ஒரு புலபெயர் தமிழனின் ஆதங்கம் (மனக்குமுறல்)

தமிழ் மொழிமேல் காதல் கொண்ட அனைத்து

தமிழ் நெஞ்சங்களுக்கும் என் இனிய வணக்கங்கள்

தாயகத்தில் இருக்கும் தமிழ்உறவுகளைவிட புலம்பெயர் தேசத்திலே இருக்கக்கூடிய தமிழ்பேசும் மக்களின் தொகை அதிகமாகிக்கொண்டே செல்கிறது. தமிழ் மொழியையும் தமிழர் பண்பாட்டையும் பாதுகாக்க வேண்டிய கடமையும் அவசியமும் புலம்பெயர் தமிழர்களிடமே கையளிக்கப்பட்டுள்ளது. நாம்தொடர்ந்தும் தமிழர் என்று சொல்வேண்டுமானால் எமது பிள்ளைகளோ அல்லது அதனைத் தொடர்ந்து வர இருக்கும் எமது சந்ததிகளோ தமிழர் என்ற அடையாளத்துடன் வாழவேண்டும் என்பதில் அக்கறைகொண்ட அனைவரும் செய்யவேண்டிய முதற்பணி முதலில் உங்கள் பிள்ளைகளுக்கு தமிழை கற்றுக்கொடுங்கள்.

வீட்டிலே தமிழில் பேசுங்கள். கலைவகுப்புகளில் பிள்ளைகளை இணைக்கும் போது தமிழில் தமிழ்ப்பாடல்களை அல்லது ஆடல்களை கற்றுக்கொடுக்ககூடிய மொழியாற்றல் உள்ள ஆசிரியர்களிடம் உங்கள் பிள்ளைகளை சேர்த்திடுங்கள். முக்கியமாக குரலிசையை (வாய்பாட்டு சங்கீதம்) ஒவ்வொரு குழந்தைகளுக்கும் கற்றுக்கொடுக்க தவறாதீர்கள்.

குரலிசையை கற்பதன் மூலம் சிறியவயதிலேயே சிறிய பாடல்கள், இறைபக்த்தி கீதங்கள், அறநெறிக்கருத்துக்கள் கொண்ட அழகிய பாடல்களையும் அதன் கருத்துக்களையும் பிள்ளைகளுக்கு மிகவும் சிறுவயதிலேயே ஆரம்பிக்கலாம். தற்பொழுது உள்ள தொழில் நுட்ப சாதனங்களில் பதிவு செய்து ஒவ்வொருநாளும் கேட்கவோ அல்லது பார்க்கவோ தூண்டுங்கள். இதன் மூலம் நல்ல ஒரு அடிப்படையை குழந்தைகள் பெறுவார்கள். இதன்பின் குழந்தைகளுக்கு ஏற்ற வயதில் நல்ல தமிழ் ஆசிரியர்களை அணுகி தமிழ் வகுப்புகளிலும் தொடர்ந்து

கலைவகுப்புகளிலும் குழந்தைகளை ஈடுபடுத்திவாருங்கள். உங்கள் கலை ஆசிரியர்களை தமிழிலேயே அனைத்து கலைகளையும் கற்றுக்கொடுக்கும்படி கூறுங்கள்.

கலைகளின் வளர்சியினை அறிந்து கொள்ள எமது மொழியில் நல்ல தேர்ச்சி பெற்ற பின் வேற்று மொழி பாடல்களை அறிமுகம் செய்வதில் எந்த தவறுமில்லை. எமது மொழியை முதலில் அழியாது பார்த்துக் கொண்டு ஏனைய மொழிகளில் ஆடுவதையோ பாடுவதையோ செய்வது வரவேற்க்கத்தக்கது. கலை நிகழ்ச்சிகளை நிகழ்த்தும் போது நாம் எந்த மொழியை பேசும் மக்களின் முன்னால் நிகழ்ச்சிகளை நிகழ்த்துகின்றோம் என்பதனை கருத்தில்கொண்டு அனைவரும் புரிந்து இரசிக்கக்கூடிய பாடல்களையோ அல்லது ஆடல்களையோ தெரிவு செய்தல் சிறப்பைத் தருவதோடு அனைத்து இரசிக உள்ளங்களையும் திருப்த்திப் படுத்தக்கூடியதாகவும் அமையும்.

நன்றி

வர்ணராமேஸ்வரன்.