைப்பாட்டால் பாதிக்கப்பட்டிருந்த அக்குழந்தை சில நாட்களிலேயே இறந்துவிட்டது.

இதனை தொடர்ந்து சில நாட்களிலேயே ஜூலியாவும் மரணமடைந்தார்.
தனது மனைவியையும், மகனையும் வித்தை பொருட்களாக்கி பிழைப்பு நடத்திவந்த லென்டிற்கு அவர்களின் திடீர் மரணம் அதிர்ச்சியளித்தது.

பிழைப்புக்கு வழி தேடிய லென்ட், அவரது மனைவி ஜூலியாவின் சடலத்தை பதப்படுத்தி அதை 5 ஆண்டுகளுக்கு ஊர் ஊராக எடுத்து சென்று மக்களிடம் காண்பித்து காலத்தை தள்ளினார். இப்படி ஊர் ஊராக சென்ற ஜூலியாவின் சடலம் இறுதியாக நார்வேவில் உள்ள ஒஸ்லோ பல்கலைகழகத்தில் வைக்கப்பட்டிருந்தது.

இந்நிலையில் மற்றவர்களை போல் ஜூலியாவும் ஒரு சராசரியான பெண்தான் எனக் கூறி அவரின் சடலத்தை காட்சி பொருளாக பயன்படுத்த எதிர்ப்பு அதிகரித்ததால், ஜூலியாவின் சடலம் அவரது சொந்த ஊரான சிநோலோவாவிற்கு எடுத்து செல்லப்பட்டு புதைக்கப்பட்டது.

ஜூலியா இறந்து சுமார் 153 ஆண்டுகளுக்கு பிறகு அவரது சடலம் புதைக்கப்பட்டிருப்பது குறிப்பிடத்தக்கது.