காதலர் தினத்தில் பயங்கரவாத தாக்குதல் நடத்த போவதாக அச்சுறுத்தல் : தீவிர கண்காணிப்பில் மும்பை போலீசார்

First topic message reminder :

மும்பை : மும்பையின் முக்கிய இடங்களில் காதலர் தினத்தன்று பயங்கரவாத தாக்குதல் நடத்தப்படும் என மும்பை போலீஸ் கட்டுபாட்டு அறைக்கு மர்ம அழைப்புக்கள் வந்துள்ளன. 6பயங்கரவாத அமைப்புக்களைச்சேர்ந்தோர் இந்த தாக்குதலை நடத்த உள்ளதாக எச்சரிக்கை விடுத்துள்ளன. காதலர்கள் அதிகம் கூடி காதலர் தினத்தை கொண்டாடும் ஜூஹூ சவுபத்தி அல்லது பந்த்ரா பந்த்ஸ்டண்ட் அல்லது இரு இடங்களிலும் தாக்குதல் நடத்தப்படலாம் என தெரிவிக்கப்பட்டுள்ளது.
-
போலீஸ் கமிஷ்னர் தகவல் :
மர்ம அழைப்புக்கள் தொடர்ந்து வந்த வண்ணம் உள்ளதால் மும்பை போலீஸ் கமிஷ்னர் சத்யபால் சிங், அனைத்து போலீஸ் உயர் அதிகாரிகளையும் தொடர்பு கொண்டு மும்பை மற்றும் அதனைச் சுற்றி உள்ள புறநகர் பகுதிகளில் உள்ள ஹோட்டல்கள், லாட்ஜ்கள் மற்றும் தங்கும் விடுதிகளில் சோதனை நடத்துமாறும், மக்கள் அதிகம் கூடும் விமானநிலையம், ரயில்வே நிலையம், சுற்றுலா தலங்கள்உள்ளிட்ட இடங்களில் கண்காணிப்பை தீவிரபடுத்த வேண்டும் எனவும் தெரிவித்துள்ளார். பாகிஸ்தான் பயங்கரவாதியும் மும்பை தாக்குதல் குற்றவாளியுமானஅஜ்மல் கசாப் தூக்கிலிடப்பட்டு குறுகியகாலத்திலேயே பார்லிமென்ட்தாக்குதல் குற்றவாளி அப்சல்குருவும் தூக்கிலிடப்பட்டதற்கு எதிர்ப்பு தெரிவித்து பயங்கரவாதிகள் இந்த பதில் தாக்குதலை நடத்த திட்டமிட்டுள்ளதாகவும் போலீஸ் கமிஷ்னர் தெரிவித்துள்ளார்.
-
காதலர் தினத்திற்கு எதிர்ப்பு :
அஜ்மல் கசாப் மற்றும் அப்சல்குரு தூக்கிலிடப்பட்டதை அடுத்தபயங்கரவாத அச்சுறுத்தல்கள் வரக்கூடும் என்பதால் நாடு முழுவதும் பாதுகாப்பை பலப்படுத்த மத்திய அரசு உத்தரவிட்டுள்ளது. காதலர் தின கொண்டாட்டத்திற்கு சிவ சேனா கட்சியினரே அதிகளவில் எதிர்ப்பு தெரிவித்து தாக்குதல் நடத்துவர் என போலீசார் எதிர்பார்த்து இருந்த வேளையில் பயங்கவாதிகள் விடுத்துள்ள அச்சுறுத்தலால் பாதுகாப்பு பலப்படுத்தப்பட்டுள்ளது. முக்கிய இடங்களில் கூடுதல் போலீஸ் படை‌யினர் குவிக்கப்பட்டுள்ளனர்.
-
குற்றவாளிகள் கண்டுபிடிப்பு :
போலீஸ் கண்காணிப்பு அறைக்கு மர்ம போன் மூலம் மிரட்டல் விடுத்தவர் யார் என்பது குறித்து அந்த குறிப்பிட்ட தொலைப்பேசி அழைப்பை கண்காணிக்கும் பணியில் புலனாய்வு பிரிவினர் ஈடுபட்டு வருகின்றனர். தொடர்ந்து சிலமுறை வந்த தொலைப்பேசி அழைப்பை வைத்து போன் செய்தவன் உத்திர பிரதேச மாநிலம் மகு பகுதியைச் சேர்ந்த ராஜூ என போலீசார் கண்டுபிடித்துள்ளதாக தகவல்கள் வெளியாகி உள்ளன. இதே போன்று மேலும் 2 பேர் மும்பையில் காதலர் தினத்தன்று 6 பயங்கரவாத அமைப்புக்களின் தாக்குதல்நடைபெறும் என தெரிவித்துள்ளனர். இத்தகவலை பயங்கரவாத தடுத்து படைக்கும், பந்த்ரா போலீசிற்கும், ஜூஹூ போலீசிற்கும் மும்பை போலீசார் அனுப்பி உள்ளனர்.
-
தினமலர்