"விவேகானந்தர்களாக இருங்கள்": அறிவுரை கூறுகிறார் ராமதாஸ்!

சென்னை : "விவேகானந்தர்களாக இருங்கள்...வீணடிப்பவர்களாக இருக்காதீர்கள்" என்று திருமாவளவன் உள்ளிட்ட தலித் தலைவர்களுக்கு பாமக நிறுவனர் ராமதாஸ் அறிவுறுத்தி உள்ளார்.
இது தொடர்பாக அவர் விடுத்துள்ள அறிக்கையில்," 100 இளைஞர்களை என்னிடம் தாருங்கள் ஒட்டுமொத்த இந்தியாவையும் மாற்றிக் காட்டுகிறேன் என்றார் சுவாமி விவேகானந்தர். இளைஞர் சமுதாயத்தை எந்த அளவுக்கு ஆக்கபூர்வமாக பயன்படுத்த முடியும் என்பதற்கு உதாரணமாக அவர் திகழ்ந்தார். ஆனால், இன்று தாழ்த்தப்பட்ட நிலையில் இருக்கும் சமுதாயத்தைச் சேர்ந்த இளைஞர்களை அச்சமுதாயத் தலைவர்கள் எவ்வாறு தவறாக வழிநடத்திச் செல்கிறார்கள் என்பதை அறியும்போது மனதில் வேதனை தான் மிஞ்சுகிறது.
-
சமுதாயத்தின் தலைவர்களாக இருப்பவர்களுக்கு அச்சமுதாய இளைஞர்களை நல்ல வழியில் அழைத்துச் செல்ல வேண்டிய கடமையும் பொறுப்பும் இருக்கிறது.
தாழ்த்தப்பட்ட வகுப்பில் ஏராளமான தலைவர்கள் இருக்கும் நிலையில், அச்சமுதாய இளைஞர்களை வன்முறையற்ற கலாச்சாரத்தை பின்பற்றுபவர்களாகவும், மற்ற சமுதாயத்தினரால் பாராட்டப்படுபவர்களாகவும் அவர்கள் உருவாக்கியிருக்க வேண்டும். ஆனால், அந்தத் தலைவர்கள் அவ்வாறு செய்தார்களா? என்பது விடை தெரியாத வினாவாகவே இருக்கிறது.
-
பட்டியலினங்களில் பெரிய சமுதாயங்களான ஆதிதிராவிடர்கள், தேவேந்திர குல வேளாளர்கள், அருந்ததியர்கள் ஆகியோருக்காக மொத்தம் 32 அமைப்புகள் செயல்பட்டு வருகின்றன. இந்த 32 அமைப்புகளின் லட்சியங்களும்,செயல்பாடுகளும் என்ன? என்பதை சமூகவியலாளர்கள் ஆராய்ந்துஉரிய அறிவுரைகளை வழங்கவேண்டும். அவ்வாறு செய்யாவிட்டால் அச்சமுதாய இளைஞர்களை குற்றச்செயல்களிலும், தவறான பாதையிலும் வழிநடத்திச் செல்லும் போக்கு தொடரும்.
-
வன்முறை கூடாது.... முன்னேற்றமே வாழ்க்கையின் நோக்கமாக இருக்கவேண்டும் என்ற உண்மையை பட்டியலின இளைஞர்களுக்கு புரியவைத்து, அவர்களை அவர்களின் தலைவர்கள் சரியான பாதையில் வழிநடத்திச்செல்லவில்லை என்றால், தமிழகத்தில் வன்முறைக் கலாச்சாரம் பரவிவிடும் ஆபத்து உள்ளது. அத்தகைய சூழலில் அவர்களின் தலைவர்கள் என்று தங்களைக் கூறிக்கொள்ளும் திருமாவளவன் போன்றோரை அந்த சமுதாயத்தினரே புறக்கணித்துவிடுவார்கள்.
-
பட்டியலின மக்களை தவறாக வழிநடத்துபவர்களை எண்ணித்தான்வருந்துகிறேனே தவிர, அம்மக்கள் மீது பாசமும், அவர்களின் நலனில் அக்கறையும் எனக்கு எப்போதும் உண்டு. எனவே, பட்டியலின மக்களின் தலைவர்களை நான் கேட்டுக்கொள்வதெல்லாம், அரசியல் சட்டப்படி வழங்கப்படும் இட ஒதுக்கீடு மற்றும் மத்திய மாநில அரசுகள் வழங்கும் சலுகைகளைப் பயன்படுத்தி அம்மக்கள் கல்வி, பொருளாதாரஅடிப்படையில் முன்னேறுவதையும், வேலைவாய்ப்பு பெறுவதையும் உறுதி செய்யும் வகையில் அவர்களை வழி நடத்துங்கள் - சாதிக்க வேண்டிய இளைஞர்களை சீரழித்து விடாதீர்கள் என்பதுதான். மொத்தத்தில் இளைஞர் சக்தியை ஆக்கபூர்வமாக பயன்படுத்துவதில் விவேகானந்தராக இருங்கள்....விலை மதிப்பற்ற அந்த சக்தியை வீணடிப்பவர்களாக இருக்காதீர்கள் என்பதுதான்" என்று கூறியுள்ளார்.
-
விகடன் செய்திகள்